InfoHub Logo

Q. qalasynyń "meımanhanasy" deımiz be, álde "qonaq úıi" dep ataımyz ba? Onda turǵan áńgime joq, áıteýir ekeýiniń biri. Áńgime, osy qonaq úıdiń qonaqtaryna jasaǵan meımandostyǵy, kútýi, tazalyǵy, tártibi jaıynda bolsa deımiz.
"Baýyrsaq jaýǵan kúni" dep Qojanasyr aıtqandaı, keshe ǵana birinshi ret jańbyr jaýǵan kúni, osy qonaq úıdiń ústinde tamshy oınady.
Qonaq úıdiń esiginen kire bergende N2 bólmesi bar. Bul bólmede jatatyndardyń sany tórteý. Kún kesh edi.

Qonaqtyń biri kósilip,
Endi biri sheshinip,
Jatqany sol... jańbyrmen
Úı tóbesi tesilip,

Tamshy ketti sorǵalap,
Qonaqtar sýdan qorǵalap,
İlingenin súıretip,
Eńbektep júr jorǵalap.
Sýdy biri keship júr.
Biri "eskekti" esip júr.
Biri úırekshe "súńgip " júr,
Sóıtip júrip qonaqtar,
Taýyp jyrtyq shelekti,
Aqqan sýdy tasyp júr,
Aıǵyzdanǵan bet-aýzyn,
Uıalǵannan basyp júr.
Dejýrnyı júr shyrqyrap.
Ózi - ózinen burqyrap:
"Osy tamshy aǵyp edi...
Bıyl emes, byltyr - aq.
Onda da bir qym-qıǵash
Túni boıy dirdektep,
Tósekterin súırep kep,
Syrtqa qaraı qashyp edi.
Júkti osyndaı tasyp ek.
Bıyl taǵy tamshylap,
Kúz basynan qamshylap,
Aıtyp-aq tur minekı,
Óshirgen joq eski kúı".

Óıtkeni, dırektordyń óz úıi qurǵaq. Onan aǵyp jatqan sý, tamyp jatqan tamshy joq. Aılyǵyn alady, qaltaǵa salady... Al, qonaq úıdiń tóbesi umytylyp qalady. İshindegi qonaqtary "qos - qolań" arqalap, tún ishinde tamshydan qamshy jep, jyrtyq shelekpen jyrtyq úıdiń sýyn tasyp áýre sarsań bolady. Bular kimge aıtady?

Bireýi úırek, biri qaz,
Bólme tolǵan sýly saz...
Qonaqtardyń "maltyp " júr,
Kıimderi "qalqyp " júr
Sony kózben kórińiz,
Myqtap kóńil bólińiz,
Myqtap kóńil bólmeseń,
Qonaq úıdiń qonaǵy,
Qaıda baryp qonady?
Qonaq tynysh uıyqtaıtyn,
Tamshy qýyp shyqpaıtyn,
Jaıly úı "qashan bolady?

---