InfoHub Logo

Ál-Farabı atyndaǵy Qazaq Ulttyq ýnıversıteti – Qazaqstandaǵy kópsalaly bilim beretin aldyńǵy qatarly oqý orny. Alǵashynda Qazaq Memlekettik ýnıversıteti dep ataldy. Ol RKFSR Halyq Aǵartý Komısarıatynyń sheshimimen 1934 jyldyń 1 qańtarynda quryldy.

Qazaq ulttyq ýnıversıteti óziniń negizin  qalanǵannan bastap Qazaqstandaǵy bilim berý júıesiniń betke ustar kórki, ýnıversıtettik dástúrlerdiń, kásibı bilikti ǵylymı jáne pedagogıkalyq mektepterdiń bastaý - kózi boldy. Ál-Farabı atyndaǵy Qazaq Ulttyq ýnıversıteti álemdik standarttarǵa saı, elimizdegi, tipti Orta Azıa keńistigindegi eń iri ári qýatty oqý orny bolyp tabylady. Sonymen birge jyl saıyn ótkiziletin  QS World University Rankings reıtingi boıynsha TMD memleketteri ishinen tek M.V. Lomonosov atyndaǵy Máskeý Memlekettik ýnıversıtetine jol berip, bıylǵy oqý jylynda 165 orynǵa jaıǵasyp, álemdik eń myqty 200 ýnıversıtettiń qataryna kirdi.

QazUÝ ǵylymı ınfraqurylymynyń negizi – Respýblıkadaǵy irgeli zertteý baǵdarlamalary jalpy mólsheriniń 50% júrgiziletin 20 ǵylymı-zertteý ınstıtýty men halyqaralyq ǵylymı ortalyq. Ýnıversıtet janynda sonymen qatar kolej, biliktilikti kóterý ınstıtýty jáne túlekteri qosymsha áskerı mamandyq alyp shyǵyp, QR Qarýly kúshteri qatarynda, ishki ister jáne ulttyq qaýipsizdik organdarynda, keden qyzmeti mekemelerinde qyzmet etýge múmkindik beretin áskerı kafedra jumys isteıdi.

QazUÝ 400-den astam sheteldik ýnıversıtettermen yntymaqtastyq týraly kelisim jasaǵan. Osy negizde magıstrant, doktoranttarǵa eki adamnyń jetekshilik etý tájirıbesi keńinen óristep otyr. Bir ǵylymı jetekshi Qazaqstannan bolsa, ekinshisi – shetel JOO-daǵy belgili ǵalym. Osynyń bári de QazUÝ stýdentteri úshin halyqaralyq deńgeıde oqyp, zertteýler júrgizýge laıyqty jol ashady.

Sonymen qatar ýnıversıtet álemdik jetekshi ýnıversıtettermen qarym-qatynas jasaı otyryp, jyl saıyn stýdentterge, jalpy bilim alýshylarǵa shet elde sapaly bilim alý úshin tıimdi jaǵdaılar jasap otyr. Jyl saıyn  tájirıbıeden ótý syndy sharalardy da iske asyrady. Budan bólek oqý ornynda Qazaqstan tarıhynda alǵash ret qos dıplomdy baǵdarlama boıynsha jumys jasaý múmkindigi qarastyryldy. Iaǵnı, magıstratýrada bilim alýshylar oqýdyń bir jylyn Qazaqstanda, bir jylyn shet eldik ýnıversıtette oqyp, eki oqý ornynan da dıplom alý múmkindigi jasalǵan.

Ýnıversıtet bilim alýshy tulǵanyń jan-jaqty damýyna, ózin-ózi kemeldendirýine qajetti jaǵdaı jasaý úshin bar kúsh-jigerin salyp, stýdenttiń ózin-ózi basqarýǵa, kóshbasshylyq qasıetterdi tárbıeleýge mol múmkindikter týdyrýda. 

ál-Farabı atyndaǵy Qazaq Ulttyq ýnıversıteti, tarıh, arheologıa jáne etnologıa fakúltetiniń 1 kýrs magıstranty Baıbýkasheva Aıdana

---