InfoHub Logo

Ertede jylqy kúnge qarap bylaı deıdi:

— O, barlyq jan-janýarlarǵa tirshilik syılaǵan qaıyrymdy kún, meni janýarlardyń arasyndaǵy eń sulýlardyń biri desedi jurt. Solaı ekenin ózim de sezemin. Sonda da keıbir dene múshelerimdi budan da ádemirek etýge bolar edi-aý dep oılaımyn.

— Sonda qaı jerińdi túzeı túsýge bolar edi dep oılaısyń? – dep suraıdy kún kúlimsirep.

— Eger, – deıdi jylqy, – sıraqtarym budan da uzyndaý jáne sıdańdaý bolsa, men tipti aldyna jan salmaıtyn júırik bolar edim. Moınym aqqýdyń moınyndaı uzyn bolsa, maǵan ol budan da ásem kórik bitirer edi. Tósim jalpaqtaý kelse, qazirgiden de alymdyraq bolar edi. Onyń ústine adamzatty arqalap júrý úshin jotamnan máńgi alynbaıtyn er bolsa, tipti jarasyp turar edi...

— Jaqsy, qalaǵanyń bolsyn, – deıdi kún jaırańdap, — sál kúte tur.

Sony aıtady da kún jerge túıeni túsiredi. Denesi alpamsadaı, turqy arbıǵan janýardy kórgen jylqy ári qoryqqanynan, ári jıirkengeninen qalshyldap qoıa beredi.

— Mine, sen qalaǵandaı uzyn da sıdań aıaq, aqqýdyń moınyndaı uzyn moıyn, jalpaq keýde, eri de daıyn. Qalaı, seniń de osyndaı bolǵyń kele me? – dep suraıdy kún.

Jylqy áli de esin jyıa almaı qalshyldap turady.

— Jo-joq...– deıdi tili kúrmelip.

— Endeshe, jónińe júr, – deıdi kún jylqyǵa, — saǵan óz boıyńdaǵy da jetedi! Árkim óz qasıetin baǵalaýǵa tıis.

Sodan beri jer betinde túıe de ónip-óse bastapty. Al jylqy bolsa, túıeni kórgen saıyn, áli kúnge deıin denesi dir ete túsip, qaltyraı bastaıdy eken.

---