InfoHub Logo

Májilistegi  Qazaqstan komýnıstik halyq partıasynyń  depýtattary orta mektepterdi Ulttyq biryńǵaı testileýdi ótkizýden bosatýdy usyndy.

«Qazirgi kezde QR Bilim jáne ǵylym mınıstrligi UBT-ny tapsyrý boıynsha sharalardy uıymdastyrý jaýapkershiligin mektepterge júkteıdi. Bul baǵyttaǵy jumystarda mektep túlekterin jınaý, tıisti orynǵa deıin avtokólikpen qamtamasyz etý, tamaqtandyrý, al keıbir jaǵdaılarda turǵylyqty jerin qamtamasyz etý eskerilýi múmkin. Atap aıtqanda, atestat alǵan túlekter mekteptegi oqý prosesiniń qatysýshysy bolyp tabylmaıdy. Osy rette UBT-ny uıymdastyrý men ótkizýge muǵalimderdi tartý olarǵa tıesili emes qyzmetterdi oryndaý bolyp tabylady»,-dedi depýtat Irına Smırnova Májilistegi jalpy otyrys barysynda.

Depýtat testileý sharalary muǵalimderdiń eńbek demalysy kezinde ótetinin, sondyqtan ustazdardy qaıta shaqyrtyp alý nusqaýlary júrgiziletinin atap ótti.

Smırnova aǵymdaǵy jyly jańa formatqa sáıkes, túlekter orta bilim týraly atestat alý úshin mektepte emtıhan tapsyratynyn, keıinnen JOO-ǵa túsý turǵysynda Ulttyq biryńǵaı testileýge qatysatynyn eske salyp ótti.

«Osy máselege baılanysty mektep ustazdaryn UBT-ny uıymdastyrý mindetinen bosatý qajet dep sanaımyz, sondaı-aq UBT qorytyndysy boıynsha mektep reıtıńin qurý tájirıbesin doǵarǵan durys bolady dep paıymdaımyz»,-dedi ol. 

---