InfoHub Logo

Baıaǵyda bir molda bolypty. Ol tek keıbir áripterdi tanyǵany bolmasa, túk bilmeıtin dúmsheniń ózi eken.

         Bir kúni molda bir aýylǵa keledi de: «Balalaryńdy maǵan berińder, men oqytamyn», – deıdi. Aýyl adamdary balalaryn jınaıdy, ári oqytatyn úı tigip beredi.

         Molda sabaqqa kirisedi. Balalardy álgi úıge jıyp alyp: «Kóp oqyǵanyń az oqyǵanyńa úıret» dep, ózi esiktiń aldyna shyǵyp, qolyn mańdaıyna tirep otyrady da qoıady. «Bul qandaı oqytý?» dep, suraǵan kisige:    

         — Balalar ózimen-ózi bolsa, sabaqqa da jaqsy zeıin qoıady, – dep jaýap beredi molda.

         Bir kúni qurdas eki adam alystan astyq ákelýge attanady. Qaıtar kezde ekeýdiń bireýi bir sharýamen sonda qalyp qoıady da úıine: «Eki-úsh kúnnen keıin baramyn» – dep hat jazady. Aýylyna kelgen kisi bir qýlyq oılaıdy. Aýylda qalyp qoıǵan kisiniń zaıybyna baryp:

         — Kúıeýiń dúnıe saldy, mynaý kóz jumar aldynda hosh aıtysyp, jazǵan haty edi, – dep, álgi hatty beredi. Áıel jylap-eńirep moldaǵa keledi. Oǵan bolǵan jaıdyń bárin aıtyp, kúıeýi jazǵań hatty onyń qolyna ustatady. Biraq molda aýzyn jybyrlatqannan basqa lám-mım demeıdi. Shydamy taýsylǵan áıel:

         — Aıtsańyzshy, ólgeni ras pa eken? – deıdi. Molda ne derin bilmeı:

         — Iá, solaı, solaı... – deıdi sasqanynan. Áıel úıine kelip, bir sıyryn soıyp, moldaǵa quran oqytady.

         Hat ákelgen kisi qurdasynyń úıine kelse, úı ishi abyr-sabyr, áıel jylap otyr.

         — Nege jylaısyń? – dep kúledi álgi adam.

         — Kúıeýi ólgen kisi jylamaı qaıtedi?! – deıdi áıel.

         — Hatty kimge oqytyp ediń, olaı dep jazylmaǵan edi ǵoı!

         — Hat moldekemde, sol kisi oqydy, – deıdi. Sonda tórde otyrǵan molda masqara bolǵanyn uǵyp, úıden shyǵa jónelipti.

---