Meshit kózge kórkem, ózi bıik
Turady jumasyna jurt jıylyp.
Ǵıbrattanyp boryshymdy óteıin dep,
Men bardym shattyqpenen kóńilim súıip.
Qasiretti qara tolqyn qaıǵy kerip,
Qan qaınap ázer shyqtym, ishim kúıip.

Bilmeımin ol ne nárse turǵan zarlap,
Qýlardaı qurt jınaıtyn halyqty aldap.
Jurt otyr uıyqtaıyn dep qalǵyp-shulǵyp,
Túsinbeı daýysty estip aıtqan sarnap.

Sarnady, mańyrady, dańǵyrady,
Keıýaqyt ýata-ýata sańǵyrady.
Anda-sanda tartady qatty-qatty,
Kóńilim sezbeı, bastarym qańǵyrady.

Jurt otyr jýan sozǵan daýysty ańdyp,
Bir sózdi de uǵa almaı tekke qańǵyp.
Qarǵa ma qarqyldaǵan, ıakı bulbul,
Bile almaı men otyrdym buǵan tań ǵyp.

Aıttym dep ol oılaıdy qudaı sózin,
Aıtty ma, aldady ma jurttyń kózin,
Túsindirmeı, syrnaısha qur ándet dep,
Qudaı qashan saılapty onyń ózin?

İshimnen men oıladym: «Qudaı,— dedim,
Mine mıllet rýhy bylaı,— dedim.
Sarnaýǵa qansha ýaqyt ysyrap bolyp.
Ómir qarǵa, óttiń be jylaı»,— dedim.

Bul ómir hámma ıslam jerlerinde.
Begirekte sahradaǵy elderinde.
Mádenımin dep jańarǵan shaharlardyń
Qalǵan joq asýly júr belderinde.

---