InfoHub Logo

Máńgilik el ıdeıasy - Juban jyry

1 Júrgizýshi (41 top stýdenti Bekeeva Dıana):
Armysyzdar, sóz ónerin qurmetteýshi, jyr súıer qaýym!

2 Júrgizýshi (52 top stýdenti Beıbit Ańsar):
Jaıyq óńiriniń perzenti, el tarıhynda bıikten kóriner uly tulǵa, «qazaqpyn» deýge ultshyl atanýdan qorqyp, kóbi jalpaqtap júretin zamanda, «Men qazaqpyn» dep jarıalap kelgen, ómirde de, poezıada da ońaı jol izdemegen, qazaqtyń halyq jazýshysy, KSRO jáne Qazaq KSR Memlekettik syılyqtarynyń laýreaty, aqyn Juban Moldaǵalıevtiń týǵanyna bıyl 95 jyl.

1 júrgizýshi (41 top stýdenti Bekeeva Dıana):
J. Moldaǵalıev atyndaǵy oblystyq ǵylymı - ámbebap kitaphanasymen birlesip ótkizgeli otyrǵan Juban Moldaǵalıevtiń 95 jyldyǵyna oraı shyǵarmalaryn nasıhattaý baǵytyndaǵy «Juban jyry - Máńgilik el ıdeıasy» atty jyr keshine qosh keldińizder!

2 júrgizýshi(52ktop stýdenti Beıbit Ańsar):
Men – qazaqpyn, myń ólip, myń tirilgen,
Jórgegimde tabystym muń tilimen.
Jylaǵanda júregim kún tutylyp,
Qýanǵanda kúlkimnen tún túrilgen.
Daýylpaz aqyn bul poemasynda qazaq halqynyń ótken ómiri men taǵdyry jaıly lırıkalyq - pýblısısıkalyq stılde tolǵana jyrlady. Qazaq halqynyń ulttyq erekshelikterin ashýda, onyń erlik dástúri, týǵan jer men el, onyń baılyǵy, adamdary jaıly asqaqtata kórkemdep jyrlaı bildi. Sonymen qatar aqyn qazaq halqynyń san ǵasyr boıynda aýyr azappen ótken taǵdyryn eske túsiredi. Qazaq eliniń talaı shapqynshylyqqa ushyraǵanyn, biraq halyq bárine tótep berip, ózin qorǵaı bilgenin, eldigi men saltyn, ulttyq qasıetin saqtap qalǵanyn maqtana asqaqtata jyryna qosady.

1 júrgizýshi(41 top stýdenti Bekeeva Dıana):
Osy jyr keshin ashý úshin atty Batys Qazaqstan ındýstrıaldy koleji dırektory mindetin atqarýshy ------------------------------ sóz beriledi.

2 júrgizýshi(52ktop stýdenti Beıbit Ańsar):
Kelesi sóz kezegin J. Moldaǵalıev atyndaǵy oblystyq ǵylymı - ámbebap kitaphana dırektorynyń orynbasary Kenjebaeva Sara Kósháliqyzyna beriledi.

1 júrgizýshi(41 top stýdenti Bekeeva Dıana):
Uly amanat eteıik erkindikti,
El quldyqty bilmesin, jer kúndikti,
Ańsaımyn men, senemin, týady erteń.
«Qazaq bolý – zor baqyt» der kún tipti...-
degen óleń joldary búgingi «egemendikti» jyr etkendeı áserge bóleıdi. Aqyn Juban Moldaǵalıev 30jyldan soń 1986 jyly ulttyq namys týyn qolyna ustap, halqynyń ar - namysy úshin shybyn janyn tigip, Alash táýelsizdigine jol ashty, elimizdiń egemendiginiń alǵashqy qazyǵyn qadap ketti.
«Qazaq tili» óleńi, oqıtyn 52k top stýdenti Kalıev Nurjalǵas.

2 júrgizýshi(52ktop stýdenti Beıbit Ańsar):
Men – qazaqpyn, bıikpin, baıtaq elmin,
Qaıta týdym, ómirge qaıta keldim.
Men myń da bir tirildim máńgi ólmeske –
Aıta bergim keledi, aıta bergim.-
degen óleń joldary dál búgingi nurly dáýirdiń, egemendi elimizdiń bolashaǵy men kemel keleshegin dóp basqandaı seziledi.

2 júrgizýshi(52ktop stýdenti Beıbit Ańsar):
51sk top stýdentteri aqyn shyǵarmashylyǵynan óleńderin usynady.
1. «Saǵyndym Jaıyq»
2. «Aq jaıyq»
3. «Muǵalim»
4. «Otan»
5. «Týǵan aýylymda»

1 júrgizýshi(41 top stýdenti Bekeeva Dıana):
Aqyn týǵan ólkesine kelgen saıyn ózi ósken ortanyń ótkeni men búgingisin salystyra qarap, qaı jaqta júrse de ózi týyp - ósken jerlesteriniń júregine jyly tıer óleńderin syılady. Solardyń biri –«Edil men Jaıyq» áni búgingi qazaq mýzykasynyń altyn qoryna aınalǵan qundy mura.
22k top stýdenti Hafez Jalǵasqannyń oryndaýynda án «Edil men Jaıyq» sizderge arnalady.

2júrgizýshi(52ktop stýdenti Beıbit Ańsar): Búgingi keshimizge aqynnyń zamandas dostarynyń biri............................. aǵamyz kelip otyr. Aqyn týraly óz esteligin aıtýǵa aǵamyzdy ortaǵa shaqyramyz.

1 júrgizýshi:(41 top stýdenti Bekeeva Dıana)
Aqıyq aqyn óz únimen, daýylpaz jyrlarymen poezıa ólkesinde shoqtyǵy bıik alyp tulǵaǵa aınaldy. Aqyn qansha bıikke samǵasa da, «alyp ta anadan týatynyn» esh umytqan emes. «Ana júreginiń jylýy kúlip turǵan kún qyzýynan kem emes», bárimizde ananyń aq sútimen, áldıimen, jan shýaǵymen ósip, jetildik. Ananyń balaǵa degen meıirimi, balanyń anaǵa degen mahabbaty sheksiz, muny tilmen aıtyp jetkizý múmkin emes.
«Men áıelge táńirimdeı tabynam,
Gúl usynam poezıa baǵynan.
Haýa anaǵa qara jer de qaryzdar,
Sodan týsa adam atty baǵyban» - dep aqyn aǵamyz jyrlaǵandaı.
22k top stýdenti Hafez Jalǵasqannyń oryndaýynda «Abzal ana» ánin qabyl alyńyz.

2 júrgizýshi(52ktop stýdenti Beıbit Ańsar):
Óser urpaǵy áli talaı «Men - qazaqpyn» poemasyn tumar ǵyp qasterlep, kókeıge jattap óspek. Saǵynysh sazyna aınalǵan týǵan ólkesiniń keshegi erke uly, búgingi arqa tańar azamaty – Juban aqyn nurǵa malynǵan jasyl Jaıyǵynyń tek tórinde, kóginde eshqashan umytylmaı, juldyzdaı jarqyraı túspek. Urpaǵy maqtanyp, Aq Jaıyq – Juban aqynnyń eli demek. Osymen «Máńgilik el ıdeıasy -- Juban jyry» atty ádebı tanymdyq keshimiz aıaqtaldy. Kelesi kezdeskenshe aman - saý bolyńyzdar!

Batys Qazaqstan ındýstrıaldy
kolejiniń qazaq tili men ádebıeti páni oqytýshysy
Gabdýllına Gýlá Álibekqyzy