InfoHub Logo

Saryaǵash shıpajaıynda demalyp, aýylǵa qaıtatyn kezde bir medbıke: "Aǵa, qaıtys qashan?" — dep surady. "Olaı dep aıtpa, aǵa aýylyńyzǵa qashan qaıtasyz, deseńiz, túsiniktirek bolady", — dedim kúlip. Sonan keıin osy sózge baılanysty bolǵan bir oqıǵany aıtyp berdim.

Alystaǵy temirjol stansasynyń eki jumysshysy el astanasyndaǵy temirjolshylardyń ortalyq aýrýhanasynda emdelip jatady. Ol kezde qazirgideı baılanys joq. Stansanyń kezekshisi astanaǵa deıingi stansalardyń kezekshilerine ótine otyryp qana ortalyq aýrýhananyń bólimderimen baılanysa alady. Eki aralyqtaǵy áńgimeni joldaǵy barlyq stansalardan tyńdap otyrýǵa bolady. Álgi emdelip jatqandardyń týystarynyń ótinishimen stansa kezekshisi aýrýhanamen baılanysqa shyǵady. Eki jerlesiniń aty-jónin aıtyp, jaǵdaılaryn suraıdy. "Olardyń bireýi ázir jatyr, al ekinshisi qaıtyp ketti", — deıdi dáriger. Stansa kezekshisi "qaıtyp ketti" degendi baılanystyń nasharlyǵynan "qaıtys boldy" dep túsinedi.

Sodan aýyl aqsaqaldary jıylyp, úıine estirtip, jamanat habardyń jatpaıtyny belgili ǵoı jer-jerdegi aǵaıyn-týys qulaqtanyp qalady. Basqa kóliktiń reti joq erteńgi poezben baryp "marqumdy" alyp qaıtýǵa qamdana bastaıdy.

Al, "baqılyq boldy" degen adam astana jaqtan tań ata ótetin poıyzdan túsip úıine barady. Sodan jurt bir dúrligip basylyp, bul oqıǵa kópke deıin áńgime boldy.

— Sondyqtan da ár sózdi ornymen qoldanǵan jón, — dedim. Buǵan medbıke qyz da kúlip, keshirim surap jatyr. Men de oǵan sabaq bolsyn degenim ǵoı.

---