Bata — qazaq halqynyń eń qasıetti sóz dástúrleriniń biri. Ol jaı ǵana tilek emes, úlkenniń kishige, ustazdyń shákirtke, ata-ananyń balaǵa beretin rýhanı amanaty. Halyq «Batamen er kógeredi, jańbyrmen jer kógeredi» dep beker aıtpaǵan.

Bul bette qazaqtyń bata-tilekteriniń eń tolyq jınaǵyn toptastyrdyq: toı batasy, týǵan kúnge tilek, dastarhan batasy, dinı batalar, balaǵa beriletin bata, jyraý-bıler men ataqty tulǵalardyń batalary jáne jol batasy. Ár bata mátini túpnusqa qalpynda berilgen — kóshirip alýǵa, toıda nemese otbasylyq sharalarda aıtýǵa daıyn.

Tómendegi jalpy batalar kez kelgen jaǵdaıǵa jaraıdy. Naqty bir oqıǵaǵa arnalǵan bata izdeseńiz, mazmundaǵy siltemeler arqyly tıisti bólimge ótińiz.

Bata (Tozaqtyń otynan saqta)

Iá, Qudaı, tilegimdi qabyl et,
Tozaqtyń otynan saqta,
Qańǵyǵan oqtan saqta,
Paraqordan, sottan saqta,
Kirli sýmen jýystan saqta,
Yntymaqsyz týystan saqta,
Kók doly qatynnan saqta,
Adamdy qadirlemegen elerden saqta,
Jandy basqan perisinen saqta,
Keýdesin kergennen saqta,
Merzimsiz kelgen ólimnen
saqta!
Tatymsyz tuzdyqtan saqta,
Qaıyrymsyz tilek, joqtan saqta,
Jalqaý bala, teksizden saqta,
Túnere atqan tańnan saqta,
Jańbyrsyz shańnan saqta!
Jastarda ádep joq,
Úlkenińde bátýa joq,
Quraıǵaı, shaq-shálekeı dańnan saqta!

Bata (Ia, Qudaı ońdaı gór)

Bisimilla, raqyman, raqyman!
Ia, Qudaı ońdaı gór,
Áýlıeler qoldaı gór.
Baısaldy qonys bere gór,
Baıtaq yrys bere gór!
Tilegen ár tilekti de durys bere gór,
Ósetin mal bere gór,
Kóp jasaıtyn jannan bere gór!
Mal berseń, qurarymenen bere gór,
Bas berseń, turarymen bere gór,
Ár nárseniń de baıanymenen bere gór,
Eki dúnıanyń abyroıyn bere gór!
Alhamdýllah rabbil,
Ǵalamnyń alhamyn aq,
Bereketinen bere gór!
Jaı qolyńdy, allah akbar!

Qazaqtyń bata-tilekteri

Ashyp tastap peıildi
Dastarhanyń jaıyldy.
Qasıetti nan ulyq
Berekeń tur naq uıyp.
Asyl sózder shashyldy,
Bar abyroı baq ornap
El syılasyn basyńdy.
Ańyz bolyp otaýyń
Aıta júrsin asyńdy.
Súıgen jaryń,
Bala — shaǵań aman bop,
Bútindesin asyldy.
Nıetińe biz toıdyq.
Rahmet sháıińe,
Rıza etken bir qoılyq!
Áýmın!
Qudaı jarylqasyn,
Baı qylsyn.

Baq qarasyn!

Qydyr darysyn!

Arýaq jebesin!

Bereke bersin!

Qudaı bersin,
Kem qylmasyn!

Otbasy aman bolsyn,
Densaýlyq bersin!

Ketpes dáýlet,
Keń peıil bersin!

Ardaqty úı ıesi,
Áýeli berdiń shaı,
Kóńiliń bolsyn jaı!

Ekinshi berdiń et,
Tappasyn kóńiliń eshbir dert!

Úshinshi berdiń sorpa,
Bolmasyn baǵyń orta!

Dastarhanyń baı bolsyn,
Qazan — aıaqqa maı tolsyn.

Tórt túligiń saı bolsyn,
Kóńiliń tolyp jaı bolsyn.

Ulyń qonyp uıaǵa,
Qyzyń qonsyn qıaǵa.

Keliniń «bıbi» atansyn,
Ulyń bolsyn «bı aǵa»!

Bergennen Alla tanbasyn,
Kóbeıe bersin mal basyń.

Óse bersin jan basyń,
Armanyń kókke samǵasyn.

Dosyńnan kóńiliń qalmasyn,
Jaǵańnan dushpan almasyn,
Jolyń bolyp jortqanda,
Jolyńdy Qydyr jalǵasyn!

Dastarhannan dám ketpesin,
Kóńilińnen sán ketpesin.

Urpaq, ulys aman bolyp,
Ómirińnen mán ketpesin.

Surasań bata bereıin,
Ústem bolsyn mereıiń.

Yqylaspen qol jaısań,
Aq tilekti tógeıin.

Dastarhanyń mol bolsyn,
Abyroıyń zor bolsyn.

Úıdiń árbir bólmesin,
Mol qýanysh kernesin.

Ul men qyzyń er jetip,
Bilimge qulash sermesin.

Týǵan — týys, jekjatyń,
Jamanshylyq kórmesin.

Asyń, asyń, asyńa,
Baqyt qonsyn basyńa.

Birlik bersin basyńa,
Bereke bersin asyńa.

Jaqsylyqqa jaq bolyp,
As qosylsyn asyńa.

Bas qosylsyn basyńa,
Jas qosylsyn jasyńa!

Densaýlyǵyń zor bolsyn,
Dastarhanyń mol bolsyn.

Qaıda barsań aldyńda,
Jarqyraǵan jol bolsyn.

Armandaryń aldyńnan,
Saǵan shyǵyp qol bersin.

Dushpanyń saǵan qul bolsyn,
Úıiń tolǵan ul bolsyn!

Myńǵa jetsin qoıyńyz!

Myńǵa jetse qoıyńyz:
Sarańdyqty qoıyńyz
Kúnde berse soıyńyz!

Oıyńyzdan ketpesin
Mereke men toıyńyz!

Malda bolsyn kózińiz,
Allada bolsyn oıyńyz,
Óziniń bergen dáýletin
Óz jolyna joıyńyz!

Uzaq etsin jasyńdy,
Berekeli berik qylsyn
Malyń menen basyńdy!

Tańda — Maqshar kúninde
Sharap etip qaıtarsyn
Bizge bergen asyńdy!

Óziń júzge kelgende,
Toqsanǵa jetsin alǵanyń!,
Kempir — shal bolyp qalǵanyń,
Shaıyh — pany bolǵanyń.

Sol jastarǵa kelgende,
Quman bolsyn qolyńda,
On bes ul men on bes qyz
Erip júrsin sońynda!

Júzge jetsin túıeńiz,
Úsh júz bolsyn bıeńiz!

Álderińnen kelgenshe,
Jyǵylǵandy kóterip,
Súıengendi súıeńiz!

Taryǵyp kelgen adamǵa
Bermesek, otqa kónemiz!

Bergendi tym — aq súıemiz.

Jomarttyq qylyq qoldansań,
Árbir jerde jar bolsyn
Bir jasaǵan — Iemiz!

Tańda maqshar kúnińde
Pyraq bolsyn mingeniń,
Hállá bolsyn kıgeniń,
Qorlar bolsyn súıgeniń.

Sol ýaqytta bilersiń
Bul kúnde bergen asyńnyń
Paıdasynyń tıgenin.

Bala menen baq bersin,
Munyń bárin sizderge,
Baıandy etip haq bersin!

Toryǵyp túzde júrseńiz
Qydyr — ata tap kelsin,
Alla bolsyn panańyz!

Qatar óssin, shyraǵym,
Malyń menen balańyz!

Dáýletti bas bersin,
Baqytty as bersin,
Ulystyń uly kúninde!

Ulyń ońǵa qonsyn,
Qyzyń qyrǵa qonsyn!

Qozyǵa tolsyn kógeniń,
Tulpar bolsyn qulynyń.

Sútti bolsyn qudyǵyń,
Óristi bolsyn jaılaýyń,
Yrysty bolsyn qystaýyń!

Arystandaı bolsyn qaıratyń,
Aıýdaı bolsyn aıbatyń,
Gúlge tolsyn óńiriń,
Kóńildi ótsin ómiriń
Asqa tolsyn tabaǵyń,
Ashyq bolsyn qabaǵyń!

Bizge tartqan basyńyz,
Dámdi eken asyńyz.

Urpaqty bop ózgeshe,
Syıly bolsyn basyńyz.

Quıǵan qyzyl sháıińiz,
Baldaı tátti maıyńyz,
Eseli bop eńbegiń,
Jyldan jylǵa baıyńyz
Baq kelip qonsyn basyńa,
Kóńiliń kóldeı shalqysyn.

Peıilińe toıǵan qonaǵyń,
İshpeı — jemeı balqysyn.

Qudaı qýat bersin,
Nurly shýaq bersin!

Dastarhanǵa bereke bersin,
Kúnde osyndaı toı — mereke bersin!

Basymyz aman bolsyn – Tynyshtyq zaman bolsyn!

Abyroıymyz arta bersin,
Dastarhanǵa máńgi taýsylmaıtyn
Qazy menen qarta bersin!

Qudaı bersin, kem qylmasyn,
Ketpes dáýlet, keń peıil bersin.

Qudaı qýat bersin,
Nurly shýaq bersin!

Dastarhanǵa bereke bersin,
Kúnde osyndaı toı — mereke bersin!

Kósh kólikti bolsyn,
Dos serikti bolsyn,
Jan erikti bolsyn,
Jar kórikti bolsyn,
Jer qunarly bolsyn,
Jas eleýli bolsyn,
Qyz shyraıly bolsyn,
Taý óristi bolsyn,
Baý jemisti bolsyn,
Jyl tabysty bolsyn!

Dastarhanyńa bereke bersin,
Bastaryńa mereke bersin,
Astaryńa adaldyq bersin,
Bastaryńa amandyq bersin,
Denderińe saýlyq bersin!

Áýmın!
Dastarhanyń baı bolsyn,
Qazan — oshaǵyń maı bolsyn.
Tórt túligiń saı bolsyn,
Kóńiliń tolyp jaı bolsyn.
Qulyndaǵan taı bolsyn!
Ulyń uıaǵa qonsyn
Qyzyń baqytty bolsyn!
Bergennen Alla tanbasyn,
Kóbeıe bersin mal — basyń.
Qydyr bolsyn joldasyń.
Dosyńnan kóńiliń qalmasyn.
Jaǵańnan dushpan almasyn.
Qastyq qylǵan ońbasyn,
Árýaqtar qoldasyn!
Dastarhan baılyǵyn bersin,
Denińniń saýlyǵyn bersin! Áýmın!
Pyshaǵyń maldan ketpesin,
Qazanyń ottan túspesin.
Mańdaıǵa bitken yrysyń
Bosaǵadan ketpesin.
Rahmet dámińe,
Rızalyq bersin bárińe.
Aman bolsyn basyńyz,
Júzge jetsin jasyńyz.
Dastarhanyńnan dám ketpesin,
Kóńilińnen sán ketpesin.
Urpaq, ulys aman bolyp,
Ómirińnen mán ketpesin.
Áýmın.
Aýylyńnyń qonǵany
Jylǵa-jylǵa saı bolsyn.
Ul balanyń mingeni
Jorǵa-jorǵa taı bolsyn.
Jorǵalatyp kelgende,
Atanyń kóńili jaı bolsyn!
Qara eshkiniń múıizi
Erbegeı de serbegeı.
Saǵan kelgen páleket
Ózen sýdy órlegeı!
Meniń atym – Sarybaı,
Saqalyma sary maı.
Tatam mezgil bolǵanda,
Tósegińniń basynan,
Jastyǵyńnyń astynan,
Baq-dáýlet kelip daryǵaı!
bata berý bata tilekter qazaqsha tilek batalar bata jattaý bata berý

Qazaqtyń bata — tilek ósıeteri

Halyq bata — tilegi
Ýa, Jaratqan, jarylqa,
Baq — dáýletin aýmas qyl!
Jarylqaǵanmen jalǵas qyl,
Ala aýyzdy alys qyl,
Qorǵannan qalys qyl!
Nıetteri aq bolsyn,
Beınetteri pák bolysyn,
Murattaryn asyl qyl!
Qolqasyn shań qappasyn
Júrgen jerin jasyl qyl!
Dalaqtatar daýdan saqta,
Jalaqtaǵan jaýdan saqta!
Ashyqqan bóriden saqta,
Qara jerdiń kórinen saqta!
Ashynǵan urydan saqta,
Qulqyny qurydan saqta!
Daýyldyń kárinen saqta,
Jylannyń zárinen saqta!
Aıaq astynan keziger –
Bále — jalanyń bárinen saqta!
Altynnan bolsyn jaǵań,
Kúmisten bolsyn taǵań.
Tasqa tary óngenshe,
Tarshylyq kórmeńder!
Muzǵa bıdaı óngenshe,
Muńshylyq kórmeńder!
Júzderiń jaınap,
Kelisti bolyńdar!
Tolǵan aıdaı
Óristi bolyńdar!
Qatarlaryńnan ozyńdar,
Qozdaǵan shoqtaı qozyńdar!
Eń aldymen,
Berekeshil bolyńdar!
Kópke birdeı
Elshil bolyńdar!
Kókoraıdaı jelkildep,
Jelpildep turyńdar!
Seksenge kelip,
Selkildep turyńdar!
Surasań, bata bereıin
Ústem bolsyn mereıiń!
Yqylaspen qol jaısań,
Aq tilekti tógeıin.
Dastarhanyń mol bolsyn,
Abyroıyń zor bolsyn!
Kók jaılaýdy jaılasań,
Taı, qulyndy baılasań,
Kelin tursyn kerilip,
Saltanaty kórinip,
Sabaq tolsyn qymyzǵa,
Sharań tolsyn ýyzǵa!
Órisińe mal tolsyn,
Aq tileýiń jar bolsyn!
Órenderiń er bolsyn,
Kóre almaǵan baǵyńdy,
Syndyra almaı saǵyńdy,
Betin basyp jer bolsyn!
Qara nıet jaýlaryń,
It pen qusqa jem bolsyn!
Balalardyń sáni óssin!
Tolǵan aıdaı baǵy artsyn,
Abyroı taǵy óssin!
Tolǵan aıdaı baǵy artsyn,
Abyroı taǵy óssin!
Qorǵan bolsa halqyna,
El súısinsin dańqyna!
Taldyrmaı bilegińdi,
Sazdyrmaı júregińdi,
Qalaǵan tileýińdi –
Qasyńdaǵy elden bersin,
Basyp júrgen jerden bersin!
Aǵaıynyń qoldaı bersin,
Dos — jaranyń qorǵaı bersin!
Kólińde balyq qaırańdasyn,
El — jurtyń jarańdasyn!
Jas balanyń kúlkisin ber,
Jas ananyń uıqysyn ber.
Jomarttyń qolyn ber,
Jortqyshtyń jolyn ber!
Qyzdyń qylyǵyn ber,
Sýdyń tunyǵyn ber.
Asaýdyń arynyn ber,
Túngi ottyń jaryǵyn ber.
Asqar taýdyń pańdyǵyn ber.
Bulbuldyń qustyń tańǵy únin ber.
Dalanyń jazyqtyǵyn ber,
Gúldiń náziktigin ber.
Teńizdiń tereńdigin ber,
Qyrannyń kóregendigin ber.
Erdiń kóńilin ber,
Búrkittiń ólimin ber!
Lashynnyń júregin ber,
Naǵyz dostyń tilegin ber!
Máńgi — baqı ajyramas
Shyn ǵashyqtyń bilegin ber!
Kúniń shýaqty bolsyn,
Kelin, sýatty bolsyn!
Qonysyń óristi bolsyn,
Ekkeniń jemisti,
Eńbegiń kelisti bolsyn!
Juldyzyń aǵańda bolsyn,
Qundyzyń jaǵańda bolsyn!
Jaryń jibekteı bolsyn,
Aryń túlekteı bolsyn!
Óneriń órleı bersin,
Ómiriń tórleı bersin!

Qaıda júrseń qanatty bol!

Seıfolla Ospanov
Tunyp jatsyn tóńiregiń,
Tórt túlikpen dúbirli bop,
Dýmandasyn aspan — kógiń
Úbirli bop, shúbirli bop,
Lebizderiń qabyl bolyp,
Qaıda júrseń qanatty bol.
Bar aınalań janǵa tolyp,
Qaǵylezdi qaraqty bol.
Qonaqtaryń arylmasyn,
Aq nıetter jańylmasyn.
Qara nıet qaǵynbasyn,
Ǵaıbat sózder tańylmasyn.
Kókiregiń kúrmelmesin,
Jan joldasyń túrlenbesin.
Sóziń qısyq úrlenbesin,
Sezim otyń súrlenbesin.
Aqyldy bol, naqyldy bol,
Eliń syılar tatymdy bol.
Árqashanda jaǵymdy bol,
Jańylystyrar jaýyńdy mol.
Barmaımyn endi árige
Dushpanyńnyń joly tarylsyn.
Osy aıtqanymnyń bári de
Perishteniń qulaǵyna shalynsyn!
Áýmın!
Árqashanda
Nesibeń arylmaı,
Qazanyń qaspaqty bolsyn.
Jyl saıyn jańylmaı
Sıyryń baspaqty bolsyn.
Qolyńdaǵy berekeń –
Qoı — eshkiń egizden týsyn!
Baq qonyp eresen,
Tarshylyqty
Molshylyq jýsyn!
Túıeleriń boshalap,
Jylqylaryńnyń
Jal — quıryǵy súzilsin.
Ańyz etip osy alap,
Dushpanyńnyń
Kók jelkesi úzilsin!
Qysqasy,
Óńiriń malǵa tolsyn,
Dastarqanyń nanǵa tolsyn.
Tası bersin baılyq,
Jınalyp jatsyn aılyq!
Áýmın!

Saqtyq bata

Dushpannyń tabasynan saqta,
Dostyń nalasynan saqta.
Ómir boıy jazylmaıtyn,
Júrektiń jarasynan saqta.
Sharasyz shermende bolǵannan saqta,
Mezgilsiz solǵannan saqta.
Aǵaıynǵa kóztúrtki bolyp,
Súmireıtip qorlaýdan saqta.
Sengeniń satyp ketkennen saqta,
Dushpan aldynda shókkennen saqta.
Qarǵap — silep tamam jurt,
Qaharyn tókkennen saqta.
Úgilip jylaǵannan saqta,
Arasha suraǵannan saqta.
Amalyń quryp eseńgirep,
Qaıtyp turmastaı qulaǵannan saqta.
Kesapattyń zárinen saqta,
Patshanyń kárinen saqta.
Qol jaıyp tilegin pendeńdi,
Pále — jalanyń bárinen saqta.
Áýmın!
Dalaqtaǵan daýdan saqta,
Jalaqtaǵan jaýdan saqta.
Ashyqqan bóriden saqta,
Qara jerdiń kórinen saqta!
Ashynǵan urydan saqta,
Qulqyny qurydan saqta
Daýyldyń kárinen saqta
Jylannyń zárinen saqta
Aıaq astynan keziger –
Bále — jalanyń bárinen saqta!
Áýmın!
Ýa, jaratqan ıem,
Tilegimizdi qabyl et,
Imanymyzdy kámil et.
Yntymaqsyz alaýyz,
Qyrqystan saqta.
Ári tart, beri tart,
Julqystan saqta.
Tórindi bıler jatyńnan saqta,
Kók doly qatynnan saqta.
Rýǵa bólingen nadannan saqta,
Jaqsylyǵy ózinen
arylmas adamnan saqta.
Qara júrek eserden saqta,
Nandy attaǵan kesirden saqta.
Keýde kórgen kórgensiz kelinnen saqta,
Mezgilsiz kelgen ólimnen saqta.
Tatymsyz tuzyńnan saqta,
Kórgensiz qyzyńnan saqta.
Betińe kúlgen sumnan saqta,
Betimen ketken jynnan saqta.
Jalǵasqan báleden saqta,
Bas keter jaladan saqta.
Qaıyrsyz maldan saqta,
Qazymyr shaldan saqta.
Adasqan elden saqta,
Ez bolǵan erden saqta,
Tótenshe náýbetten saqta,
Mindetshil jekjattan saqta!
Áýmın!

Jastarǵa bata

Jarylqa, Táńir, qabyl et,
Jarylqaýdyń qamyn et!
Bere gór, myna jastarǵa
İzet — abyroı, baq — dáýlet.
Bereke ornap baq qonsyn,
Baıandy bop naq qonsyn.
Talap qylsa árnege,
Tek jaqsylyk, tap bolsyn.
Jastyǵy ótsin gúldeı bop,
Tórt qubylasy birdeı bop.
Bere kórme olarǵa,
Jan tózgisiz bir beınet.
Joldary bolsyn ámanda,
Paıdasy tısin qoǵamǵa.
Táńirim ózi qoldasa,
Baq qonady adamǵa!
Áýmın!
Berekeń eshbir qashpasyn,
Belińdi eshkim baspasyn,
Adal bolyp alǵanyń,
Aryńdy kúldeı shashpasyn.
Baqyt bolsa bastasyn,
Meımanyń, sirá, taspasyn,
Tirlikte túzý jol tapsań,
Táńirim berer basqasyn!
Áýmın!
Surasań bata bereıin,
Ústem bolsyn mereıiń.
Yqylaspen qol jaısań,
Aq tilekti tógeıin.
Dastarqanyń mol bolsyn,
Abyroıyń zor bolsyn.
Kóre almaǵan baǵyńdy,
Syndyra almasyn saǵyndy,
Dushpandaryń jer bolsyn.
Jortqanda jolyń bolsyn.
Joldasyń Qydyr bolsyn
Otbasyń basqa tolsyn,
Qazanyń asqa tolsyn,
Órisiń malǵa tolsyn,
Basyńa baqyt qonsyn.
El — jurtyń aman bolsyn,
Baqytty zaman bolsyn,
Úıińe bereke kire bersin,
Bala — shaǵań, týystaryń
Baqytty ómir súre bersin!
Áýmın!
Tilek sizden bolsyn,
Yqylas, nıet bizden bolsyn.
Jaqsy — jamandy kórip baq.
Bar men joqqa kónip baq.
Ashshy — tushshyny tatyp kór,
Taıyz — tereńdi batyp kór!
El basyna túsken syndy,
Túz keship, tún qatyp kór.
Jıynda topqa túskende,
Júırigiń baptaýly bolsyn,
Jortýyl, joryq jolyqsa,
Naızań saptaýly bolsyn.
Nókeriń saqtaýly bolsyn.
Aman saqtap,
Abyroı bersin!
Jorytqanda jolyń bolsyn!
Áýmın!
Men batamdy bereıin,
Tilegimdi tógeıin.
Alladan tilep jaqsylyq,
Búlkildesin kómeıim.
Dastarqanyń tarylmasyn,
Qut — bereke arylmasyn.
Jarqyldap júr jurt aldynda,
Aıaǵyńtasqa shalynbasyn.
Bala — shaǵań aman bolsyn,
Tynysh zaman bolsyn.
Árbir adymyń,
Sátti qadam bolsyn!
Áýmın!
Elińniń qamyn oıla dep,
Jerińdi jaýdan qorǵa dep,
Ǵumyryń uzaq bolsyn dep,
Jýadaı jaýyń solsyn dep,
Ákeń bergen aq bata
Basyńa qonsyn baq bata.
Qyzyǵyń seniń alda dep,
Qataryńnan qalma dep,
Betinen jannyń alma dep,
Janyńa jara salma dep,
Anań bergen aq bata,
Basyńa qonsyn baq bata.
Quıryq — baýyr jegizgen,
Myń jyldyq quda degizgen,
Astyńa jorǵa mingizgen,
Ústińe shapan kıgizgen,
Qudań bergen aq bata,
Basyńa qonsyn baq bata.
Qonaqsyz úıiń qurysyn,
Úıińe óziń urysyń,
Qyryqtyń biri Qydyryń,
Baq dáýletiń yrysyń,
Qonaq bergen aq bata,
Basyńa qonsyn baq bata.
Áýmın!

Er — azamatqa bata

Jazyqsyz jaladan saqtasyn,
Arqańa aýyr júk batpasyn.
Sóıleseń sheshýshi sátterde,
Sózińe aǵaıyn toqtasyn.
Eńbegiń elensin árdaıym,
Araılap jaınap ber tańdaıyn.
Er bolyp týǵan soń anadan,
Oılaı júr halyqtyń jaǵdaıyn.
Qıyn bir sátterde jasyma,
Bar bolsań maqtanyp tasyma.
Úreı bop kórinip qasyńa,
Shýaq bop tógilgin dosyńa.
Anańdy aıalap ardaqta,
Atańdy qurmettep salmaqta.
Adal bol, áıteýir túzý júr,
Jaǵymsyz jaǵdaımen jan baqpa!
Áýmın!

Jıi qoıylatyn suraqtar

Bata degen ne?

Bata — úlken kisiniń nemese aqsaqaldyń jaqsy nıetin bildirip, Alladan ıgilik tilep aıtatyn óleń ne qara sóz túrindegi tilegi. Qazaqta bata berý — syı men qurmettiń eń joǵary kórinisi sanalady.

Batany kim beredi?

Dástúr boıynsha batany otyrǵandardyń ishindegi eń úlkeni, bedeldisi nemese arnaıy shaqyrylǵan aqsaqal beredi. Toı ıesi batany kimnen suraıtynyn aldyn ala kelisip qoıady.

Batany qalaı qabyldaý kerek?

Bata berilip jatqanda eki alaqandy jaıyp, únsiz tyńdaıdy. Bata sońynda «Áýmın!» dep, eki qolmen betti sıpaıdy.

Aq bata men teris batanyń aıyrmashylyǵy nede?

Aq bata — jaqsylyq, yrys, uzaq ǵumyr tileıtin izgi tilek. Teris bata — renjigen adamnyń qarǵysy. Qazaq dástúrinde teris batadan qatty saqtanǵan.

Uqsas bólimder