InfoHub Logo

Bir úıdiń mysyǵy beıqam ómir súripti. Qarny toq bolǵan soń, qımyldaýǵa erinipti. Jalqaýlanǵany sonsha - tipti tumsyǵynyń astynan jorǵalap ótip bara jatqan tyshqandy ustaýǵa da qulqy soqpapty.

Aqyry tyshqan:

– Bizdiń maýbas, – dep, mazaqtaıtyn bolypty.

Bir kúni qojasy eki-úsh qap bıdaıdy úıine kirgizip qoıyp, ózi syrtqa shyǵyp ketedi. Sol kezde qap toly astyqqa tyshqandar tus-tustan lap qoıypty. Kózdi ashyp-jumǵansha qaptyń tas-talqanyn shyǵarypty.

Jyly jerde pyryldap uıyqtap jatqan mysyq tynymsyz sytyrlaǵan mazasyz tyqyrdan oıanyp ketedi. Sonda qaptyń jibin bytyrlata qyrqyp, dándi kútirlete kúısep júrgen tyshqandardy kóredi de ojyraıa qarap qoıyp, jata beredi.

– Á, tamaq jep júrsińder me? – deıdi de qozǵalmaıdy. Ornynan turyp, tyshqandardy qýyp jiberýge erinedi. – Áı, qoıshy, jeı bersin!..

Bir kezde úıge kirip kelgen qojasy tesilgen qapty, shashylyp jatqan dándi kóredi de manaýrap jatqan mysyqqa jetip barady.

– Men úıde sen bar ǵoı dep senip júrsem, tipti úıge kirgen ury tyshqandardy da ustaı almaıdy ekensiń ǵoı. Seni nesine baǵamyn. Odan da toǵaıǵa aparyp tastap qutylaıyn, – dep, saqyldaǵan sary aıazda toǵaıǵa aparyp tastapty.

Aq qarǵa oranǵan toǵaı ishinde búrisip turǵan mysyqty kórgen saýysqan:

– Jyly úıde jatyp, daıyn asqa semirdiń. Tyshqan aýlaýǵa da erindiń. Endi qaıter ekensiń? Qane, mynaý qar basqan toǵaıdan tamaq taýyp jeı qoıshy! – dep, syqylyqtaı kúlipti.

---