InfoHub Logo

Bilim berý salasynda tereń jan-jaqty oılastyrylmaǵan synaqtardy ótkizýge jol berýge bolmaıdy. Bul týraly búgin QR Parlamenti Senatynda ótip jatqan «Orta bilim berý júıesiniń jaı-kúıi, problemalary jáne zańnamalyq retteý perspektıvalar» taqyrybyna arnalǵan parlamenttik tyńdaý barysynda Senat tóraǵasy Qasym-Jomart Toqaev aıtty.

«Elimizde orta bilim berý salasy jıi reformalar júrgiziletin salalardyń qataryna jatady. Sońǵy jyldary mektepterimiz únemi reformalar júrgizý rejıminde jumys isteýde. Soǵan qaramastan bul sala zaman talabyna saı jańǵyrtyldy dep aıta almaımyz. Júrgizilgen reformalardyń tıimdiligi kórinetin nátıjelerge áli de qol jetkizgen joqpyz. Mekteptegi bilim berý júıesinde jasalǵan jańalyqtar kóp jaǵdaıda qoǵamdy aıtarlyqtaı tolǵandyrady», - dedi Senat tóraǵasy.

Osy rette ol atalǵan jaıttyń basty sebebi retinde túsindirý sharalarynyń jetkiliksiz deńgeıde júrgizilýine, bilim berý júıesindegi jańalyqtardyń tıisti deńgeıde júzege aspaýyna jáne pedagog mamandardyń sapasyna tikeleı baılanysty bolyp otyrǵanyn basa aıtty.

«Múmkin bul mańyzdy saladaǵy reformalardyń úzdiksiz júrgizilýin toqtata turý qajet shyǵar. Qandaı jetistikke jettik, qaıda keldik, nege qol jetkizdik? Aldymen osylarǵa baǵa berip alý kerek. Bilim berý salasynda tereń jan-jaqty oılastyrylmaǵan synaqtardy ótkizýge jol berýge bolmaıdy. Osy oraıda qazaqtyń uly aqyny, aǵartýshy, ustaz Ahmet Baıtursynovtyń jastardyń oqý, tárbıe jumys túzelmeı jurt isi túzelmeıdi» degen qaǵıdasyn qashanda este ustaǵanymyz jón», - dedi Qasym-Jomart Toqaev.

Derekkóz: QazAqparat

---