InfoHub Logo

Aqshańyzdy únemdeýge kómektesip, elektr qýatyna az shyǵyndalýǵa múmkindik beretin tásilder kóp. Ony birimiz bilsek, birimiz bile bermeımiz. Mundaı qýlyqtardyń keıbiri qosymsha shyǵyn qajet etýi múmkin. Mysaly, terezelerdi jylylaý. Bul rette biraqatar adam energetıkalyq tıimdi turmys tehnıkalaryn alýdy jón kóredi. Biraq eń tıimdi ári utymdy amal retinde elektr qýatyn únemdep, qaltańyzdan artyq shyǵyn shyǵarmaıtyndaryn ataı alamyz. Sonymen qatar tabıǵat resýrstaryn únemdeý arqyly kúlli adamǵa ortaq ǵalamsharymyzdy qorǵaýǵa atsalysasyz. Iaǵnı jerdiń, aýanyń lastanýyna, qyshqyldy jańbyrdyń paıda bolýyna yqpalyńyz azaıyp, parnıktik effektini jeńildetesiz. Tómende atalǵan ádisterdi qoldanyp kórseńiz, aqshańyzdyń únemdelýine ǵana emes, qorshaǵan ortaǵa da tıgizer paıdasyn baıqaısyz. Bastysy, óte tıimdi ári tegin.

Kir jýý jáne keptirý

Kir kıimdi sýyq sýda jýyńyz. Bálkim, kirjýǵysh mashına barabandy aınaldyrý úshin, elektr qýatyn kóp tutynady dep oılaıtyn shyǵarsyz. Al shyndyǵynda kirjýǵysh mashına jumsaıtyn elektr qýatynyń shamamen 90 paıyzy sýdy ysytýǵa ketedi. Eger kirdi salqyn sýmen jýatyn rejımin tańdasańyz, biraz aqsha únemdeı alasyz. Jyly sý kıimdegi daqty ketirýde tıimdi. Biraq sapaly untaq tańdasańyz, kir kıimdi tazartýǵa sýyq sý da tıimdi. Sonymen qatar kıim keptirgish mashınany da qoldanýdyń qajeti joq. Kún jyly bolsa, jýylǵan kıimdi dalaǵa jaıyńyz. Bul keńeske qulaq assańyz, taǵy da biraz aqshańyz qaltańyzda qalady ári kıimińiz jupar ańqıtyn bolady. Kıimdi úıde keptirýdiń de óz tıimdiligi bar. Oǵan qosa kıimińizge kúte bilgenińiz jón. Eger kıimdi kir jaıǵyshtan nemese elektrli keptirgishten sál dymqyl kúıinde alsańyz, útiktegen kezde kóp qınalmaısyz. Al elektrli kir keptirgishten bas tartqyńyz kelmese, ylǵaldylyq tetigi bar túrin tańdaǵanyńyz abzal. Mundaı mashınaǵa kir keptirý úshin kóp ýaqyt qajet emes.

Kompúterdi óshirip júrińiz

Kompúterdi qoldanbaǵan ýaqytta qosylǵan kúıinde qaldyrmańyz. Kompúter men monıtoryn óshirip júrseńiz, biraz aqshańyzdy únemdeı alasyz. Sonymen qatar elektr qýatyn 80 paıyzǵa az jumsaısyz. Óz kezeginde ol atmosferaǵa shyǵarylatyn ıis gazynyń kólemin birneshe kılogrammǵa azaıtýyńyzǵa múmkindik beredi.

Úıdi jylytý jáne salqyndatý

Eger úıińizde termostat bolsa, qys mezgilinde temperatýrasyn tómendetip qoıyńyz. Al jazda salqyndatatyn qyzmetin jıi qospańyz. Uıyqtap jatqanyńyzda nemese úıde bolmaǵan ýaqytyńyzda jylýdy sóndirińiz. Munyń bári úıdi jylytýǵa jumsalatyn shyǵyndy azaıtýyńyzǵa kómektesedi. Jazda úıińiz tym salqyn bolǵandyqtan, jyly kıim izdeýdiń ornyna, kondısıonerdi óshirip qoıǵanyńyz jón emes pe? Al úıińizge kamın ornatsańyz, onyń bólmeden jylýdy tartyp, murjaǵa jiberetinin bilgeısiz. Sondyqtan úıińizdi jylytýǵa qansha kúsh salǵanyńyzben, jylý murja arqyly shyǵyp ketetin bolady. Iaǵnı aqshańyzdyń bosqa aýaǵa ushqany. Bul rette jabyq júıeli, gazben jaǵylatyn túrin tańdaǵanyńyz lázim. Ol – áldeqaıda tıimdi ári únemdi.

Jeldetkish, kondısıoner jáne perdeni durys qoldana bilińiz

Perde men tereze – úıdegi temperatýrany qadaǵalýǵa múmkindik beretin zattar. Kóptegen adam úıge jaılylyq ornatatyn ádisterdiń atalǵan dástúrli túrlerin esten shyǵaryp jatady. Perde úıge kún kózin túsirmeıdi. Al túnde aýa temperatýrasy salqyndaǵanda, kondısıonerdi óshirip, terezeni ashyp qoıyńyz. Eger jeldetkishti durys qoıa bilseńiz, kondısıonerdi almastyra alady jáne áseri odan esh kem túspeıdi. Dese de kondısıonerden bas tartqyńyz kelmese, barynsha tıimdiligin arttyrǵanyńyz jón. Ony jıi qoldansańyz, ár apta saıyn súzgishin tazalap turyńyz.

Ystyq sýdy az paıdalanyńyz

Eger úıińizde boıler bolsa, sý jylytý qyzmetin eń tómengi deńgeıde ustańyz. Onyń ózi qajettilikterińiz úshin jetip jatyr. Eger boıler jyly bolsa, oqshaýlaǵysh materıalmen nemese jyly kórpemen orap qoıyńyz. Osylaısha ishindegi sýdyń jylylyǵyn syrtqy temperatýranyń áserinen qorǵaı alasyz. Qubyrdaǵy sý jylý ustap turýy úshin de ony oqshaýlaǵyshpen orap qoıýyńyzǵa bolady.

Plıtany qoldaný erejesi

Plıtany qosar aldynda úsh qaıtara oılanyńyz. Bile bilseńiz, tamaqty mıkrotolqyndy peshte jylytý arqyly, plıta tutynatyn elektr qýatyn 5 esege únemdeı alasyz. Qysta plıtadan bólingen jylý paıdaly bolar, biraq jazda úıińizdegi kondısıonerdiń jumysyna kúsh túsirýi múmkin. Plıtaǵa taǵam daıyndaıtyn kezde, durys ydys qoldanyńyz – tabanyń kólemi temirpesh qaqpaǵymen birdeı bolýy tıis. Nátıjesinde elektr qýaty az jumsalady. Sonymen qatar taǵamdy sýǵa pisirgennen buryn, býǵa daıyndaǵanyńyz jón. Jáne ydystyń qaqpaǵyn jabyq qaldyryńyz. Sonda taǵamyńyz jyldam ázirlenedi. Elektrli plıta satyp alar kezde, nusqaýlyǵymen tanysyńyz. Onda plıtanyń energıa tutyný deńgeıi kórsetilýi tıis. Bul elektr qýatyn qanshalyqty kóp jumsaıtynyńyzdy baǵamdaýǵa múmkindik beredi.

Mýltıvarkany qoldanyńyz

Eger taǵamdy mýltıvarkada daıyndasańyz, elektr qýatyn únemdeýińiz áldeqaıda tıimdi bolmaq. Kádimgi plıtamen salystyrǵanda, mýltıvarka elektr qýatyn az tutynady.

Tońazytqyshty taza ustańyz

Tońazytqyshty turaqty túrde tazalap otyrsańyz, motorynyń jumysy jeńildeıdi. Osylaısha elektr qýatyn únemdep qana qoımaı, tońazytqyshyńyzdyń ómirin uzartasyz.

Terezelerdi jylylańyz

Barynsha jylylanǵan úı – jyly ári jaıly úı. Jylylaý – ózińizdi jáne úıińizdi sýyqtan qorǵaýdyń eń jaqsy ádisi. Porolon qıyqtary terezedegi sańylaýlardyń barlyǵyn biteýge múmkindik beredi. Ol úıińizdi jylytýǵa jumsalar shyǵyndy 30 paıyzǵa azaıtady. Sonymen qatar qorǵanys qabaty bar tereze ornatýyńyzǵa nemese ony terezege ózińiz japsyryp alýyńyzǵa bolady. Munyń barlyǵy úıińizdi jylytýdaǵy shyǵynyńyzdy tómendetedi.

Flýoresentti shamdardy paıdalanyńyz

Múmkin siz shaǵyn flýoresentti shamdy eshqashan qoldanyp kórmegen bolarsyz. Olaı bolsa, baıqap kórińiz! Bir ǵana shamnyń ózi birneshe myń teńgenińizdi únemdeı alady. Oǵan qosa mundaı sham kádimgi qyzý shamyna qaraǵanda áldeqaıda uzaq qyzmet etedi. Al kepildik talonyn saqtap qoısańyz, satyp alǵan flýoresentti shamyńyz ýaqytynan buryn isten shyqqan jaǵdaıda kóp kómegi tıedi. Nátıjesinde úıińizdiń jaryǵyn qaýipsiz ári únemdi ete alasyz.

---