InfoHub Logo

Aqtaýda halqymyzdyń ataqty aqyn-jyraýy Qashaǵan Kúrjimanulynyń 150 jyldyq toıy ótip jatqan-dy. Jańaózennen kep, qonaqjaı izdep sabylmaı-aq burynnan tanıtyn ári bajalyǵy bar Berdibaı degen azamattyń úıine qonaǵa barǵanbyz. Ol oblys ortalyǵynyń úshinshi shaǵyn aýdanynda, energetıkalyq kolejge qarama qarsy bettegi eki qabatty eski úıde turady eken. Berdekeńniń qýyqtaı úsh bólmesi adamǵa lyq toldy. Tún ortasy, jaqyn jerde baratyn úı joq. Jata kettik. Birazdan keıin oıanyp ketsem, qara terge túsip jatyr ekenmin. Úıdiń aýasy tynys taryltatyndaı, óte qapyryq. Shydaı almaı syrtqa shyqtym. Esikti asha bergenim sol-aq edi, birdeńe saldyr-gúldir etip, bireýler dúrkirep qashqandaı boldy. "Jigittik-ıttik" degen, qyz-qyrqyn andyp júrgen jigitshil balalar shyǵar dep oǵan asa mán bermedim. Syrttaǵy shýdy estidi-aý deımin úı ıesi de shyqty. Keýde kere tynystap, biraz sergigennen keıin, ornyma baryp jata turaıyn degen oımen úıge kirdim.

Tańerteń kópshiliktiń kózinshe Berdekeń qolymdy alyp, alǵysyn jaýdyrdy. Túkke túsinbeı men turmyn.

— Túnde sen syrtqa shyqpaǵanyńda sý jańa "Jıgýlıimdi" urylar úptep ketedi eken. Táńir atqyrlar mashınanyń esigin ashyp, endi kirise bergende, sen shyǵa kelipsiń, urylar bárin tastap, jan-jaqqa qasha jónelgen. Senen keıin men shyqqanda, mashına aqtarylyp jatyr, biraq eshteńeni alyp úlgermepti. Búginnen bastap avto turaqqa qoıamyn. Sen meniń úıime únemi qonyp, osylaısha qutqara bermessiń, — deıdi Berdekeń kúlip.

Alǵys ta aıaq astynan eken-aý...

---