InfoHub Logo

Ertede jalǵyz basty bir baı ómir súrdi. Onyń týysqany da, balasy da jınaǵan mal múlki men aqshasy edi. Solardy baladaı mápelep kútetin. Bir kúni ol jalshysynyń kóńildi kúlkisin estip onyń úıin aınalshyqtap tyń tyńdady. Biraq mardymdy eshteńe estı almady. Ol ertesine jalshyny túnniń ortasyna deıin bosatpaı ábden jumysqa saldy. Biraq keshegi kúlki taǵy qaıtalandy. Degbiri qashyp shydamsyzdanǵan baı endi “mynaý meniń qazynamnan urlap júr, sol úshin úıine baryp máz bolyp jatyr” degen jaman oıǵa ketti. Ol jalshysynyń esigin bir teýip kirip bardy. Sóıtse jalshysy eki balasyn arqasyna mingizip alyp, ózi at bolyp oınap júr eken.

— Aqymaq, búgin qıralańdap durys jumys istemediń! Túnimen myna murynboqtaryńdy oınatamyn dep sharshaıdy ekensiń ǵoı! — dep aqyrdy.

— Qojaıyn, osy eki balapanymdy kórgende sharshaý, ýaıym degendi umytyp, tyńaıyp, sergip qalam, — dep baıypty qalpynan jazbaı jaýap berdi malaıy.

— Naǵyz aqymaq eken! — dep úıden atyp shyqqan baı endi “men kesh kirip qaldym ba eken, ol urlaǵan aqshasyn tyǵyp úlgerdi de, maǵan syr bermeı otyr sumpaıy” dep kúdiginen aryla almaı-aq qoıdy.

Ekinshi kúni jalshy tań atqansha jumys jasady. Biraq ol esh renish bildirmeı úıine qaıtty. Baı sońynan buqpantaılap baryp taǵy tyń tyńdady. Qulaǵyna shyqyrlaǵan aqsha men syldyrlaǵan kúmis teńgeni jalshysy sanap jatqandaı estilip ketti. Ol taǵy da esikti bir teýip kirip bardy. Eki balasyn eki jaǵyna alyp qannen qapersiz rahattanyp uıyqtap jatqan jalshysyn kórgende ne isterin bilmeı qaldy. Ún-túnsiz bildirtpeı úıden shyǵyp ketti. Sonda da kúdigi seıiler emes.

Ertesine jalshysynyń kóńildi, sergek qalpy baıǵa ózin mazaq qylyp turǵandaı kórinip ketti. Baı aqyry:

— Meniń qazynamnan biraz qarajat joǵaldy. Sony senen basqa eshkim alǵan joq. Sebebi sen únemi kóńildi júresiń, tyqqan aqshań bolǵan soń kóńiliń toq bop júr, — dedi.

Sonda jalshysy:

— Qojaıyn, jaǵdaıyń sorly quldan da jaman-aý. Kúnde keshke úıimdi toraýyldaısyń. Meniń baılyǵym eki balam men jan jarym jáne densaýlyǵym men qara kúshim. Qulanıektenip tań atqannan kesh batqansha Alladan osy baılyǵymnan aıyra kórme dep tileımin. Sondyqtan men baqyttymyn, kóńildimin, — dep jaýap berdi.

Ne derin bilmegen baı ún-túnsiz qaldy. “Iapyrmaı, shynynda da myna qara qul baqytty. Men sıaqty qyzǵanatyn baılyǵy da joq. Baılyq maǵan baqytsyzdyq úshin bitken be? Basym aýyryp ketti”.

Osy kúni jalshy úıine erte qaıtty. Onyń syrtynan qarap turǵan baı aldynan júgirip shyqqan eki balasyna qyzyǵa qarap qaldy…

---