InfoHub Logo

Qazaqstanda jumys joǵaltqan azamattarǵa beriletin járdemaqynyń merzimi qysqartylýy múmkin. Eger buǵan deıin jumyssyzdar alty aı boıy tólem ala alsa, endi bul merzim tórt aıǵa deıin qysqartylýy yqtımal. Bul ózgerister júzdegen myń qazaqstandyqtyń qarjylyq jaǵdaıyna áser etýi yqtımal.

Bul týraly Infohub.kz aqparat agenttigi habarlaıdy.

Tólem merziminiń qysqarý sebepteri

Eńbek jáne halyqty áleýmettik qorǵaý mınıstrliginiń málimetinshe, 1 sáýirdegi jaǵdaı boıynsha alty aılyq járdemaqy alatyn qazaqstandyqtardyń sany 115 myń adamǵa jetken. Jalpy, jumyssyzdyq boıynsha járdemaqy alatyndardyń sany 185 myńnan asty. Mınıstrlik bul ózgeristerdiń basty maqsaty – azamattardy jumysqa ornalasýǵa yntalandyrý ekenin atap ótti. Áleýmettik tólemder tek ýaqytsha qoldaý kórsetip qana qoımaı, azamattardyń jumys izdeý kezeńinde qarjylyq turaqtylyǵyn saqtaýǵa baǵyttalǵan.

Burynǵy tájirıbe jáne jańa erejeler

Mınıstrlik ókilderiniń aıtýynsha, 2005 jyldan 2016 jylǵa deıin jumyssyzdyq boıynsha járdemaqynyń eń uzaq merzimi tórt aı bolǵan. Qazirgi josparlanǵan ózgerister tek jańadan járdemaqy taǵaıyndalatyn azamattarǵa qatysty bolady. Iaǵnı, jańa erejeler kúshine engennen keıin ótinish beretinderge bul merzim qoldanylady. Al buǵan deıin járdemaqy taǵaıyndalǵandar burynǵy sharttar boıynsha tólemderin ala beredi.

Jumyssyzdyq deńgeıi

Ulttyq statısıka búrosynyń derekterine súıensek, 2025 jyldyń sońynda Qazaqstanda 285,5 myń adam jumyssyz bolǵan. Onyń ishinde 131,3 myń er adam, 154,3 myń áıel adam boldy. Jumyssyzdyq deńgeıi 4,6%-dy qurady.

Eńbek jáne halyqty áleýmettik qorǵaý mınıstri Asqarbek Ertaev buǵan deıin bergen suhbatynda, pandemıaǵa baılanysty tólem merziminiń alty aıǵa deıin uzartylǵanyn, al qazir mundaı uzaq tólemderdiń qajettiligi joq ekenin aıtqan bolatyn. Mınıstrlik jumyssyzdyq boıynsha járdemaqylardyń joǵary shegi de qaıta qaralyp jatqanyn habarlady.