Kúderi belbeý belimde,
Azaly boldym elimde
Bopekem jarlyq bergen soń,
Júre berdim jónime.
Bas, bas ólim, bas ólim,
Basynan kelgen osy ólim.
Japyraǵyn jalpaıtyp,
Jardy bir alǵan osy ólim.
Muhammed - Qudaı dostyǵy,
Ony da alǵan osy ólim.
Qylyshynan qan tamǵan
Ǵalyny da alǵan osy ólim.
Ólimniń inisi - ýaıym,
Bul isti salǵan Qudaıym.
Qara bir shashym jaıaıyn,
Jaıaıyn da, jıaıyn.
Kúnáli barmaq, jez tyrnaq,
Kúninde qanǵa boıaıyn.
Albyraǵan aqsha bet
Súıegine taıaıyn.
Móımildegen qara kóz,
Jaspenen ony oıaıyn.
Alshańdap júrgen jas tórem,
Ornyna kimdi qoıaıyn?!
Órkesh te, órkesh, órkesh taý,
Baýyry tolǵan kek bastaý.
Top ishinde qıyn eken
Jalǵyz endi sóz bastaý.
Bastamasqa sharam ne,
Basyma salǵan qaram ne?!
Men jylamaı, kim.jylar,
Betimdegi jaram ne?!
Boǵastyń boıyn órt aldy,
Júrektiń basyn dert aldy.
On jeti jasar Ábijan
Qorasan degen dert aldy.
Asyl da gaýhar bolatym,
Ushaıyn desem, qanatym.
Ákekem qosqan qosaqtan
Aıyrdy sheber qudiretim.
Alty atanǵa júk arttym,
Ala arqanmen berik tarttym.
Aldynan júrmes atakem,
Qushaqtap turyp sóz qattym.
Arǵymaq úıirin saǵynsa,
Artqy aıaǵyn qaǵynar.
Alǵaıyp bıbaq saǵynar,
Qannan oıanyp jaǵynar.

---