InfoHub Logo

Maıdandaǵy jazýshy jastarymyzdyń biri Baýbek Bulqyshev joldas ózin jurtqa Otan soǵysynyń ústinde tanystyrdy. Soǵystan buryn ol árnege de taıynbaı soqtyǵatyn talaby bar da qalamy ushtalmaǵan bolatyn. İzdengish oıǵa suraý salyp, jas qalamnyń tez ushtalyp ketýine áser etken Uly Otan soǵysy sıaqty úlken kóriktiń dem alysy.

Soǵys aldyndaǵy sońǵy jyldarda Baýbektiń óleńderi kóbinese «Oktábr balalary» gazetinde basylyp turǵandyqtan «úlkenderdiń» nazaryn tarta qoımaǵan edi. Al, myna ár quraldyń ótkirligin, ár kúshtiń ázirligin aıaýsyz synar kezeńde jas talant jaqsy siltep ketti. Oıly jastyń qunarly sózi búkil sovet eliniń qulaǵyna jaıly tıdi, jıyrma bes jyl birge, bir baǵytta ósip-óngen kóp ultty eldiń aınymas dostyǵynyń únindeı estildi.

Baýbek zaman bizdiki deıdi. Baýbek maıdandaǵy qazaq jastarynyń atynan sóıleıdi. Shynynda, munyń ekeýi de úlken jaýaptylyqpen aıtylatyn sózder. İsine de, kúshine de erkin senetin sovet jasy bul jaýaptylyqtan taıynǵan joq. Óıtkeni Baýbektiń osy kitapshada basylyp otyrǵan maqalalarynyń qaısysyn alsaq ta, óte bir eleýli, erekshe bir maǵnaly máselelerdi qozǵaıdy. Ony qozǵaı alǵan jastyń zaman bizdiki deýge de, jalpy jastar atynan sóıleýge de ábden qaqysy bar.

Baýbektiń bir-eki maqalasyn qazaqshaǵa men aýdardym, unatyp aýdardym. Oılanyp aıtylatyn úlken oılardy oqýshy júregine dál jetkizetin ádemi tilmen bere bilý — jazýshynyń erekshe bir qasıeti. Baýbekte osy qasıet bar. Elire sóılegen kópirme sóz emes, jas júregin júz burap shyqqan oıyna oraı ádemi tili bar. «Ómir súrgim keledi», «Ómir men ólim týraly» degen maqalalary úlken sheberlikpen jazylǵan. Sovet jýrnalıs -jazýshylarynyń aldyńǵy qatardaǵylarynyń - aq aıta alatyn nárseleri. Baýbek dúnıelik mádenıetpen, ár aǵymdy fılosofıamen jaqsy tanys jazýshyǵa uqsaıdy.

Baýbek qazir Otan soldaty, maıdanda júr. Qolynda myltyǵy, qaltasynda qalamy. Elimizdi qorlap, jerimizdi lastap júrgen nemis fashıserine ekeýi de tas shoqpardaı tıedi. Qalamyn Otan soǵysynyń tilegine baǵyndyryp, Baýbek qazir kórkem ocherk jazyp júr.

Jeńis kúni jaqyndap keledi. Maıdannan shırap qaıtqan jazýshy jastardyń qulashyn keń jaıyp, qanatyn erkin serper kúnderi de jaqyn. Osy tilek, osy úmitpen taǵy bir jaqsy, taǵy bir jas jazýshymyzdyń betin ashqymyz keledi.

---