InfoHub Logo

Marat Sámetuly Bısenǵalıev — skrıpkashy. 1962 j. Almaty qalasynda týǵan.

Marattyń ákesi Sámet Bısenǵalıevtiń ata tegi Batys Qazaqstan oblysynyń Orda aýdanyn mekendegen. Ol ınstıtýtta joǵary bilim alǵan soń Qyrǵyzstannyń Jalalabad oblysynyń qarjy bólimin basqardy. Keıin otbasy Almatyǵa konys aýdarǵasyn Sámet Bısenǵalıev qaladaǵy Kalının aýdanynyń qarjy bóliminiń tóraǵasy qyzmetinde boldy.

Marattyń anasy — Arýhan kórshiles Astrahan oblysynan, mamandyǵy — muǵalim. Sámet pen Arýhannyń urpaqtary — Ǵalıa, Raıhan, Batıma, Ǵanımat, Saǵadat. Olardyń kenjesi — Marattyń Almatyda 1962 jyly 13 naýryz kúni kindigi kesildi. Eger de onyń anasy Maratty Almatyǵa qonaqqa kelgeninde bosanbasa, jolshybaı týyp qalar edi. Sámet Bısenǵalıev dombyra aspabynda tamasha oınaıtyn. Jerlesteri ortasynda úlken qurmetke ıetuǵyn. Onyń oryndaýshylyǵynda Dáýletkereı men Seıtek kúıleri áýen fırmasynda kezinde taspalanǵan-dy. Marattyń mýzykalyq qabileti keshirek oıandy. Mektepte júrgen shaǵynda ony alda mýzyka ónerpazy bolady dep eshbir jan oılamaǵan. 1969 jyly Kúlásh Baıseıitova atyndaǵy mýzykalyq ýchılısheniń skrıpka klasynda oqýdy bastaıdy. Ol 8 synypta Nına Mıhaılovna Patrýshevnanyń tárbıesinde naǵyz ustazyn tabady. Sonda ǵana skrıpkada berile oınaıdy. Ýchılısheni bitirgen soń ol Qurmanǵazy atyndaǵy Qazaq ulttyq konservatorıasynyń profesory, ardaqty N.M.Patrýshevanyń klasyna qabyldandy. Úshinshi kýrsta P.I. Chaıkovskıı atyndaǵy Máskeý memlekettik konservatorıasynyń profesory Borıs Vladımırovıch Belenkııdiń klasyna aýysty. Marat ustazy týraly: — Borıs Vladımırovıch Belenkıı atyshýly ustaz, profesor L.M.Seıtlınniń shákirti. Onyń shákirti bolǵan, asıstenti Alekseı Brýnı meniń mýzykalyk damýyma barlyq jaǵdaıdy jasady jáne talaı eńbektenýimdi qadaǵalaýda boldy. Ol maǵan degende aktıvti, keı kezde bedeldi pozısıada boldy. Bıik metodıkalyq ádispen júrgizilgen sabaqtar jáne qatal tártip meniń tehnıkalyq sheberligimdi shyńdaı túsken mektep edi, — deıdi. Marattyń jarqyn oryndaýshylyǵy onyń aspıranttyq shaǵynda Máskeýdiń Úlken teatry jáne Lenıngrad sımfonıalyq orkestriniń konsertmeısteri S.Grıshenkonyń jetekshiligimen damı tústi.

Marat konservatorıadaǵy oqý jyldarynda óziniń kýrstas joldastary arasynda úlken qurmetke ıe boldy. Ol B.Belenkııdiń klastyq konsertterinde, konservatorıanyń kishi zalynda skrıpkada sheber oryndaıtynyn tanyta tústi. Onyń jeke konserti Máskeý konservatorıasynyń Úlken zalynda Memlekettik sımfonıalyq orkestrdiń súıemeldeýimen L.Bethovenniń skrıpkalyq konsertin oryndady. Konservatorıadaǵy oqýy aıaqtalǵasyn Marat Bısenǵalıev boıyndaǵy jastyqtyń alaýlaǵan kúshin halyqaralyq skrıpkalyq saıystarda synaı bastady. 1991 jyly Ispanıada ótken Nıkanor Zabeleta atyndaǵy konkýrsta birinshi oryndy jeńip aldy. 1988 jyly Qazaqstanǵa kelip «Altyn alma» atty jeke batystyq mýzyka ujymdarymen taıtalasa alatyn kameralyq konsert qurdy. Dırıjer Qurmanǵazy atyndaǵy konservatorıanyń profesory Ia.Fýdıman, R.Hısmatýllın, Ia.Mavrıdı, S.Bısenǵalıeva, M.Bekmaǵanbetov syndy ónerpazdardy shaqyrdy. Bul Marattyń ózi úlken qanaǵattanýshylyqpen esine alatyn orkestrdi basqarý tájirbıesi edi. Bastama Marattyń Anglıaǵa ketýine oraı toqtap qaldy. Máskeý konservatorıasynda oqyp júrgeninde aǵylshyn ultynyń qyzy Stınamen tanysady. Oqýyn aıaqtaǵysyn birden Londonǵa barady da úılenedi. 1990 jyly Anglıa koróldiginiń orkestrimen úlken konsert atqardy. Onyń skrıpkashylyq óneri tanyla tústi. Osy jyly «Naksos» fırmasynyń menejeri ony baıqap, osy fırmamen birge jumys isteýge shartqa otyrýdy usynady. Munyń ózi skrıpkashy aldynda batystyń kóptegen konserttik zaldarynyń esikteri aıqara ashylaryna jáne álemdik jetekshi mańyzdaǵy orkestrlerde oryndaýyna jol ashyldy. Ol álemniń eń úzdik, árkimniń qolyna túse bermeıtin «Karnegı Hol» jáne «Barbıken Hol», «Albert Hol», «Gıven Haýz» zaldarynda ónerimen tamsandyrdy. Osylardyń arqasynda Marat Sámetulynyń oryndaýyndaǵy shyǵarmalar jazylǵan úntaspalar satylymy molaıa tústi. Onyń kóptegen dıskileri aǵylshyn jýrnaly «Gramofonnyń» úzdigi ataldy. 1989 jyly Máskeýdegi «Melodıa» fırmasy da onyń oryndaýyndaǵy shyǵarmalardy úntaspalady. Onyń repertýaryna 80 skrıpkalyq konsertteri men 1,5 saǵattyq kameralyq mýzykaǵa arnalǵan baǵdarlamalary endi.

---