InfoHub Logo

Ákem keshke úıge sharshap keletin. Men kúni boıy úıde otyra berip jalyǵyp, onyń kelýin sabyrsyzdyqpen kútetin edim. Ol esikten kirýimen-aq aldynan júgirip shyǵyp, qushaqtap, onymen oınaǵym keletin. Ákem qushaqtap, súıip: «Qane bólmeńe bar endi» deıtin. Amal joǵynan basym salbyrap bólmeme betteıtin edim. Ákem artymnan: «Kezinde bizdiń bólmemiz de joq edi. Munyń barlyq nársesi bar, taǵy ne kerek túsinbeımin» dep aıqaılaıtyn. 

Bir kúni, úndemesten júretin bolsam ákemmen jaqsy túsinisetinimizdi ańǵardym. Bul joly úndemeı isteı alatyn oıyndar oınaı bastadym. Aldymen sýret sala bastadym. Ákem salǵan sýretterimdi unatyp: «Mine osylaı tynysh otyryp oınasań bolady eken ǵoı!» deıtin. Budan bulaı ashýlanyp, bólmeme qýmaıtyn boldy. 

Osy oılardyń ishinde bir kúni otbasymyzdyń sýretin saldym. Tamaqtan keıin sýretimdi alyp keldim. Ákem qarap turyp:

– Mmm, óte ádemi shyǵypty. Myna kisi men shyǵarmyn?

– Joq, ol kisi emes, myna bala sizsiz.

– Joq, bul kisi menmin, anaý bala sensiń, al janyndaǵy kishkentaı qyz seniń qurbyń shyǵar.

– Joq, ol kisi menmin, myna bala sizsiz, al qasyńyzdaǵy myna qyz anam,-dedim. Ákem menimen aıtysýdy toqtatyp, menen surady: 

– Al nege bizdi kishkentaı bala qylyp saldyń?- dedi. Men qatty qobaljyp, túsindirýdi bastadym:

– Men ósip, úlken kisi bolyppyn. Bir jumys taýyp, jumys isteýdi bastappyn. Sizder qartaıyp, kórshimiz Marat kóke men Sandýǵash apa sıaqty belderińiz búgilip kishireıip qalypsyzdar. Sol kezde men jumystan sharshap kelemin. Siz menimen sóıleskińiz keledi, alaıda men jumysta mıym ashyp ketkennen sizdi tyńdamaımyn da. Siz menimen oı bóliskińiz kelgende: «Qane, bólmelerińizge baryńyzdar, men biraz demalaıyn!» deımin. Jáne artynsha: «Barlyq nárseleri bar. Jyly bólmeleri de bar, bularǵa taǵy ne kerek túsinbeımin» dep aıqaılamyn.  

Men aıtyp bolǵannan keıin áke-sheshemniń kózderi ashyldy. Estigenderine sene almady. Keıin meni qatty qushaqtaǵany sonshalyq, budan bylaı eshqashan toqtamaı sóıleı bersem de jalyqpaı tyńdaı beretin sıaqty edi.

---