InfoHub Logo

Qazaqtyń qara dombyrasy, halyq ánderi men kúıleri ýaqyt ótken saıyn japon halqyn baýraı bastady, - dep habarlady "24.kz".

Telearnanyń málimetinshe, Takahashı Naokı esimdi japon ónerpazy dombyra, qylqobyz jáne sybyzǵyny minsiz meńgerip alǵan. Takahashı Naokı - Fýkýı prefektýrasynyń turǵyny. Aǵylshyn tilinen sabaq beredi. Alaıda jas mamannyń bar ynta-yqylasy tilge emes, qazaqtyń ulttyq aspaptaryna aýǵan sıaqty. Uly dala eliniń ánderi men kúılerin nasıhattaý japon jigitiniń bıik maqsatyna da aınalǵan.

"Qazaqstan - óte kórkem, tańǵajaıyp el. Men onda jıi bara almasam da, sol jaqta úırengen súıikti isimdi ómir boıy jalǵastyratyn bolamyn", - deıdi dombyrashy Takahashı Naokı.

Takahashıdiń qazaq áýenderine degen súıispenshiligi 13 jyl buryn kútpegen jerden oıanǵan. Kezdeısoq qolyna túsken dıskten dombyranyń únin estigen ol munyń nendeı aspap ekenin bilýge qumartady. Kóp uzamaı yntyzar bolǵan dombyrasy qolyna túsedi. Sol sátten bastap ónerli jigit kúı tartýdy ózdiginen úırene bastaǵan. Kıeli aspaptyń qudireti keıin ony Qazaqstanǵa da jetelep alyp keldi. Bilikti ustazdarmen tanysyp, ózi ónerpazdarmen aralasqannan keıin, Takahashı "qazaqtyń mádenıetine tipten qumarttym", - deıdi. Onyń tańdaǵan jary da qazaq qyzy.

"Kúıeýim ekeýimiz dýet qurdyq, otbasylyq jáne mýzykalyq dýet. Japondyqtar qazaq ánderi men mádenıetine qatty qyzyǵady, al halyq ánderin tyńdaǵanda tipten qýanady. Sodan keıin olar Qazaqstan týraly bilgileri kep, onyń qaı jerde, halqy qandaı ekenin suraı bastaıdy. Biz bárin aıtyp berýge tyrysamyz", - deıdi Takahashı Naokıdiń jubaıy, mýzykant Inara Serikbaeva.

---