InfoHub Logo

Abylaı jońǵar shapqynshylarymen soǵysyp júrgende, on segiz jasar Jánibek qoldy artynan qýa keledi. Kelse, qazaqtar bytyrap, aty barlyqqan Abylaıǵa shapqynshylar jaqyndap qalǵan eken. Jánibek atynan túsip, astyndaǵy kók dónenin hanǵa kóldeneń tartady.

—Qaraǵym-aı, óziń qaıtesiń?—deıdi Abylaı.

—Siz qolǵa tússeńiz, el basshysyz qalar, men qolǵa tússem, qazaqtyń bir áıeli ul tabar,—deıdi jigit.

Abylaı tyń atqa minip, qýǵynshylardan qutylyp ketedi. Bir qalmaq batyrynyń atyn aýdaryp minip, qorshaýdan Jánibek te aman shyǵady.

—Bala, at bergenińnen sóz bergeniń asty ǵoı, osy jolǵy oljanyń basy seniki. Káne, menen bir qalaǵanyńdy alshy,— deıdi han Jánibekti urystan keıin taýyp alyp.

Abylaı eki aıtqanda úndemeı, úshinshi aıtqanda Jánibek:

—Taqsyr, bir basyma jeterlik dáýletim bar, oń tizeńizden oryn berseńiz bolady,—deıdi.

—Batyrǵa oryn ber, mana ne surasa da bir tilegin berermin degen ýádem bar edi,—deıdi Abylaı oń jaǵynda otyrǵan bıine. Bı bir aıtqanǵa ornynan qozǵala qoımaı, eki aıtqanda Jánibekke ala kózimen qarap:

—Ákeń aldyna qoıǵan asty jóndep ishe almaıtyn atanyń aıaǵy edi. Saǵan han qasynda ne bar, atqosshy bolsań da jetpeı me?—deıdi.

—Jaqsynyń janyna arashashy boldyń ba, jamannyń malyna qorǵanshy boldyń ba? Eki aýyz eski sóz bildim dep, han qasynda otyrýǵa seniń neń laıyq? Han eki aıtsa, qadir ketedi, qara eki aıtsa, ary ketedi. Bir qushaq qý aǵashtan bir oqtyq qaıyń shyǵady. Ákem jaman bolsa, sondaı-aq bolar, bylaı tur,—dep, bıdi qolynan ustap turǵyzyp jiberip, hannyń oń jaǵynan oryn alady. Jigit sodan bastap belgili batyr, bıler- men basqynshylarǵa qarsy qol bastap, joryqtarǵa qatysady, «Er Jánibek» atanady.

---