InfoHub Logo

Erte zamanda bir kedeı etikshi bolypty. Bala-shaǵasy kóp eken. Úı-ishin asyraý úshin ol el aralap, qobdıyn qushaqtap júrip, etik tigipti.

         Kúnderdiń kúninde qobdıyn qoltyqtap, tanys emes bir aýylǵa attanady. Buryn júrmegen joly bolǵan soń, etikshi adasyp ketedi. Tún bolady. Aqyrynda, etikshi dalada jalǵyz turǵan ıesiz úıge kezdesedi. Iesiz qystaýdyń ishine kirgen etikshi peshtiń ústine shyǵyp, qobdıyn basyna tósep jata ketedi.

         Bir ýaqytta saldyr-gúldir etken bir nárseniń daýsy shyǵady. Etikshi esikke qarasa mańdaıynda jarqyraǵan jalǵyz kózi bar, bir eńgezerdeı dáý kirip kele jatyr eken.

         — Pesh ústinde jatqan qandaı adam? – dep suraıdy dáý. Etikshi:

         — Bul - etikshi, – dep jaýap beredi.

         Dáý:

         — Bizge kerek sheber etikshimisiń? – deıdi. Sonan soń dáý buıyryp:

         — Káne, beri kel, sheber, myna úıge kir. Eger erteńge deıin bir keremet etik tikseń, janyń aman qalady. Al, eger oryndamasań, basyńdy alamyn, – deıdi de etikshini ishke kirgizedi.

         Dáýdiń ózi esiktiń aldyna jatyp uıqyǵa kirisedi. Etikshi ishinen:

         — Endi ómirim joıyldy, ólip ketsem, bala-shaǵamdy kim asyrar eken? – dep úreılenedi.

         Amaly taýsylǵan etikshi tań atqansha otyryp ǵajaıyp etik tigedi. Etiktiń syrtqy kórinisiniń basqa etikterden aıyrmashylyǵy - ushy tip-tik súıir, joǵary kóterilip turady. Al onyń bir keremet qasıeti - aıaǵyna kıgen adam aspanǵa qalyqtap ushyp, baratyn jerine lezde jetip barady. Biraq ol dáýdiń ony ońaı úıine jibere qoımasyn bilip:

         — Báribir dáý qolynan ólemin. Odan góri bul dáýdi ózim óltireıin, – dep, ótkir pyshaǵyn alady.

         Dáý uıqyǵa ketti-aý degen kezde, etikshi etigin kıip, syrtqa shyǵady. Qalyqtap ushqan kúıi qolyndaǵy pyshaǵymen dáýdiń jalǵyz kózin túırep alady. Dáý baqyryp:

         — Er bolsań, eki soq, – deıdi.

         Etikshi:

         — Bir de jeter, – dep, dáýdiń ústinen ushyp ótedi. Al, dáý jaraqattan tabanda ólgen eken deıdi.

         Etikshi syrtta turyp ári oılap, beri oılap, ıesiz úıdiń tóbesine shyǵyp túneıdi. Tań atqan soń, dáýdiń úıin aralap, qarap shyǵady. Úıdiń bir qarańǵy jerinde temir sandyq tur eken. Etikshi temir sandyqty ázer degende ashady. Onyń ishi tolǵan altyn-kúmis eken. Budan keıin etikshi altyn men kúmisti kereginshe alyp, ǵajaıyp etigin kıip, úıine ushyp keledi.

         Dáýden alǵan baılyǵynyń jartysyn elindegi jetim-jesirlerge taratyp beredi.

         Osylaı, etikshi turatyn aýyldyń turmystary jaqsaryp, murattaryna jetedi. Al, qartaıǵan kezinde etikshini balalary asyrapty.

---