InfoHub Logo

Astanada Túrki akademıasy halyqaralyq uıymynda (TWESCO) «Ortaq túrki tarıhy» oqýlyǵynyń sońǵy jobasyn talqylaýǵa arnalǵan sarapshylar jıynynyń qorytyndy otyrysy ótti.

Aıta keteıik,  orta mektepterge arnalǵan ejelgi dáýirden XV ǵasyrǵa deıingi aralyqty qamtıtyn oqýlyqty TWESCO ázirledi.

Jumys tobynyń qorytyndysy boıynsha arnaıy Hattama qabyldandy. Ol qujatqa sáıkes, oqýlyq jobasy 2018 jyldyń naýryz aıynda Qyrǵyzstanda ótedi dep josparlanǵan Túrki keńesi Memleket basshylarynyń VI Samıtine usynylatyn bolady.

«Biz búgin Túrki keńesiniń aıasynda úlken irgeli isti aıaqtap otyrmyz. Ózderińiz bilesizder, 2013 jyly Túrki keńesinde múshe memleketterge ortaq tarıh oqýlyǵyn engizý jóninde sheshim bolǵan jáne ol Túrki akademıasyna berilgen edi. 2014 jyly alǵashqy baǵdarlama jasalyp,  2015 jyly osy baǵdarlama  Astanada ótken bilim mınıstrleriniń jıynynda maquldanǵan. Sonyń aıasynda arnaıy oqýlyq daıyndalyp, múshe memleketterge jiberildi. Búgin sonyń sońǵy nusqasyna qol jetkizip otyrmyz. Úsh kún boıy Ázerbaıjan, Túrkıa, Qyrǵyzstan men Qazaqstannyń mamandary, mınıstrlik ókilderi birge jumys istedi. Olar árbir sóılemdi, paragrafty talqylady, ortaq kózqaraspen ortaq oqýlyq daıyn boldy. Osy habardy kútip otyrǵan barsha jurtshylyqqa búgingi jumysymyz qutty bolsyn deımin», - dedi Akademıa basshysy Darhan Qydyráli.

Atap aıtqanda, bul jıynǵa Túrki keńesine múshe memleketterden, ıaǵnı Qazaqstan, Ázerbaıjan, Túrkıa men Qyrǵyzstannyń bilim jáne ǵylym mınıstrlikteriniń ókilderi, Túrki keńesi men Túrki akademıasynyń sarapshylary, tarıhshy ǵalymdar tartyldy. Osy jıynǵa qatysýshylar «Ortaq túrki tarıhy» oqýlyǵynyń sońǵy jobasyn maquldady. Orta mektepterdiń 8-shi synyp oqýshylaryna arnalǵan oqýlyq ejelgi dáýirden XV ǵasyrǵa deıingi aralyqty qamtıdy jáne ol 7 bólimnen turady.

Arnaıy jumys tobyna kirgen sarapshylar Akademıada 3 kún boıy (25-27 qyrkúıek) atalǵan oqýlyqtyń jobasyn jan-jaqty talqylap, qajetti túzetýler engizý arqyly mazmunyn tolyqtyrdy. Talqylaýǵa qatysqan mamandar Túrkitildes elder Bilim mınıstrleriniń IV jıynynda qabyldanǵan sheshimderdi negizge aldy.

---