InfoHub Logo

Elýinde orden alǵan,
Esikten kire tórge barǵan
"Jazýshy" deıtin baspa bar edi,
Beti men bedelinen
alys aǵaıyn jasqanar edi —
Qyzmetinde júrgender keshe
Yǵaı men syǵaı, azýyn aıǵa
bilegen qasqalar edi...
Bastyqtary aýysa bastady,
Eki jylda bireýi kelip
keteýin ketirip,
kemirip jep taýysa bastady.
Birte-birte bedeli ketti,
Bereke-birlik, bederi ketti.
Qaıta quramyz desip, qurıtyn boldy,
Bireýler úretin, bireýler ulıtyn boldy.
Bireýler sasa bastady,
Bireýler bas saýǵalap qasha bastady.
Bireýleri buǵa berdi,
Endi biri jer astynan jik shyqqandaı,
Joq jerden kisi bolyp,
Julqynyp shyǵa keldi.
Anasy ketti, mynasy ketti,
Alasy ketti, qulasy ketti.
Aldymen alashtyń alty arysy ketti,
Qor jınap alǵan qaltalysy ketti.
Bettileri men tektileri ketti,
Ebin taýyp eki asaǵan eptileri ketti.
Aıaýly degen ardaqtylary ketti,
Sanaýly ǵana salmaqtylary ketti.
Nábıden ketti, Nábı ketti,
Qaırat pen Saǵı ketti.
Látıeva Sara ketti,
Biraz daýdy ózimen birge ala ketti.
Egeýbaev Asqar ketti,
Artynan bir top jastar ketti.
Tólen ketti, Tólek ketti,
Saǵynov olardan bólek ketti.
Tóshenov Jumabaı ketti,
Egorov eshkimge unamaı ketti.
Ulyqbek qulamaı ketti,
Muhamedıa tepkige shydamaı ketti.
Israıl odaqqa ketti,
Rafael "Juldyzǵa" qonaqqa ketti.
Esebi túgel Esenbaı ketti,
Iranbek óse almaı ketti.
Qaltyrap Qarsybaı ketti,
Qulahmetov qansyrap artyn arshymaı ketti.
Maǵzom ósip ketti,
Maqsut basqa aýylǵa kóship ketti.
Qanshaıym, Almalardyń ketýi — dekret boldy,
Qazyhandiki — "sekret" boldy.
Ermurat órlep ketti,
Zamanbek biraz terlep ketti.
Raıhan jaıyna ketti,
Darıǵa "baıyna" ketti.
Kúlánda apamyz qımaı ketti,
Shárbaný bolsa — syımaı ketti.
Zámzá áreń ketti,
Shynashaqtaı bolǵan Tamara deıtin páleń ketti.
Baqytkereıge "baqsha" berip qutyldyq,
Jaılaýbaıǵa aqsha berip qutyldyq.
Berik Shahanov bir isin bastap ketti,
Dúısenbek artyna inisin tastap ketti.
Baqyt QazMÝ-diń mańdaıynan shertip ketti,
Qanıpashty da ertip ketti.
Israıl Saparbaı ketti,
Qyltanaq jutyp qaqalmaı ketti,
Qaldarbekke ne degenin ózi biledi,
Basqalarǵa "áı, kápir" atalmaı ketti.
Aramyz birte-birte sıreı bastady,
Burynǵy bedel kúıreı bastady.
Bul kúnde eshkimge aqy berseń ótpeıtinder qaldy,
Tepkileseń ketpeıtinder qaldy.
Kólemi de, tólemi de azaıdy,
Qazaqtyń óleńi de azaıdy.
Aqyndar ketip, qatyndar qaldy,
Bastyqtarǵa jaqyndar qaldy.
Esebin tapqandar qaldy,
Jaǵynyp, jaqqandar qaldy.
Aıtqany azarlar,
Baqqany bazarlar qaldy.
Aǵıma qaldy,
Naǵıma qaldy.
Ádıa qaldy,
Álıa qaldy.
Eptegen proza qaldy,
Eki Roza qaldy.
Tyrashtar qaldy, kil ashtar qaldy,
Úndemeıtin Mahpýza,
Kisini kúndemeıtin Jumashtar qaldy.
Eki Klara, eki Raıa qaldy,
Sony kórip,
Qabıra da muńaıa qaldy.
Shabaqtar qaldy, shortandar qaldy,
Jazıra, Sholpandar qaldy.
Tortaı men Ǵusmandar qaldy,
Quıryǵyn myqtap qysqandar qaldy.
Jybyrlaq qaldy, sybyrlaq qaldy,
Nurahmettiń ózi de qybyrlap qaldy.
Arasanbaı men Ábdi qaldy,
Baıaǵy kónbis daǵdy qaldy.
Eki-úsh uıǵyrymen Turǵandar qaldy,
taǵy biraz qudaı urǵandar qaldy.
Shýmskııdi bir-aq qylǵyp asap alǵan,
Shibılerimen Shmıdt Sasha qalǵan.
Áli de irikteledi, suryptalady,
Sapa degeniń birte-birte quryp barady.
Jikteledi, juptalady,
Profkomynda quptalady.
Ym-jymy jarasqandar qaldy,
Súıek tastasa — talasqandar qaldy.
Ákkisi, aılasy barlar qaldy,
Bireý bolmasa bireýge paıdasy barlar qaldy.
Qýdy qý tapty,
Shuqanaqty sý tapty.
Bir qatyn kúılep júr,
Bir qatyn bılep júr.
Ásıasy,
Tanásy bar,
Lúbasy bar,
Balásy bar,
Ǵazızasy, Anary bar,
taǵy-taǵy alyp-salary bar.
Yryndysy bar, jyryndysy bar,
Shólmektesi, shylymdysy bar.
Qońyzy bar, qors eter dońyzy bar —
Qarymsaqovanyń komandasy qaldy.
Abysyny men amaldysy qaldy.
Solardyń oıyn dál basatyndar qaldy,
Jeń ushynan jalǵasatyndar qaldy.
Sársenbaılar, Saraılar qaldy,
Súıekke talasqan svolochtar men
qatyn-qalash, malaılar qaldy.
Er qańsyp tuǵyr boldy,
El osylardan-aq yǵyr boldy.
Azdaǵan úmit pen dáme qaldy,
Alalaý degen albastydaı pále qaldy.
Bireýge bireý qosaqtaldy,
Biraz bólme bosap qaldy.
Ezýin jımas ezbeler qaptady,
Tegi belgisiz kezbeler qaptady.
Aty-jóni joq avtorlar qaptap keledi,
"kitap shyǵarmaqpyz", — dep saǵan qaraı tap-tap beredi.
Arpyldap úrgishter shyqty,
Jezókshe, júrgishter shyqty.
Endigi bılik solarǵa kóshpesin delik,
Otymyz birjola óshpesin delik, áýmın!

Bul óleńde aty-jónderi atalǵan adamdardyń birazy el-jurttyń bári biletin belgili jazýshylar, aqyndar. Al qalǵan birqatary da osy baspada istegender, qazir kózi joqtary da bar. Olardy jurt tanyp jatsa quba-qup, tanymasa taǵy oqasy joq. "Munysy qaısysy edi?" dep suraý salmasyn da jaqsy bilemin.

Qaldarbek 1991 jyly Qazaqstan respýblıkasy Halyq depýtattyǵyna saılandy. Jazýshylar odaǵy boıynsha Qalaýbek Tursynqulov, Sáken Júnisovter kandıdat bolyp tirkelip edi, Qaldarbektiń aty ozyp shyǵa keldi. Biraz adam oǵan qyzmet kórsetip-aq baqty. Bul kezde Jazýshylar odaǵynyń baǵy qaıta bastaǵan kezi edi, soǵan tuspa-tus kelip, Qaldarbek baspa dırektory bola qaldy. Birden-bir kórkem ádebıet shyǵaratyn baspa, jazýshy bitkenniń onsyz kúni joq. Baspada qatar júrgen Ánes, Orazbekterdiń onyń depýtattyqqa etkizý jolynda qanshalyq jankeshtilikpen ólip-talyp qyzmet jasaǵandaryn kórip otyrdym. Birer ret emeýrin tanytqany bolmasa, maǵan qolqa sala qoıǵan joq. Al Ánester kúni-túni júgirdi-aý dep oılaımyn.

Osy tusta jáne sol jylǵy kúzde ótken jazýshylar sezi qarsańynda Qaldarbek kabınetine qaraı saýsyldady-aý deısiń jigitter. Kileń bir keýdesin kisige bastyrmaımyz dep júrgen "men boldym!" — dardyń ózderi qoldy-aıaqqa turmaı qalaı shapqylaǵandaryn baıqamaı qalǵan da shyǵar. Erýilge — qarýly, eńbekteri de eskerilip jatty. Orazbek Sársenbaev baspa dırektorynyń birinshi orynbasary degen laýazym ıelendi. Ondaı qyzmet joq edi. Qaldarbek kiristi de, joǵarymen kelise júrip, ony da jasatty. Óıtkeni Ánes Saraevty bas redaktor etip joǵarylatý qajet edi. Sóıtip arba da synbady, at ta ólgen joq. Bilek sybana qyzmet kórsetken eki "dosyn" da rıza etip shyǵa keldi. Qaldarbektiń de esebi túgel — elden ozyp tórge ótti.

Jalpy, Qaldarbek jaıly birjaqty toqtamǵa kele qoıý qıyn. Kez kelgen adam týraly kez kelgen taǵy bir adamnan "Osy qandaı azamat?" — dep pikir surashy, "jaqsy", ne "jaman" der edi ǵoı. Al Qaldarbek týraly birde bir adam kesip-piship kesikti baǵasyn bere almaıdy. Ony shyn jaqsy kóretinder de, jek kóretinder de joq. Ózi de bireýge kektener, alaıda janyn úzip berýge daıar dosy joq-aý dep oılaımyn. Ondaı dos kimde bar deısiń, biraq ta!..

Árıne, men munyń bárin shet jaǵalap, sıpaı qamshylap ózine de aıttym. Onda da el basqarysyp júrgen azamat qoı, birde bolmasa birde ne paıdasy, ne zıany tıip qalar ma degen pendelikten de asa almaı, juqalap aıtqam. Men Qaldarbek jaıynda qatelesýim de múmkin, óıtkeni óz qolymyz kóp bılikke jete qoımaǵan soń ba, kim bilsin, syrt kóz synshy keledi degendeı, kóbine-kóp kúngeıinen góri kóleńkeli jaǵy ilikken shyǵar nazarǵa.

Áıtpese, álginde de bir aıttym, bul ózi qolynan kelip turǵanda laq etkizip jaqsylyq ta jasaı alatyn jigit.

Áldekimdershe eki shoqyp, bir qaramaı-aq, tanaý astynan estiler-estilmes mińgirlemeı-aq anyq aıtyp otyryp jasaıdy jasaıtynyn. Ras, ol qatarlas bizden góri atqa erterek mindi de, qyzmet jaǵynan jóndi jolymyz bola qoımaǵan bizge sál joǵarydan qarap daǵdylanǵan. Sol ádetimen ertede "Jalyn" baspasynda dırektor bolyp turǵan kezde bir esikten kirip-shyǵa júre menen jolyqqan saıyn: "Hal qalaı?" dep suraýshy edi. "Ortasha" — deıtinmin men. Oǵan meniń halimdi bilý shart emes, áıteýir jolyǵa qalǵan sáttegi amandasýdyń joralǵysy bolýy kerek. Sondyqtan meniń "ortashama" onsha mán bermeı kúlip óte shyǵatyn. Al tipti asyǵys emes bir sátte kezikken kezde qasyma sál-pál aıaldap: "Seniń haliń nege sonshalyq ortasha bolady osy?" — dep qazbalaı suraıtyny bolatyn. "Onyń sebebi "jaqsy" deseń jurt seni kúndeı bastaıdy, "jaman" deseń "ózine de sál kerek" dep júndeı bastaıdy, al "ortasha" deseń: "e, ózimizden asyp artylyp kele qoıǵan joq eken ǵoı" dep kóp kidirmeı jónderine ketedi", — deıtinmin.

Qarqyldap kúlip sonda ol da ketetin jónine.

Birde Qaldarbektiń kabınetine kirsem, baspanyń sol kezdegi bas redaktory Beksultan Nurjeke balasy bar, ekeýi kezekti jyldyń taqyryptyq josparyn jasap jatqan ústinen tústim.

Meniń de bir kitabymdy kirgizip berińdershi, osyndaı tórt kózderiń túgel otyrǵanda, — dedim men.

Kitabyńdy josparǵa kirgizsek, budan keıin "halim ortasha" degendi qoıasyń ba? — dep surady Qaldarbek. Árıne, onysy mysyqtyń tyshqanmen oınaǵany sıaqty edi.

Árıne, kitabym shyqsa, halim de jaqsarady ǵoı, — deımin men.

Kólemi qansha? — dep Qaldarbek qalamyn alyp, jazýǵa ońtaılandy.

Ekeýiń de kúndik jerge kóleńkeleriń túsetin iri jigitsińder, jeke-jeke barsam árqaısyń bir bes baspa tabaqtan berer edińder toı, ekeýiń qatar otyrǵanda on baspa tabaqtan kem suraǵanym uıat bolar, — dep jatyrmyn men de kópshikti qalyńdaı túsip.

Qaldarbek bezildep qoıa berigi edi, Beksultan turyp:

Báribir óleńi joq, jýyq mańda ákelmeıdi qoljazbasyn, jazyp bitkenshe kim bar, kim joq, on baspa tabaq dep jaza salaıyq ta, — dedi.

Qashan ákelip ótkizesiń? — dedi Qaldarbek.

Kýrortqa júreıin dep jatyr edim, aldyn-ala shart jasasyp, qalamaqysynyń 25 prosentin bergizseń qaıtedi? — dedim endi erkindeý qımyldap.

Onda ýáde bylaı bolsyn, — dedi Qaldarbek, — qoljazbańdy ótkizgen kúni suraǵan somańdy bereıik. Qalaı deısiń? — dep Beksultanǵa qarady.

Beksultan álgi sózin qaıtalap:

Bir jol óleńi joǵyn bilemin ǵoı, ondaı kólemde ótkizgenshe qaı zaman, — degendi taǵy aıtty.

Qoıshy áıteýir, sol kitabym álgi men aıtqan kólemde josparǵa turaqtap bekidi de, uıatqa qalmaý úshin amalsyz kúni-túni otyryp óleń jazýǵa týra keldi. "Bel-beles" deıtin jyr kitabym oıda joqta osylaı týdy da, 1985 jyly jaryq kórdi. Qaltama qomaqty aqshanyń túsýin de, aqyn retindegi ataqqumarlyq, dańqqumarlyq sezimimniń oıana bastaýyn da ózim árdaıym osy kitappen baılanystyryp júremin.

Bul — Qaldarbektiń maǵan jasaǵan taza jaqsylyǵynyń biri edi.

Betpe-bet kelgende Qaldarbek eshqashan senimen teke-tireske barmaı, taıqyp shyǵa keletini bar. Keıde bir yzadan jarylardaı bolyp, jaǵadan ala ketýge taıap qalyp baratynyń bar aldyna. Ol sony kúndik jerden seze qoıady da, aldy-artyńdy túgel orap, máımóńkeleı kele ózińdi jubatyp, rıza qylyp jiberedi. Yrjıa kúlip ketip bara jatyp, bylaı shyǵa oılaısyń: "Oý, osy ne úshin kelip edim buǵan, ne bitti ózi, ne tyndyrdym?" — dep, Sonda baryp túk óndirmeı qaıtqanyń esińe túsedi, biraq endi Qaldarbekke emes, ózińe-óziń renjısiń. Ózińdi óziń jeısiń. Álgi áńgimeden, jaıma-shýaq ázilden keıin kijinip, qaıta barmaısyń ǵoı aldyna.

Baspada ártúrli bas qosýlar, óndiristik jıyndar bolyp turady. Bárine birdeı qatysa bermeısiń. Sebepti-sebepsiz jumysta bolmaı qalatyn da jaıttar kezdesip turady. Sondaıda meniń syrtymnan aıbat ta, ǵaıbat ta aıtylyp jatady eken. Ony sol jıynnan shyǵa bere keıbir áıelder, keıde jigitterdiń biri shyp-shyrǵasyz ózime jetkizip keledi. "Sizdi, oıbaı qurtatyn boldy! Aıtpaǵan sózi joq dırektordyń. "İstegisi kelmese, ketpeı me eken oryndy bosatyp", — deıdi. Osy saryndas sózder kóbeıe tústi. Bul Qaldarbektiń óz sózi emes, jeldiń qaı jaqtan soǵyp jatqanyn da ishim sezedi.

Birde ózine "Sen osy jurt sózin, onda da jybyrlaqtar men sybyrlaqtar sózin nege tyńdaı beresiń?", — dep suradym.

Ol ájeptáýir qyzaraqtap: "Men eshkimniń de sózin tyńdamaımyn!" — dep azar da bezer boldy. "Áı, tyńdaısyń ǵoı, kúnine júz qubylatynyń da sodan", — dep men bolmadym.

Ári qaraı áńgimemiz jaraspady.

Endi bir kúnderi meniń bir bólmeni jeke ıemdenip jalǵyz otyratynymdy da kópsingendeı yńǵaı tanytty. "Qasyńa otyrsyn", — dep birese Turǵandy, birese Tortaıdy ertip kelip tyqpalaıdy. Ekeýi de kezek-kezek: "Oıbaı, óz ornymyz bar ǵoı, ne bar bizge bul kisiniń qasynda!" — desip bezildeıdi.

Kele-kele baspaǵa "bas redaktordyń orynbasary kerek emes sıaqty" degen jeleý oılap tapty. Sol kezde maǵan Orazbek arqyly sóz salyp, "eger eki tomdyq tańdamaly shyǵarmalaryna shart jasap bersek, qalamaqysynyń tıisti mólsherin alyp, jónin tappas pa eken?"— degen saryndaǵy áńgimeni jetkizdi. Áıteýir qalaı burylsam da bir túrtpek.

Aqyry osy toqtamǵa kelistim de, bas-aıaǵy bir kún ishinde baspadan birjola ketip tyndym. Kabınette kóp jyldardan beri jınalyp qalǵan kitaptarym, qaǵazdarym qalyp edi, ornyma bógde bireýler otyrypty ta, aqyry bári qoldy bolyp, keıin taptyrmaı ketti.

1991 jylǵy jeltoqsannyń sońǵy kúnderi edi, Tortaı Sádýaqasov telefon soǵyp: "Ata, baspanyń basshylary sizge kelip ketsin dep jatyr. Sháı-páı iship, shyǵaryp salamyz" — deıdi dep bolmady. Roza meni kóre tura jylystap syrttap ketti. Syltaýsyz. Jınalǵandar aldynda Orazbek qana birdemeler aıqan boldy. "Beker-aq keldim-aý osynda!" — dep otyryp, onyń sózin shala tyńdadym.

Jańa jyldan keıingi kúnderdiń birinde Tumanbaı Moldaǵalıev telefon soqty: "Sen "Baldyrǵanǵa" kel, buıryq shyǵaryp qoıdym. Sabyrhan Asanov osynda, úsheýimiz birge júremiz", — dedi.

Sabyrhanǵa telefon soqsam: "Ras, buıryq bar, úıde jatyp qaıtesiń, kelseńshi!" — degeni.

Sóıtip ketken baspa edi bul.

Arada eki-úsh jyl ótkende baryp bir kúni Qaldarbek shaqyrdy. "Men sonda saǵan jeke bir kabınetti nege qımaǵandyǵymdy ózim de bilmeımin, kóńilińe joq jerden jelik bitetin kezder de bolady. Ókpe-sókpeni qoıyp, qatap júreıikshi, sol úshin shaqyryp edim", — dedi.

Men ózim bireýden kóńilim qalǵan kezde "qalǵan kóńil — shyqqan jan" dep birden atquıryǵyn kesisetin edim. Qaldarbekke kelgende, nege ekenin bilmeımin, áıteýir sony jasaı almadym. Qaıdaǵy bir ashshyly-táttili ymyraǵa kónip qala beretin boldym.

Ol meni bir joly Túrkıaǵa ertip barǵan. On shaqty adam edik, kóbi ózimen birge Qazaq qaýymdastyǵynda isteıtin jigitter, syrttan tek Qajymuqan Masımov deıtin men burynnan biletin dosy bar. On kún túrik jerin erkin araladyq. Kórmegen jerdiń oı-shuqyry kóp, maǵan bári qyzyq edi. Qaldarbek munda óz úıindegideı alshańdaı basady eken. Erteń qaıtamyz degen kúni meni bir adamdarǵa qosyp, qonaq úıge jetkizip salýdy tapsyrdy da: "Men erteń erte baram saǵan, tyrp etpeı otyra tur, birer saǵat dúken aralap, aeroportqa tartarmyz", — dep, ózi qalyp qoıdy.

Ertesinde al kep kúteıin ony. Sáske boldy, tús boldy, kún ekindige oıysty. Sol kezde "al, kettik ushaqqa" dep qasynda bir top túrik, qazaǵy bar Qaldarbek jetti degbirdi alyp: "Aý, seniń keshegi ýádeń qaıda?" deımin men ashýlanyp. Onyń oıyna túk kirip shyǵar emes. Sen renjip qaldy-aý, ózim sıaqty bul da ájeptáýir kisi-aý degen qaperinde joq.

Aeroport basynda, aldyn ala jazǵan bes-alty shýmaq óleńimdi oqyp berdim. Ushaq ústinde ol taǵy aldy-artymdy orap, kinásin jýyp-shaıǵandaı pıǵyl tanytty da, men taǵy jaıylyp sala berdim. Álgi óleń jazǵan qaǵazymdy Qajymuqan qaltasyna salyp alyp, bermeı qoıdy. Esimde:

İshetin jigit edim as tańdatyp,
Ushqany osy ma álde bastan baqyt.
Qaldarbek, meni tastap qaıda kettiń,
Jatyrmyn Stambýlda ashtan qatyp?!
Ákelip salyp meni úı qasyna,
Joq boldy qımasy da, syılasy da.
Erjannyń "Smırnovyn" ishpeýshi edim,
Qor boldym Túrkıanyń "bırasyna".
Bul kúnde qaryn da saý, qalta da saý,
Qaldarbek, dosyń em ǵoı tarpań, asaý.
Dál osy qara qazan qalyń ókpem,
Taı soıyp berem deseń, tarqamas-aý! —

degen shýmaqtar ǵana qalypty. Mundaǵy aty atalǵan Erjan degen jas jigittiń bizben saparlas bolǵan azamattardyń biri de "bıra" dep túrikte "syrany" aıtady eken. Nemisten aýysqan sóz bolýy kerek, sirá.

"Jazýshy" baspasynan báribir birjola qol úze qoıǵan joqpyn. 1993 jyldyń kúzinde eki tom bolyp tańdamaly shyǵarmalarym jaryq kórdi. Bul kezde aqsha aýysyp ketken, al men shart jasasqan kezdegi jaǵdaı múldem basqa edi. Baspaǵa dırektor bolyp Dýlat Isabekov kelgen bolatyn. Shartymdy qaıta jasap berý jónindegi oıymdy eptep aıǵyp edim, túsinise ketýiń qıyndaý jigit eken, jerge qarap otyryp, tanaý astynan áldene dep kúbirlegen soń, "Áı, qoıshy, ashtan ólip, kóshten qalmaspyn" dedim de, qaıta tilenip aldyna bara qoımadym. Ózi bilip meziret jasamaǵan soń syryn almaǵan azamattyń kózine suranshaq ta, suǵanaq ta bolyp kóringim kelmedi.

1996 jyldyń qańtarynda Aqparat jáne qoǵamdyq kelisim mınıstrliginiń orynbasary Álibek Asqarov shaqyrdy.

Sizdi mınıstr Altynbek Sársenbaev tosyp otyr, — dedi Álibek. — "Jazýshy" baspasyna bas redaktor etip jibermek. "Oılanaıyn, pálen-túgen" degendi qaıtesiz, ózińiz buryn istegen jerińiz, kelisińiz.

Mınıstr myrza da týra sol sózdi aıtty. Tek qana: "Bes-alty aı istep kórińiz, kóńilińiz tolmasa, tup-týra ózime kelińiz, odan arǵysyn taǵy kórermiz", — degendi qosty.

Men kelisetinimdi aıttym.

Endeshe, qazir Álekeń ózi aparyp baspa ujymymen tanystyrady, — dedi mınıstr.

"Jazýshynyń" jańa dırektory aqyn Esenǵalı Raýshanovty birazdan beri bilemin. Men aǵa, ol ini bolyp júrgen, syılas, syrlas jastyń biri edi. Álibek meni ertip kabınetine kirgende, burynnan qulaqtanyp otyrsa kerek, qasynda Ánes bar eken, ony shyǵaryp saldy da, birden ytyryla:

Qosh kelipsiz. Biraq maǵan (ıá, baspaǵa degen joq, "maǵan" dedi) baıaǵy Áýkebaev, Maǵaýın sıaqty qoljazba ǵana qarap otyratyn bas redaktordyń keregi joq. Qazirgi naryq zańyna, osy zamanǵa oraı qyzmet isteıtin kisi kerek, — dep, jáne bul sózin ártúrli mán-mánermen eki-úsh ret qaıtalap jiberdi. Álibek úndemegen soń men sál yzalanyp:

Áý, qaraǵym, aldymen isteıikte sol qyzmetti, qalǵanyn kóre jatpaımyz ba? — dep edim:

Joq, aıtqanym aıtqan. Zaman talabyna ere almasa, ondaı bas redaktormen istese almaıtynymdy ashyq aıtamyn, — dep túıile shúılige berdi ol.

İstese almasaq — jónimizge ketermiz. Bul baspadan kim ketpeı jatyr dep ediń. Kezi kelgende men de ketken bolatynmyn. Áli de ketýim múmkin bir kúnderi, — dedim sál-pál qaljyń, sál-pál shyndyq aralastyra.

Esenǵalıymnyń entigi eptep basylaıyn dedi.

Qaı kabınetke otyrǵyńyz keledi? — dep surady ol birshama sabasyna túskennen keıin.

Tórt jyl buryn Qaldarbek qımaǵan, ózimniń terim sińgen shaǵyn bir kabınetim bar edi, sonda otyratyn bolaıyn, — dedim.

Esenǵalı Serik Asylbekovty shaqyryp aldy.

Seke, sizder basqa bólmege kóship, ana kabınetti Sáken aǵaǵa bosatyp berińizder, — dedi.

Ózim de bilip edim solaı bolaryn, — dedi Serik.

Sóıtip, "aınalyp-aınalyp Qosobaǵa qaıtyp keldim" degendeı, biraz aınalyp júrip biz de "Jazýshy" baspasynyń esigin qaıyra kelip ashqan bolatynbyz...

1996 jyl

---