InfoHub Logo

Qazaqstanda bıyl 200 myńdaı muǵalimniń aılyǵyna bıyl 30 paıyzdyq ústemaqy qosylady. Bul týraly Úkimet otyrysynda QR Bilim jáne ǵylym mınıstri Erlan Saǵadıev aıtty.

Mınıstr Úkimet otyrysynda orta bilim berýdi jańa mazmunǵa kóshý jumystary týraly aıtyp berdi.

«Jańartylǵan mazmundy engizbes buryn baǵdarlama Nazarbaev zıatkerlik mektepterinde, odan keıin 30 pılottyq joba aprobasıadan ótti. Mektepterde pılottyq joba  retinde engizilgen júıeniń salystyrmaly nátıjesi boıynsha, bilim sapasynyń ortasha baly eki esege ósti. 2016-2017 jylǵy oqý jylynan bastap 1 synyp, byltyrǵy oqý jylynan bastap qosymsha 2, 5 jáne 7 synyptar kóshse, bıylǵy oqý jylynan bastap 3, 6 jáne 8 synyptar kezeń-kezeń boıynsha kóshedi. Jańartylǵan mazmunǵa kóshken muǵalimderdiń aılyqtaryna 30 paıyz ústemaqy qańtar aıynan bastap tólene bastady. Barlyǵy 200 myńnan astam muǵalim, ıaǵnı bıyl muǵalimderdiń 70 paıyzy qosymsha aqy alatyn bolady. Ustazdar qaýymy atynan Elbasyna úlken qoldaý bildirgeni úshin úlken rahmetimizdi aıtamyz», - deıdi Erlan Saǵadıev.

Mınıstrdiń aıtýynsha, bastaýysh, negizgi jáne jalpy orta bilim berýdiń jańa memlekettik standarttary qazirgi tańda daıyn.  Tıptik oqý josparlary men oqý baǵdarlamalary bekitilip, oqýlyqtar men oqý ádistemelik keshender ázirlengen. Krıterıaldy baǵalaý engizilý ústinde.

«Bastaýysh bilim berý deńgeıinde biryńǵaı bazalyq oqýlyqtar engiziledi. 3, 6 jáne 8 synyptardyń oqýlyqtary qazirgi ýaqytta daıyn. Endi saraptamadan ótip, qoǵamdyq baǵalaý portalyna shyqty. Ony 20 myńnan astam adam kórip, usynystaryn aıtyp jatyr», - deıdi mınıstr.

QazAqparat

---