InfoHub Logo

Atyraý oblysyndaǵy ejelgi Saraıshyq qalasyn saqtap qalý úshin júrip jatqan Jaıyq jaǵasyn bekitý kezinde jumys alańynan adam súıekteri shyqty, dep bilim-all.kz habarlaıdy.

Aıta ketelik, jeti han jerlengen delinetin kóne shahardy Jaıyq ózeniniń shaıyp bara jatqany belgili. Buny toqtatý úshin byltyr óńir basshysy Nurlan Noǵaev jergilikti qazynadan 1,5 mıllıard teńge bólingenin málimdegen edi.

Oblystyq tarıxı-ólketaný mýzeıiniń basshysy Rashıda Harıpovanyń aıtýynsha, jumys alańynan shyqqan súıekter arnaıy zertteýler júrgizilip syzbalary syzylyp alynǵannan keıin jınalyp, aýyl mańyndaǵy beıitke qaıta jerlenip jatyr. Ol ejelde munda orys kazaktarynyń, noǵaılardyń jáne ony altynshy ǵasyrdaǵy qazaqtardyń jerlengeni belgili bolǵanyn aıtty. Súıekterdiń astynda Saraıshyq qalasy ornalasqan.

Ol Jaıyq ózeniniń jaǵasyndaǵy apatty jaǵdaıdaǵy qazba ornyn saqtap qalý maqsatyndaǵy arheologıalyq qazba jumysynyń bıyldan bastap qolǵa alynǵandyǵyn jáne 2020 jylǵa deıin jalǵasatynyn da habarlady. Aıaqtalǵan qazba oryndaryn restavrasıalaý bastalǵan. Jalpy qazba jumystaryna tarıh ǵylymdarynyń doktory, arheolog Zeınolla Samashev ǵylymı jetekshilik etedi.

Al, jaǵany bekitý jumysyn júrgizip jatqan merdiger kompanıanyń ókili Asqar Tólenov qurylys 2018 jyldyń basynda aıaqtalady dep josparlanǵanyn aıtty.

Buǵan deıin Mádenıet jáne sport mınıstrligi shahardy qalpyna keltirý úshin 100 mıllıon teńge bóletinin habarlady. Qazirde qalanyń ornyn týrısik ortalyqqa aınaldyrý kózdelip otyr.

Aıta ketelik, Saraıshyq Atyraý qalasynan 45 shaqyrym jerde ornalasqan. Altyn ordanyń saıası, ekonomıkalyq ortalyqtarynyń biri bolǵan qala Qasym hannyń tusynda Qazaq handyǵynyń astanasy atandy. Jibek jolynyń boıynda turǵan munda, tarıhshylardyń aıtýynsha, 7 han jerlengen. Olar: Móńke, Toqtaǵý, Jánibek, Ámir Oqas, Qasym han, Shıh Mamaı jáne Júsip handar. Qalashyq "Bolashaqqa baǵdar: Rýhanı jańǵyrý" baǵdarlamasy aıasyndaǵy «Qazaqstannyń kıeli jerler geografıasy» tizimine engen. 

---