InfoHub Logo

Kók bóriniń mań dalany úreıge bólep ulyǵysy keldi. «Aýýýý... aýýýý... aýýýýý...» Ulı almady. Basy joq eken. Qaıda qaldy, bireýler shaýyp aldy ma, álde ózi bir jerge umytyp ketti me, o jaǵyn bile almady. Qatty ókindi. Ulı almaǵanyna. Jortyp keledi. Joǵalǵan basyn izdep. Uzaq júrdi. Basy esh jerden kezikpedi.

Bir qyrqadan asyp túskende toptanǵan qorqaýlardy kórdi. Ózderinshe ý-shýǵa bólep, ulyp jatyr eken. Bassyz bórini kórip, bári tyraǵaılap qasha jóneldi. Kók bóri negizinde qorqaýlardan óziniń basyn suraǵasy kelgen-di. Endi múmkin emes. Qoqaýlardyń sońynan qýǵysy kelgen, ary jibermedi.

Kók bóri: «Meniń basym kimge kerek boldy eken?» dep oılanyp keledi. Bir qyzyǵy óz tabıǵatyna tán qubylyspen ulı almasa da, adam sekildi sóıleıtindi shyǵardy. Mundaı daýysty talaı artynan qýǵan ańshylardan estigeni bar. Ony ulı almaı yshqynyp, óz ishinen ashshy óksikpen «Eı, Táńirim...» dep syrtqa shyǵarǵanda baıqady. Kók bóriniń eń alǵashqy sózi «Eı, Táńirim» dep bastaldy. Osy bir daýys dalany jańǵyryqtyra jónelgen. Áýeli adamdar kelip qalǵan eken dep úrke túsip, qashpaqqa umtylǵan. Qatelesipti, ol — ózi eken.

Qaıta-qaıta yshqynǵan daýysqa saldy: «Eı, Tá-ńi-i-i-ri-im...» Aıqaıǵa basty. «Eı, Tá-ńi-i-i-ri-im...» Alystan «Nesine aıqaılap, dalany basyńa kóteresiń» degen ashýly jaýap jetti. Kilt toqtaı qaldy. Jaýaptyń qaı jaqtan estilgenin ańǵarmady. Taǵy da aıqaılaýǵa oqtalǵanymen, «Osy da jeter, odan da ne buıymtaıyń bar, aıta ber. Meniń atymdy atap nesine shaqyrdyń» degen daýys estildi. Jan-jaǵyna alaqtaı qaraǵan bassyz bóri, esh nárseni baıqaı almady.

— Bekerge áýre bolasyń, meni eshqashan kóre almaısyń. Men seniń Táńirińmin.

— Oǵan men qushtar emespin de. Meniń basym qaıda?

— Bas deısiń be, — qarqyldap kúlgen daýys jetti buǵan, — kimniń basy qaıda qalmaı jatyr. Nemenesine buldap tursyń?

— Maǵan báribir óz basym kerek. Ulyǵym keledi.

— Sen endi ulı almaısyń.

— Nege?

— Ony adamdardan sura.

— Ne deısiz, adamdardan... Sonda qalaı?..

— Iá, seniń basyń endi adamdardyń qolynda.

— Túk túsinsem buıyrmasyn, men eshqashan adamdardyń tuzaǵyna túsip kórgenim joq.

— Onyń ras, degenmen seniń basyń solardyń qolynda.

— Olar meniń terime ǵana qyzyǵýshy edi ǵoı. Basym ne úshin qajet boldy eken?...

Kók bóri oılanyp qaldy. Basyn joqtap jylaǵysy keldi. Bóriligin tanytyp, syr bermedi.

— Kim biledi, ózgelerdiń alqymynan alý úshin shyǵar. Olar meni de umytyp ketkeli qashan...

Bul — Táńirdiń sózi. Ón boıy ókinishtiń tabymen órilgen.

— Joq, men buǵan kelisim bere almaımyn. Basymdy qaıtyp alamyn olardan.

— Endi bári de kesh...

— Eshten kesh jaqsy.

— Mundaı qaǵıda adamdarǵa ǵana tán.

— Sonda ne isteýim kerek, Táńirim?! Aıtyńyzshy?

— Saǵan adamdardyń basyn beremin. Tańdaǵanyńdy alasyń.

— Qajeti joq. Maǵan tek ulıtyn bas kerek.

— Oǵan meniń dármenim jetpeıdi.

— Siz jaratýshy emessiz be?

— Iá, biraq birinikin birine alyp bere almaımyn.

Kók bóri ne isterin bilmedi. «Táńirdiń qolynan bári de keldi» degen oıdyń shyndyǵyna jete almaǵandaı. Osy kezde Táńir sóıledi:

— Endi basyńdy izdeýiń bekershilik. Meniń usynysymdy qabyl almadyń. Endi seniń bassyz ǵumyryń bastalady.

Kók bóriniń denesi dir etti. Jelkesin kújireıtip, áldekimge aıbat shekkisi keldi. Qoryqqannan... Iá, úlken úńgirdiń ishinde alǵash kózin tyrnap ashqannan beri ǵumyrynda alǵash ret qoryqty. Bassyz ǵumyrynan.

— Men báribir izdep tabamyn.

— Jolyń bolsyn!

Kók bóri endi óz úıirine ógeı ekendigin sezindi. «Eı, basyń qaıda?» dep, uıalastary da qor etýi múmkin ǵoı. Bassyz bóriniń sońǵy túıini osy boldy.

---