InfoHub Logo

Sportmen shuǵyldanatyn oqýshylardyń oqý úlgerimin jetildirý úshin jaǵdaı jasalady. Bul týraly Ortalyq komýnıkasıalar qyzmetinde ótken baspasóz máslıhatynda QR Bilim jáne ǵylym mınıstri Erlan Saǵadıev málim etti.

«Áleýmettik jelilerde dene shynyqtyrý pániniń úshinshi saǵaty bolmaıtyny týraly jazylýda. Dene shynyqtyrýdyń úshinshi saǵatynan bas tartý jospary bizde joq jáne bolǵan emes. Bul tártip zańnamada jazylǵan», - dedi mınıstr.

Onyń sózine qaraǵanda, bul másele aptasyna úsh saǵattan artyq úıirmelerde sportpen shuǵyldanatyndarǵa qatysty bolǵan. Osy oraıda, bul balalardy dene shynyqtyrý sabaǵynan bosatý talqylandy.

«Biz mundaı sheshimdi ata-analardyń kóptegen ótinishi boıynsha qabyldadyq. Endi osy balalar mekteptegi pedagogıkalyq keńestiń sheshimimen, birinshi kezekte ata-analardyń ótinishimen barlyq qujattarǵa sáıkes, sabaqtan bosatylýy múmkin», - dep naqtylady vedomstvo basshysy.

«Bul turǵyda atalǵan balalar ne isteıdi degen saýal jıi qoıylady. Qazir akademıalyq erkindikti paıdala otyryp, mektepter bosaǵan muǵalimderdiń arnaıy sabaqtaryn qurýda. Bul balalar óz erkimen bilimin jetildirip, oqý baǵdarlamasyn qýyp jete alady. Sebebi sportshy balalar jarystarǵa jıi barǵandyqtan, mektep baǵdarlamasynan qalyp qoıý jaǵdaıy kezdesedi. Sondyqtan da biz osyndaı balalarǵa jeńildik jasaı otyryp, dene shynyqtyrýdan bosatqymyz keledi. Olar oqý úlgerimi boıynsha synyptastaryna jetip alýy tıis», - dep túıdi E. Saǵadıev.

QazAqparat

---