InfoHub Logo

Baıandy baqyt taımasyn, halqym basyńnan,

Mol úmit kútem, jas urpaq sendeı asyldan!                                                      

M.H.Dýlatı atyndaǵy Taraz memlekettik ýnıversıtetiniń «Aqparattyq tehnologıalar, avtomatıka jáne telekomýnıkasıalar» fakúlteti «Informatıka» kafedrasynyń 3 kýrs stýdentteri Taraz-Ǵasyr kolejinde pedagogıkalyq tájirıbeden ótti.

Elbasymyz Halyqqa Joldaýynda: Bizdiń urpaq aldynda babalar qol jetkizgen ıgilikti saqtaý, qaıta qalpyna keltirilgen memleketimizdi nyǵaıtý jáne dúnıejúzilik qaýymdastyq talaptaryna saı jańa sapalyq deńgeıge kóterý mindeti tur,- dep, jastarǵa zor senim men úmit artyp otyr. Sol senimdi aqtap, bolashaǵymyzdy jarqyn etý, elimizdi órkendetý úshin bilimdi jastar kerek. Kez kelgen el óziniń bolashaǵyn óskeleń urpaǵymen baılanystyrady. Ár urpaqtyń peshenesine jazylǵan zaman aǵymy, kezeń tynysy bolady. HHİ ǵasyr búgingi urpaqqa, ıaǵnı jastarǵa buıyrǵan - baǵa jetpes baqyt.

Elimizdi órkendetip, memleketimizdi kórkeıtý úshin sapaly bilim men sanaly tárbıe alý - jastardyń basty mindeti ekendigin eskeretin bolsaq, «Informatıka» mamandyǵynyń stýdentteri ótkizgen ashyq sabaqtar, sabaqtan tys is-sharalar men tárbıe jumystary sonyń dáleli ekendigin kórsetedi.

Tárbıelik maqsatta ótkizilgen dóńgelek ústel barysynda úzdik stýdentimiz Mampaeva Móldir taqyryp boıynsha «Elimizdi kórkeıtý, ony ózimizden keıingi urpaqqa jetkizý – bizdiń boryshymyz dep bilem. Oılaǵan armanym, alǵa qoıǵan maqsattarym kóp. Men jarqyn bolashaqqa senemin. Bolashaǵymnyń jarqyn bolatynyn Elbasynyń syndarly saıasatynan, elimniń turaqtylyǵy men bilim salasyndaǵy jetistikterinen boljap otyrmyn. Qolymnan kelgenshe kafedradaǵy ulaǵatty ustazdardan bilim alyp, óz biliktiligimdi jetildirýge barymdy salamyn. El bolamyn deseń, besigińdi túze,- degendeı, eńsesin endi ǵana kóterip kele jatqan bizdiń elimiz úshin daryndy, bilimdi, jigerli urpaqtardyń orny bólek. Al barlyq jiger, qaırat, elimizdiń bolashaǵy tek jastardyń qolynda», -dep óz oıyn erkin jetkize bildi.

Dóńgelek ústeldiń qorytyndysynda stýdent Myńjasar Aqjan Elimizdiń eńsesin bıik etip, kók týymyzdy kókke jelbiretip júrgen jalyndy jastardy atap, olardyń jetken jetistikteri men baǵyndyrǵan belesterin aıtyp ótti.  

Kez kelgen memlekettiń bolashaǵy – bilimdi jastar. Kózi ashyq, kókiregi oıaý kez-kelgen bilimdi urpaq óz Otanyn damytý jolynda aıanbaı ter tógedi. Qazirgi boı jarystyratyn emes, oı jarystyratyn zamanda «jalqaýlyqty janǵa serik etip jatýdyń» ózi ábestik. Jalyn men jigerdi, izdenis pen talpynysty talap etetin jastyq shaqta el bolashaǵy úshin eńbek etý jastardyń basty mindeti. 

Búgingi jas bolashaq Qazaqstannyń jarqyn beınesi. Jastardy bilim jolyna salyp, túzý joldan taıdyrmaı, sanaǵa sáýle shashar oqý bilimniń tizginin ustatý memleket pen qoǵamnyń mindeti sanalady. Qandaı myqty memleket bolmasyn jastardyń bilimi men oqý-aǵartý isine kóp kóńil bóledi. Keleshektiń irgetasyn qalaý úshin, eń aldymen sol eldiń jastarynyń sanaly urpaq bolyp jetilýine kúsh salý kerek. «Informatıka» kafedrasynyń profesor-oqytýshylar quramy da dál osy baǵytta kóptegen jumystar atqarýda. Árbir jastyń alańsyz, bilim nárimen sýsyndaýyna barynsha jaǵdaı jasalǵan. Nurly bolashaqtyń dańǵyl jolynda bilim men ǵylymdy janyna serik etken  Qazaqstannyń jastary tekti ulttyń urpaqtary ekenine keler kún men atqan tań birden-bir kýágeri bolmaq.

Qazirgi tańda Qazaqstan – órkenıetti, damyǵan elder qataryna engen memleket.  Táýelsizdik jastarǵa jarqyn bolashaqqa jol ashyp berdi. Osy memleketti odan da bıikten kórsetý – bilimdi jastardyń qolynda.

 

 R.N.Tajıeva

«Informatıka» kafedrasynyń

aǵa oqytýshysy, M.H.Dýlatı atyndaǵy TarMÝ

---