InfoHub Logo

Almatyda mektepte aqsha jınaýǵa qatań tyıym salynǵan. Eger ondaı fakti anyqtalǵan bolsa, jaýapty tulǵaǵa qatysty jumystan shyǵarýǵa deıingi qatań shara qoldanylady. Bul týraly búgin Almaty qalasy Bilim basqarmasynyń orynbasary Lázzat Jylqybaeva «Nur Otan» partıasynyń qalalyq fılıalynda ótken «Mektep qabyrǵasynda aqsha jınaý» máselesine arnalǵan brıfıńte aıtty.

Lázzat Jylqybaevanyń aıtýynsha, keıde mektepte aqsha jınaýǵa qatysty shaǵymdar túsip turady, alaıda teksere kelgende oǵan ata-analardyń ózi muryndyq bolǵany anyqtalyp jatady.      

«Mektepke oqýlyq, keńse taýarlaryna, dápterge, taǵy basqa da quraldarǵa  aqsha jınaýǵa qatań tyıym salynǵan. Keı jaǵdaılarda aqsha jınaý faktileri kelip túsedi. Bilim bólimi qyzmetkerleri baryp teksergende, kóbine olarǵa ata-analar muryndyq bolǵany anyqtalyp jatady. Mektep qabyrǵasynda qarjy jınaýǵa qatań tyıym salynǵan. Eger de oıyn-saýyq ortalyqtaryna jaǵdaıy jetetin ata-analar mektepten tys ýaqytta jınalsa, qarsylyǵymyz joq, al synyptaǵy 25 baladan májbúrlep aqsha jınap, ondaı sharalardy uıymdastyrýǵa ruqsat joq», -  dedi Lázzat Jylqybaeva.    

Onyń aıtýynsha, Almaty qalasy ákiminiń tapsyrmasymen eki jyldan beri toqsan saıyn mektep dırektorlary muǵalimder men ata-analar aldynda esep berip turady. Jyl saıyn barlyq bilim mekemelerine ata-analardan aqsha jınaýǵa tyıym salynǵany týraly eskertilgen hat jiberiledi.

«Bilim basqarmasynyń saıty ana-alarmen baılanys ornatqan. Eger ata-analardan aqsha jınaý týraly shaǵym tússe qatań shara qoldanamyz. Sonymen qatar, qazirgi ýaqytta Bilim basqarmasy tarapynan ata-analar komıteti qyzmetiniń tıimdiligin qarastyrý basqarmanyń kún tártibinde tur. Sebebi, ata-analar komıteti tikeleı qyzmetin umytyp, muǵalimge aqsha jınaý máselesimen aınalysyp ketedi», - dedi ol.

Aıta keteıik, Almaty qalasynda búgingi tańda 998 bilim berý uıymy qyzmet atqarady, onyń 443-i memlekettik, 555-i jeke menshik. Olarda 375 myń bala bilim alýda. Almaty qalasynda 2016 jyly bilim salasyna - 60 mlrd teńgeden astam,  2017 jyly 63,3 mlrd teńge bólindi.

---