InfoHub Logo

Bul Babaı Túkti Shashty Ázız zamanynda burqyraǵan dıýana bolǵan eken. Qarataýda «Myńjylqy» degen taýynyń baýyrynda bir bulaqty meken jaı qylyp júrip, kúnde tań namazyn kún shyǵarmaı, sol bulaqtyń basynda oqıdy eken. Bir kún[i] alageýimnen kelse, jalańash úsh qyz sýda oınap júr eken. Sonyń bireýine dıýananyń nazary túsip, dıýana da esi aýyp talyp qalypty, qyz da qalpaqtaı túsipti. Sóıtse de olar peri qyzdary eken. Janyndaǵy eki saý qyz talyp qalǵan qyzdy kóterip ala jónelip, ózderiniń jurtyna alyp barypty. Qyz esin jıa almapty. Periniń patshasynyń qyzy eken. Patsha balger, baqsylaryn jıdyryp, bal ashtyrypty, sonda baqsylary aıtypty:

— Adamzattan shyqqan bir áýlıeniń nazaryna ushyraǵan eken. Sol áýlıeniń ózi úshkirip jazbasa, basqadan jazylmaıdy, — depti.

Sonan soń peri patshasy kúshti ushqyr ushqyshtaryn jiberip, Babaı Túkti Shashty Ázızdi aldyrypty:

— Myna balamdy ońaltyp, saýyqtyryp berińiz! — dep jalynyp- jalpaıypty.

— Bular meniń dáret alatuǵyn sýyma baryp, jalańashtanyp sýǵa túskendiginen meniń esim aýyp, bir namazym qaza boldy. Sol namazymnyń oryny qıametke sheıin tolmaıdy. Sony qaıtesiń?! — degen soń:

— Osy balamdy basy bútin alyńyz! — dep, qyzyn beripti. Perilerge buıyryp, bulaqtyń basyna aparyp saldyrypty. Qyz ómirinde dıýanaǵa jalańash denesin kórsetpepti. Bir kún[i] dıýana:

— Jalańashtan, deneńdi kóremin! — dep, qıǵylyqty salypty. Qyz:

— Bolmaıdy, onan soń ekeýmizdiń joldastyǵymyz ada-kúde taýsylady! — depti.

Dıýana da dıýanashylyq minezi qysyp:

— Jalańashtanyp, maǵan bir kórin! — dep qoımaǵan soń, qyz:

— Endi men saǵan joqpyn. Men senen ekiqabat býaz edim, er ul tapsam kerek edi. Sonan soń kórinýime durys edi. Oǵan shydamaı, asyqtyń. Qoı, hosh aman bol! Myna ishimdegi balańdy týǵan soń, osy bulaqtyń basyna ap kelip tastap ketem. Belgisi — altynnan shúmegi, kúmisten túbegi bolar! — dep, jónele beripti.

Sonan soń dıýana qańǵyp ketipti. Sol balany qyz aıtqan kúninde ap kelip, sý basyna tastap ketken eken. Beıýaz bireý taýyp alyp, altynnan shúmegi, kúmisten túbegi bolǵan soń, Túrkistandaǵy Toqtamys hanǵa aparyp berip, Toqtamys asyrap, bala qylyp óstirgen eken. Qazaqtan shyqqan er Edige osy eken. Ákesi — Babaı Túkti Shashty Ázız áýlıe, sheshesi peri qyzy eken. Babaı Túkti Shashty Ázız áýlıe ózin sol bulaqtyń basyna qoıdyrǵan eken de, er Edige de ózin sol Babaı Túkti Shashty Ázıznyń qasyna qoıdyrypty. Olardyń sol orynda ekendigin Jalań aıaq Áshdúr sóılep, ol áýlıe de ózin sonda qoıdyrǵan eken. Munyń bárin bastan-aıaq sóılep áńgime qylǵan — Qýandyqtan shyqqan Aryq Qońyrbaı.
Aqpan, Baıyshtyń Aqpanyn hám ózin sol araǵa qoıdyryp edi desedi. Er Edigeniń ertegisin seıleımin deýshige bir qap jan kerek bolsa kerek.

---