InfoHub Logo

Pavlodar qalasynyń 32 mektebinde hımıa, fızıka, bıologıa jáne ınformatıka pánderi sabaqtarynda pılottyq rejimde aǵylshyn tili engizilýde.

Bul týraly №42 jalpy orta bilim berý mektebiniń 8-synybynda kóp tilde oqytý boıynsha ótken ashyq sabaq kezinde qalalyq bilim berý bólimi ádistemelik kabınettiń meńgerýshisi Sholpan Nurahmetova málim etti dep habarlaıdy pavlodarnews.kz.

 «Munda 2-synyptan bastap sabaq aǵylshyn tilinde júrgiziledi», - deıdi Sholpan Nurahmetova. «Ata-analardyń ózderi pándi shet tilinde júrgizý jóninde ótinish jazǵan bolatyn. Sebebi, olardyń kóbi bolashaqta balalardyń tańdaıtyn mamandyqtaryn aǵylshyn tilimen baılanystyrady».

№ 42 mektepte bıologıa pániniń muǵalimi Evgenıa Ivanova jeti jyldan beri aǵylshyn tilinde sabaq berip keledi. Bilim berý bólimi usynǵan aqparatqa súıensek, qala boıynsha 32 mektepte biliktiligin arttyrý kýrstarynan ótken 94 muǵalim 2655 oqýshyǵa aǵylshyn tilinen sabaq beredi. № 25, № 36 mektepterde 9-synyptar úshin ınformatıka, fızıka, hımıa jáne bıologıa boıynsha 9-synyptarǵa jáne  № 42, 25, 99, 4, 17 mektepterde 8-synyptar úshin bıologıa páni boıynsha aǵylshyn tilinde oqýlyqtar satyp alynǵan. Qazirgi tańda jaratylystaný-matematıka baǵytyndaǵy 146 ustaz 2017 jyldyń sáýir aıynan bastap jeltoqsanǵa deıin 10 aılyq kýrstan ótýde. Osynyń nátıjesinde 2017-2018 jyly aǵylshyn tilinde bilim alatyn synyptardyń sany artpaq. Aldaǵy ýaqytta kóp tilde bilim beretin  mektepter jelisin keńeıtý josparlanǵan. Bıyl V1 sertıfıkatyn alǵan segiz muǵalimniń bireýi - bıologıa, ekeýi - ınformatıka, tórteýi - fızıka jáne bireýi hımıa páninen sabaq bere alady. «Oqýshylar únemi oblystyq, respýblıkalyq jáne qashyqtyqtaǵy ınternet olımpıadalarǵa qatysady. FLEX halyqaralyq konkýrsynyń jeńimpazy atanǵan 11-synyp bitirgen Shyńǵys Koshkýmbaev bir jyl AQSH-ta bilim alyp keldi. Bıylǵy jyly da eki týrdan ótken oqýshylar baıqaýdyń nátıjesin kútip otyr», - deıdi № 42 mekteptiń aǵylshyn tili páni muǵalimi Anna Shkret. 

---