InfoHub Logo

Bıyldan bastap mektep dırektorlary men olardyń orynbasarlary attestasıadan ótip, eńbekaqysyn kóbeıte alady. Bul týraly QR Bilim jáne ǵylym mınıstri Asqat Aımaǵambetov aıtyp berdi.

«Pedagogtardyń sapalyq quramyn arttyrý jumystary júrgizildi. Qazirgi ýaqytta 150 myńnan astam pedagog biliktilik sanatyn rastap, laýazymdyq eńbekaqysynyń 30-50 paıyzy kóleminde ústemeaqy alyp jatyr», — dedi mınıstr Feısbýk jelisinde halyq aldynda esep berý barysynda.

Onyń aıtýynsha, pedagogtardy attestasıalaý júıesi jetildirilip, bilim berý uıymdarynyń basshylaryn da attestasıadan ótkizý talaby engizilgen. «Jalpy ol — belgili problemanyń biri. Qazirgi ýaqytta dırektorlardyń jalaqysy óte az, jetkiliksiz. Ol úshin birneshe shara qabyldadyq. Birinshiden, bıyl jáne kelesi 4 jyl ishinde jalaqynyń eki ese ósýi dırektorlarǵa da qatysty bolady. Ekinshiden, dırektorlar men olardyń orynbasarlaryn attestasıadan ótkizý ınstıtýty engizildi. Iaǵnı, endi dırektorlar men olardyń orynbasarlary óz jumysynyń tıimdiligin kórsetken jaǵdaıda aı saıynǵy jalaqysyna 30-dan 100 paıyzǵa deıin qosymsha ústemeaqy alatyn bolady», — dep túsindirdi A. Aımaǵambetov.

Osy júıe daıyn, tıisti normatıvtik-quqyqtyq aktilerdi daıyndadyq. Osy aıdan bastap, mektep dırektorlary men olardyń orynbasarlary osy júıemen test tapsyra bastaıdy.

«Onyń nátıjesinde keı dırektorlardy ornynan alý nemese basqa mektepke jiberý múmkindigi bolady. Al jaqsy jumys istep jatqan basshylar ústemeaqy alyp, ári qaraı óz jumystaryn jalǵastyrady», — dedi Bilim jáne ǵylym mınıstri.

---