Ár aryzdyń artynda adam taǵdyry tur desek, árbir jaǵdaı – polısıa qyzmetkeriniń kásibıligin, sabyryn jáne adammen qarym-qatynas ornatý sheberligin talap etedi. Atyraý qalalyq polısıa basqarmasynyń №1 qalalyq polısıa bóliminiń ýchaskelik polısıa ınspektory polısıa kapıtany Marǵulan Mynbaev – osy qyzmettiń aıqyn úlgisin kórsetip júrgen maman.
– Tańerteń erte jıynǵa kelip, basshynyń tapsyrmalaryn alamyz, ákimshilik aýmaqtaǵy krımınogendik ahýaldy baıandaımyz. Táýlik boıy tirkelgen túrli habarlamalar men aryzdardy tekserip, sheshim qabyldaımyz. Ákimshilik aýmaqty aralap, qoǵamdyq tynyshtyqty qamtamasyz etemiz. Arnaıy profılaktıkalyq esepte turǵan tulǵalardy turǵylyqty mekenjaıynan tekseremiz, jaısyz otbasylardyń turmys-tirshiligin baqylap otyramyz. Memlekettik mekemelerden, sot jáne tergeý organdarynan túsken májbúrli jetkizý hattaryn oryndaımyz. JBO kezekshisinen túsken habarlamalarǵa áreket etemiz. Turǵyndarmen kezdesip, aýmaqtaǵy krımınogendik ahýal men jasóspirimderge qatysty profılaktıkalyq túsindirme jumystaryn júrgizemiz, – deıdi polısıa kapıtany.
Marǵulan Jasenuly Myńbaev 1991 jyly Atyraý qalasynda dúnıege kelgen. Ol – Batys Qazaqstan oblysyndaǵy Qazaqstan ınovasıalyq jáne telekomýnıkasıalyq júıeler ýnıversıtetiniń zań fakúltetin támamdaǵan. İshki ister organdarynda 2011 jyldan beri qyzmet etip keledi. Ol ýchaskelik polıseıdiń jumysy – turǵyndar arasyndaǵy birlikti nyǵaıtý dep esepteıdi.
– Men – ýchaskelik polısıa ınspektory polısıa kapıtanymyn. Quqyq qorǵaý salasynda 14 jyldan beri qyzmettemin. Alǵashqy on jyl patrúldik polısıada eńbek ettim. Sońǵy tórt jyldan beri osy aýmaqta ýchaskelik ınspektor retinde jumys istep kelemin. Bizdiń ákimshilik aýmaqta 13 myńǵa jýyq halyq turady. Kúndelikti jumysymyz – osy turǵyndardyń alańsyz ómir súrýine jaǵdaı jasaý. Aıtpaqshy, meniń artymnan ergen baýyrym da osy salada. Ekeýmizdiń aramyz – bir jas. Ol qyzmetke 2015 jyly ornalasty. Qajymuqan da alǵashqy qyzmetin ýchaskelik polısıadan bastaǵan edi, – deıdi ol.
Marǵulan quqyq buzýshylyqtardyń aldyn alý maqsatynda eseptegi tulǵalardy únemi tekserip otyrady. Otbasylyq-turmystyq quqyq buzýshylyqtarǵa beıim otbasylardy júıeli túrde baılanysta bolady. Kámeletke tolmaǵan balalarynyń jaı-kúıin de únemi nazarda ustaıdy.
– Kún saıyn biz qoǵam úshin asa mańyzdy – tynyshtyqty saqtaý jolynda túrli jaǵdaılarǵa aralasamyz. Búgingi oqıǵalar erteń de qaıtalanýy múmkin. Bizdiń basty maqsatymyz – ár azamattyń qaýipsizdigin qamtamasyz etý, – deıdi polısıa kapıtany.
Ýchaskelik ınspektordiń jumysy úlken jaýapkershilik. Óıtkeni, bul qyzmet halyq arasyndaǵy senim kópiri ispettes.
