InfoHub Logo

Koronavırýspen aýyryp, jazylyp shyqqan naýqastarda uzaq ýaqyt boıy ınfeksıanyń saldary baıqalýy múmkin. Mundaı málimdemeni Beıjińdegi Qytaı-Japon dostastyq aýrýhanasynyń Juqpaly aýrýlar ortalyǵynyń dırektory Sao Bın jasady.

Sao Bınniń medısınalyq toby bir kezderi Qytaıdaǵy COVID-19-dyń taralý oshaǵy bolǵan Ýhan qalasyndaǵy Szınıntan gospıtalinen emdelip shyqqan 1,7 myń kovıd-naýqasty baqylady. Zertteý nátıjesi kórsetkendeı, naýqastardyń 70% álsizdik, bulshyqetterdiń aýrýy, uıqynyń buzylýy, sondaı-aq býyndardyń aýrýy, tábettiń nasharlaýy, júrý kezindegi qıyndyqtar syndy asqynýlar bolǵan.

Naýqastardyń 30% aerobty múmkindik pen tózimdilikti baǵalaý úshin júrgiziletin 6 mınýttyq júrý testinen ótpeı qalǵan. 20% astam naýqas psıhologıalyq asqynýlardyń bolǵanyn habarlaǵan. Sondaı-aq, jazylyp shaqqan naýqastardyń jartysynan kóbinde KT-dıagnostıkasynyń kem degende bir bóligi boıynsha normadan aýytqý baıqalǵan.

Sao Bınniń aıtýynsha, COVID-19 aǵzadaǵy jasýshalardyń ólimine, ımýndyq júıege shabýylǵa ákep soǵyp, qosymsha zıan keltirýi múmkin. Ýhanda indet tarala bastaǵan alǵashqy ýaqytta aýyr jaǵdaıda jatqan naýqastardyń kóbinde polıaǵzalyq jetispeýshilik belgileri baıqalǵan.

Oǵan qosa, zertteý kórsetkendeı, eger naýqastarda antıdeneler neǵurlym jyldam tómendese, olarda ınfeksıany qaıta juqtyrý yqtımaldyǵy soǵurlym joǵary bolady. Osylaısha, bul sanattaǵy adamdardy qaýip tobyna jatqyzyp, bolashaqta medısınalyq baqylaýdy muqıat júrgizý qajet.

Sao Bın áriptesterin COVID-19-dyń uzaq merzimdi saldaryna nazar aýdarýǵa shaqyryp, bar kúshti koronavırýsqa qarsy vaksına men dári oılap tabýǵa baǵyttaý keregin aıtty.

---