InfoHub Logo

Alys jaqtan ushyp kele jatqan eki qaz jolaı sý taba almaı, jer sharlap, uzaq júripti. Shildeniń shyjyǵan ystyq kúnderi eken. Aqyry bir sarqyndy kólshikke kelip qonypty. Bir baqa sol kólshikti kópten mekendep júripti. Ol kólshigin qyzǵanyp, barqyldaı qoryp, eki qazdy jolatpaı, sý ishkizbeı qoıypty.

         Shólden tańdaılary keýip turǵan eki qaz álgi baqaǵa bas ıip jalynypty. Baqa sonda da kónbeı:

         – Bul az ǵana kólshik, sýy tizeden keledi. Sender ishseńder, quryp qalady. Al sender sýsyndaryńdy qandyrǵan soń, ushasyńdar da ketesińder. Men beıshara sýsyz qalaı kún kóremin? Ushatyn qanatym joq, qudyq qazar tyrnaǵym joq. Qaıda baryp jan saqtamaqpyn?! – dep qaıǵyrady.

         Eki qaz baqanyń bul aıtqanyna túsinip, ony jubatady:

         – Eger biz ishkennen osy kólshiktiń sýy taýsylyp qalsa, biz seni kóterip ushyp, sýy mol bir kólge jetkizip salaıyq.

         Baqa buǵan kónedi. Úsheýi osylaı ýádelesedi de eki qaz sýǵa qanyp alady. Sol kezde kólshiktiń sýy da sarqylady. Sodan keıin eki qaz osy arada birer kún tynyǵady.

         Bir kúni az ǵana kólshiktiń sýy múlde sýalyp, astyndaǵy boryǵy sasyp, qurttap ketedi.

         Eki qaz ýáde boıynsha baqaǵa:

         – Júr, endi ketelik, sýy mol kólge jetelik, – deıdi. Ol da ushýǵa qumartyp turady. Eki qaz qulashtaı uzyn shybyq taýyp keledi de baqaǵa sony dál ortasynan tistetkizedi. – Biz seni kókke alyp ushqanda, aýzyńdy ashpaı, jaǵyńdy qarystyryp, tistep tura ber. Aýzyńdy ashsań, jerge qulaısyń.

         – Aıtqandaryńdy oryndaımyn, – deıdi baqa.

         Eki qaz álgi shybyqtyń eki ushynan jalpaq saýsaqtarymen myqtap ustaıdy da baqany aspanǵa alyp kóteriledi. Aspanda qustaı samǵap bara jatqan baqanyń kóńili ósedi, jerdegi baqalardan ózin zor ári baqytty sanaıdy, bul qylyǵyna masattanady.

         Osylaısha aspanda qalqyp kele jatqanda, muny kórgen jerdegi adamdar kókke qadala qarasyp, tańdaı qaǵysady.

         – Anany qarańdar, anaý ne? – desip surasady birinen-biri.

         Bireýler:

         – Qanatty baqa! – deıdi daýystap. Bireýler:

         – Baqa emes, basqa birdeńe, – deıdi talasyp.

         Jurttyń aıqaı-shýy, talas-daýy qulaǵyna jetken baqanyń keýdesin maqtanysh kernep: «Bul elge aty-jónimdi aıtpaı ketkenim bolmas», – dep oılap, tańyrqap turǵandarǵa:

         – Men baqamyn!.. – dep aıqaılap, aýzyn ashqan zamatta shybyqtan ajyrap, jerge qaraı quldyraı jónelipti. Tastaı shyr aınalyp, zýlaı beripti. Eki qaz sońynan jetip ustaı almaı qalypty. Sol betimen dalbalaqtap kelip, taqyr jerge tars ete túsip, mylja-myljasy shyǵypty.

         Eki qaz:

         – Aqymaqqa istegen jaqsylyǵyń jelge ushqan tozańmen teń eken ǵoı, – dep, ári qaraı samǵap kete barypty.

---