InfoHub Logo

Toıda shamadan tys qyzyp otyrǵan el aǵalarynyń biri arnaý óleńin oqyp, onysyn mereıtoı ıesine tabystap otyrǵan ornyna qaraı mań basyp bara jatqan aqyndy toqtatyp: «Sen qazirden bastap osy oblystyń bas aqynysyń!

Men solaı uıǵardym!»- dep saldy.

Sol sát dý qol shapalaqtaý quttyqtaýǵa ulasyp, aragidik birer óleńi jergilikti gazetke qyrnalyp,tyrnalyp, kúzelip, túzelip basylyp turatyn paqyryńyz bir-aq sátte aımaqtyń bas aqyny bolyp shyǵa keldi.

Sol kúnnen bastap «aımaqtyń bas aqyny» degen alyp- qashpa ataq álgige qara kúıeshe jabysty.

Gazettiń bólim meńgerýshisi, ádebıet betin ázirleı qalsa, redaktory: «Álgi bas aqynnyń óleńderi bar ma?»- dep surar edi.

-Bar,- dese...

-Durys!-  dep betke batasyn beretin.

- Joq,- deı qalsa...

- Sen ózi... ne tantyp tursyń?

Pálensheniń toıynda  oblystaǵy ekiniń biri ony bas aqyn degenin estigen joq pa eń? - dep túlki kórgen búrkitteı túıiler edi.

-Jazbasa, zakaz berip jazdyrt. Myna betti  sodan soń  ákelersiń! - dep shyǵaryp salatyn boldy.

Eńbegi osylaı birneshe ret esh bolǵan bólim  meńgerýshisiniń kúıip ketip: «Qazaqtyń bas aqyny – Abaı, muny aıtqan men emes – Ahmet Baıtursynov.

Al sizder aıtyp júrgen oblystyń bas aqyny – qazaq  ádebıetindegi daýasyz dert, syzdaýyq.

 Shekpen kıgen danyshpan Abaı ǵana, Makentojdy  mıǵula jetip jatyr, - dep Qadyr aqyn tekke aıtty deısiz be?

Bul da  sol mıǵulanyń biri  minez tanytamyn dep mádenıet bóliminen óndiris bóliminiń ádebı qyzmetkerligine tómendetilgeni.

Bul baıǵus mádenıet bólimin urshyqsha úıirgenimen óndiris degen páleniń neden bastalyp, neden aıaqtalatynyn bile qoımaıtyn.

Qalamaqydan qala berdi biri aǵa, biri iniden quraq ushyp turatyn mádenıet salasynyń qyzmetkerlerinen kóz jazdy. 

Ásirese «Jyryma qanat berip, ushyrǵan sen» –dep jurt aldynda mereıin asqaqtata kóteretin aqyndardyń birden-aq sýyp sala berýi arqasyna aıazdaı batyp, eńsesin ezgen.

Al aımaqtyń bas aqyny munymen áldeqalaı kezdese qalǵanda alara qarap, irkile qalsa, kirerge tesik tappaı púsháıman  kúıge túsetin.

Bas aqynnyń ishimdikke salynyp, maskúnemge aınala bastaǵanyn kórgende bir túrli aıyzy qanyp: «Óleń kıesi qoısyn ba, bul ıtke sol kerek»,- der edi  ishteı kijinip.

Aqyry, redaktorǵa kisi salyp jalynyp, jalpaıyp júrip mádenıet bóliminiń ádebı qyzmetkerligine aýysqan. «Qyrsyqqanda qymyran irıdi» demekshi, dál sol tusta Almatydan Almaǵaıyp atty aqyn kelip, aımaq oqyrmandarymen kezdesý ótkizdi.

Birer jas aqyn óleń oqydy. Solardyń biriniń óltirseń de óleń deýge kelmeıtin óleńsymaǵy Almaǵaıyp aqynǵa unap qalsa kerek.

Kezdesýge uıtqy bolyp otyrǵan úshinshi hatshyǵa qarata: «Sizderdiń aımaqtaryńyzda myna jigitten basqa aqyn joq. Anaý aqyn, mynaý aqyn dep júrgenderińiz – dalbasa», -demesi bar emes pe?..

Ol  munyń bastyǵyna, bastyǵy buǵan ıek qaqty. Estidiń be degeni bolar?..

Al munyń boıyn «osynyń sońy nemen tynar eken?» degen túıne túıtkil meńdep bara jatty.

---