Bir kóldiń Emen aıtty Qamysyna,
Sybaılas kópten bergi tanysyna:
«Jaratqan meni Qudaı sonsha artyq,
Myqty dep, jer jarylad dabysyma.
Jalǵyz-aq teń kóremin Kaftyń taýyn,
Dúnıede meniń qorqar bar ma jaýym?!
Qasqaıyp ıilmeımin, búgilmeımin,
Soqsa da qandaı qatty quıyn, daýyl.
Qorǵaımyn ózim túgil, aımaǵymdy,
Bolsa da qandaı aptap, qandaı jaýyn.
Myń san qus kelip qonsyn butaǵyma,
Záredeı kórinbeıdi maǵan aýyr.
Birdi olaı jaratqan-dy, birdi bulaı,
Bárinen qor jaratqan seni Qudaı.
Jel tursa, záreń ushyp, qaltyraısyń,
Basyńa, aýyrlaısyń, qonsa torǵaı.
Jel júrip, sýdyń beti jybyrlasa,
Yzyńdap qúlaǵyńa sybyrlasa,
Buǵasyń, búgilesiń sonsha tómen,
Turamyn jarar ed dep jyǵylmasa.
Egerde jaqyn jerde bolsań maǵan,
Eshkimdi jolatpas em, qorǵap, saǵan.
Áýelde seni Qudaı jaratqanda,
Aslan seniń jaıyńdy oılamaǵan.
Beripti saǵan oryn sýǵa jaqyn,
Tursyn dep quıyn, daýyl, dýǵa jaqyn.
Kóz salyp ár tarapqa qarap tursam,
Az eken dúnıede senen paqyr».
«Qulaq sal, Emen batyr, toqta azyraq,
Esimi paqyrlyqtyń menen jyraq.
Iilsem, meni daýyl syndyra almas,
Syndyrar seni qaıta burynyraq.
Yqtıar daýyl soqsyn, quıyn soqsyn,
Ýaıym meniń úshin jeme biraq.
Daýyldan ıilsem de, búgilsem de,
Men saǵan jalynbaımyn járdem surap.
Emenim, sen bilmeseń, men aıtaıyn,
Menen de seniń qaýpiń artyǵyraq.
Ol ras, seni áli jeńe almaı júr,
Kez kelmeı kúshi senen basymyraq.
Dúnıede ózim deme jalǵyz myqty,
Adasqan olaı oılap qatalyqty».
Bolmady sózin tamam etkeninshe,
Burqyrap, quıyndatyp daýyl shyqty.
Daýyldyń ekpinine shydaı almaı,
Ne túrli maqulyqtyń bári yqty.
Qashannan aıla etip, ádis alǵan -
Jabysyp jer baýyrlap Qamys buqty.
Qasaryp, qaıyspastan Emen turdy
Daýylǵa kórsetem dep myqtylyqty.
Neǵylsyn onyń Emen ekendigin,
Qoparyp túbirimen daýyl jyqty.

* * *
Bilemiz, Qamys nashar, Emen myqty,
Emendi myqty degen daýyl jyqty.
Maıysyp, qarsylaspaı, Qamys buǵyp,
Synbastan sol daýyldan aman shyqty.
Myqty dep bolsa bireý aty shyqqan,
Alysyp bolmasa jan ony jyqqan,
(Kisige asa qaırat paıda bermes)
Bir kúni jazym tabar tasqandyqtan.
Kúshtiniń yńǵaıymen júrgenderdi
Oılama isteıdi dep jamandyqtan.
Bolmasa qaıratyńa ebiń serik,
Opa joq qur aılasyz myqtylyqtan.

---