InfoHub Logo

Bir kúni qustarǵa da ámir júrgizýshi Súleımen patsha barsha qustardy jınap alyp:

         – Men qartaıdym, jambasyma jumsaq tósek kerek. Barsha qustarǵa aıtarym: maǵan bir-bir taldan mamyqtaryńdy julyp berińder. Sodan tósek jasataıyn, – depti.

         Patshanyń tilegin estigen qustardyń bári bir-bir tal mamyq júnin julyp beripti.

         Sonda jarqanat qulshynyp:

         – Súleımen patshaǵa bir tal júnimizdi bergenimiz uıat emes pe? – dep, óziniń ón boıyndaǵy barlyq ádemi mamyǵyn túgel julyp beripti. Óziniń denesi tyqyr jarǵaqqa aınalyp qalypty.

         Súleımen patsha jarqanattyń bul janqıarlyǵyn kórgen soń:

         – Qustardyń aldy bol! – dep bata beripti. Alaıda, patsha oıǵa shomyp, uzaq otyrypty. Jap-jalańash, typ-tyqyr bul baıǵusqa endi basqa qustar kúlip, mazaqtap júrer. Osy azaptan qutqarmaq bolǵan patsha jarqanatqa aqylyn aıtypty. – Sen budan bylaı túnde ǵana ushatyn bol. Qus pen adam balasy kúndiz seniń myna sıqyńdy kórmeıtin bolsyn.

         Jarqanat óz patshasynyń aıtqanyn buljytpaı oryndapty. Sodan bermen qaraı tek kún batyp, qarańǵylyq túskende, qus uıasyna qonaqtap, adamdar úılerine kirip ketkende ǵana ushyp júretin bolypty.

---