InfoHub Logo

Bir kisiniń Maıtaban degen tanadaı nán qara tóbeti bolypty. Ózi asqan saq ıt eken. Qora mańyna qasqyr jolamapty. Bireý kele jatsa, dybysyn alystan estip, abalap jar salady eken. Al ondaı eshteńe sezbese, qara joldyń ústine baryp, kóldeneń túsip, tapjylmaı jatyp alady.

         Bir kúni Maıtaban taǵy da qara joldyń ústine baryp jatsa, kórshi aýyldyń Maılyaıaq degen kók tóbeti qarap turyp, munyń syry ne dep oılapty. Maıtabannyń kún saıyn qara joldyń ústine baryp jatyp alatynyn kóredi eken. «Men oǵan baryp suraıyn, munysynyń mánisin bileıinshi, ne sebepten qara jolǵa baryp jatyp alady?» – dep oılapty. Sodan Maıtaban qara joldyń ústine baryp jata ketken kezde, Maılyaıaq ta qasyna jetip barady.

         – Eı, Maıtaban, osy sen ne sebeppen qara jolǵa kelip jatyp alasyń? – dep surapty. Buǵan Maıtaban:

         – Men osynda jatyp, adam balasyn synaımyn, – dep jaýap beripti. Buǵan Maılyaıaq tań-tamasha qalady.

– Sen sonda adam balasyn qalaı, qaıtip synamaqsyń?

– Ol bylaı: jaqsy adam maǵan taıap keledi de tıispesten, úndemegen kúıi árirekten aınalyp ótip ketedi. Al jaman adam bolsa, meni kórgennen aıqaılap, bajyldap, baıbalam salady. Qolynda taıaǵy bolsa, sony sermep, maǵan qaraı tap-tap beredi. Taıaqsyz bolsa, jerden tas ne kesek alyp, maǵan qaraı laqtyrady. Sol kezde men: «Seniń neńdi búldirdim, jónińe kete bermeısiń be?» – dep, renishimdi tanytamyn. Osylaısha kún saıyn osy jolmen qansha jaqsy adam, qansha jaman adam ótedi, sony bilip alamyn.

Maıtabannyń bul synaǵyna Maılyaıaq tańdanyp júre beripti.

Ittiń de synshysy bolady eken.

---