InfoHub Logo

«Eńbekshi qazaq» gazeti óziniń 2 jas tolyp, 3 jasqa aıaq basqan kúni bolǵandyqtan, búgingi Uly Oktábr tóńkerisimen birge meıram etip, jalyndy sálem, ashyq júzimen oqýshylaryna boı kórsetip otyr.

«Eńbekshi qazaq» gazeti, jalpy mádenıeti tómen, sharýasy baıaý, qarańǵy eldi aǵartý jolynda, qolynan kelgen kómegin berip, jón silteýde shamasy kelgenshe tartynyp qalǵan joq. Biraq eńbekshil el aldynda barlyq mindetin ótep, maqsatyna jetti, boryshyn tolyq atqardy deı almaımyz. Óıtkeni Qazaqstan astanasynda shyǵyp, en daladaǵy jalshylar tabynyń sýretin aınadaı ashyp, kózge elestete alǵan joq. Ortalyqqa qoly jetpeı, biren-sarań tyrnaqtylardyń jábirine túsken keıbir momyndardyń munyń shaǵyp, múddesin aıtýda áli de bolsa qarańǵylyqtan qutyla almaǵanyn kórip otyrmyz.

Mádenıet júzinde keıin qalǵan qazaq halqy sıaqty qarańǵy el aldynda óziniń ustaǵan jol, qurǵan plandarynyń (jospar) myńnan birin de ótegen joq desek te, jalshylar tabyna sezim berip, sana ornatý, tap jigin aıyrý syqyldy iri maqsatqa erekshe nazar salyp, mańyzyn kóbirek aýdardy, «Eńbekshi qazaq» áli de osy jolmen barýyna jalpy dala kedeıleriniń aldynda senimdi ýádesin bere alady.

Qarańǵy el ishine sana ornatatyn, saıası bilim berip, mádenıetin gúldendiretin ár halyqtyń óz tilinde shyǵyp taraǵan gazet-jýrnaly desek, «Eńbekshi qazaq» gazeti de, ózin súıip oqýshylaryna qadiri qymbat azdy-kópti bergen maǵlumatymen, kóp kemshilikterine oqýshylarynan keshirim surap, úsh jasqa qaraǵan jylynda shamasynan kelgeninshe jurt paıdasy tabylar degen iri máselelerdi sheship otyrmaqshy.

Aldaǵy jylda «Eńbekshi qazaqtyń» kútken maqsattary: qazaq tilin qoldaný, turaqsyz kemshilikti tastap, ǵylym-bilimge beıimdeıtin otyryqshylyqty qoldaný, el ishinde sharýa uıymdaryn ashyp, turmystaryn jóndeýge jol kórsetý, el ishindegi buzyqtarmen kúresý, áleýmetshilik turmysynan túsinik berip, eski ádet-ǵuryptardyń kereksizderin tamyrymen qurtý, áıelder bostandyǵy úshin qalyńmal alýshylarmen kúresý ám oqý oqytý jolynda jol siltep, jete maǵlumat berip turmaqshy.

Gazet keı saharada jaıylǵan qarańǵy el eńbekshileriniń arasyna taralyp, saıası sezim, jańa turmys ornatýda kózdegen nysanasyna jete bermek...

07.11.1923 jyl

---