InfoHub Logo

Aıǵalı bıyl bes jasta. Áli mektepke bamaǵanmen, biraz sandy biledi. Ony ekinshi synypta oqıtyn ápkesiniń qasynda otyryp úırenip alǵan. San sana deseń, eki qolyn kóteredi de, súp-súıkimdi barmaqtaryn búgip, sanaı bastaıdy. Bil, eke, ús... Tórtke deıin durys barady da, ary qaraı aýzyna túskenin aıta beredi. Árip jaza almaıdy, biraq óziniń atyn tanıdy.

Áke-sheshesi jumysta bolǵandyqtan, ol kúndiz úıde jalǵyz qalady. Jaqyn jerdegi mektepte isteıtin sheshesi anda-sanda kelip, kózdep ketedi. Ár joly kelgen saıyn onyń áldenemen aınalysyp, typ-tynysh oınap otyrǵanyn kóredi. Bir nársege berilse, basqaǵa kóp kóńil aýdarmaıtyn ózi sondaı aqyldy bala. Biraq onyń bir jaman daǵdysy bar — eshqashan oıynshyq shaq keltirmeıdi. Bir ne eki kún... boldy, odan aryǵa eshbiri barmaıdy.

Ylǵı da úıde jalǵyz qalǵandyqtan zerigedi deıtin bolar, úlkender bir jaqqa barsa, aldymen sony jarylqaıdy. Bolmady degende bir oıynshyq, ne odan da kóbin ala keledi. Eshqashan aqshalaryn aıamaıdy. Al onyń qadirine jetip jatqan Aıǵalı bolsa ǵoı!.

Ákesi sońǵy ret qalaǵa barǵanda sý jańa máshıne ákep berdi. Álgi máshıneniń keremeti, ózdiginen júredi taǵy sóıleı biledi eken. Áldebir tetigin basyp, jerge qoısań boldy, aldyǵa qaraı usha jóneledi de, anandaı jerge baryp toqtaı qalyp, qyzyl shyraǵyn jaǵyp, keri sheginedi. Artyna qaraı jyljı bastaǵannan, «Keri sheginemiz, jol berińizder!», «Keri sheginemiz, jol berińizder!» dep aıǵaılaı bastaıdy. Al oń ne solǵa burylǵanda, «Jol berińizder, burylamyz!» dep eskertý jasaıdy. Ózi taǵy qazaqsha sóıleıdi. Qyzyq! Alǵash jalǵyz Aıǵalı ǵana emes, úıdegilerdiń bári máz bolyp, qyzyǵa tamashalady. Degenmen, ol qýanyshtardy onsha uzaqqa bara qoımady. Jańa dúnıeniń saýdasy tez-aq bitti. Sebep — jene sol Aıǵalıdyń qyńyr qylyǵy.

Ertesi kúni jumystan qaıtqan úlkender «ǵajaıyp» máshıneniń ishek-qarny aqtarylyp, tór aldynda teńkıip jatqanyn kórdi. Mundaı kútpegen kórinisti baıqaǵandar baǵjıa qarady. Tipti, ol ne istese de «kúńk» etpeıtin ákesi bul joly qatty ashýlandy. Aıǵalıdy bólmesine shaqyryp alyp, «Eń bolmasa, eki kún oınasań bolmaı ma» dep, zekı urysty. Artynan «munyń ne?» dep surady sebebin bilmek bolyp sál jumsaryp. Baǵanadan túıilip únsiz turǵan Aıǵalı sonda ǵana murnyn bir tartyp qoıyp, «ishindegi balany kóreıin dep» dedi kúmiljip. Basynda balasynyń ne aıtpaq bolǵanyn túsinbeı, tosylyp qalǵan ákesi artynan baryp onyń kókeıindegisin shamalap, kúlip jiberdi.

«Áı, balamysyń degen! — dedi balasy shyǵyp ketken soń basyn shaıqap. — Seniń oıynshyq buza beretinińniń syry endi belgili boldy... Jaraısyń jigitim, taǵy da buz!

---