InfoHub Logo

Kórisý kúnin amal merekesi dep te ataıdy. Qystan amaldap, aman shyqqan halyq kóktemge jetip, qýana kórisedi. Buryn ár jerge qonǵan aýyldardyń arasy shalǵaı, qystyń kózi qyraýda qatynaý qıyn bolǵan. Qystaı kórispegen jurt jer jibigende bir-birine qonaqqa barǵan. Batys óńiriniń týmasy, mádenıettanýshy Dáýletkereı Qusaıynovtyń aıtýynsha, bul — aǵaıynnyń arasyn jaqyndatatyn, máni zor meıram. Arazdasqandar bir-birin keshirip, baýyryna tartatyn bolǵan.

Keńes úkimeti ornaǵannan keıin, aılardyń ataýy ózgerip, kóptegen meıramǵa dinı, ultshyl degen aıdar taǵylyp, jabylyp jatqan kezde, jabylmaı qalǵan, urpaqtan urpaqqa ótken meıram bolsa, ol — kórisý. Jalpy «kórisý» degen ne ózi, «kórisý» dep neni aıtady? Adamdar saparlap ketken kezde qaıta oralsa, bolmasa buryn sońdy kórmegen adamy kelse, sonymen kezdesýdi «kórisý» deıdi.

14 naýryz tań atqaly aýyldaǵy ár úıde úlken daıyndyq bastalady. Analarymyz baýyrsaq pisirip, merekelik dastarhan jaıylyp, úıdiń kishileri úlkenderine qol berisip amandasamyz. Sosyn kórshilerge baramyz, aýyldaǵy úlken kisilerdiń bárine kirip shyǵamyz. Bul merekeniń tárbıelik máni zor dep oılaımyn. Sebebi mereke kezinde bir-birimen ókpe-renishi bar adamdar umytyp, sonyń barlyǵy jýyp-shaıylyp, qol alysyp, ıyq qaǵysyp, amandasyp kórisedi. Búgingi kúni mundaı meıramdardy ulyqtaýdyń bir sebebi — ulttyq ımýnıtetti nyǵaıtý. Salt-dástúrimiz ben ádet-ǵurypty umytpaý. Ásirese, jas urpaqtyń sanasyna sińirý mańyzdy. Kórisý, nemese qaýyshý, amal dep atasaq ta, meıram baýyrmaldyq pen aýyzbirlikke shaqyrady. Áıelder qushaqtasyp, erler tós qaǵystyryp, úlkender batasyn berip, balalar sony kórip, sanaǵa túıetin kún — bul.

Aqsáýle Baımenshına, Ǵanı Alshynbaev

---