InfoHub Logo

Erteń ómirden ketetinińizdi elestetińizshi. Artyńyzda ne qaldyrasyz?

Skandınavıalyqtar álemge Gans Hrıstıan Andersen men Astrıd Lındgrenniń kitaptarynan bastap ómirdiń húgge jáne lagom stıline deıin keremet nárseler qaldyrdy. Olardyń kelesi syıy, úı keńistigin uıymdastyrý men tazalyq saqtaýǵa baılanysty.

Döstädning — shved tilinen aýdarǵanda «ólim aldyndaǵy tazalyq» degen maǵynaǵa keledi. Onyń qarapaıym tilmen «sońǵy ret azalyq jasaý» dep te aıtýǵa bolady.

Bul uǵymnyń avtory «Ólim aldyndaǵy tazalyqtyń shvedtik shetin óneri: ózińdi jáne otbasyńdy ómirlik retsizdikten qalaı qutqarý kerek» degen biraz daýly ataýmen kitap shyǵarǵan shvedtik sýretshi Margareta Magnýssen «Aınalańa qara. Erteń ólgennen keıin artyńda ne qalady?» degen qarapaıym qaǵıdany alǵa tartty. Kútpegen jerden bul tezıs sándi trendke aınaldy.

Bul maqaladabiz «ólim aldyndaǵy tazalyq júrgizýdiń» mánin egjeı-tegjeıili túsindirip beremiz.

Bul ne úshin kerek

80-jastan asqan Margaret Magnýssen áýelde kitaptaryn ózi sıaqty ómirdiń sońǵy sátterin kóbirek oılap júrgen, 50-den asqan adamdarǵa arnap jazǵan bolatyn. Adamdardyń kóbi ómir aǵysymen kete barady: jańa zattar satyp alady, eski zattardy saqtaı beredi, úıindegi retsizdik pen jınalǵan qoqysqa mán bermeıdi. Ózine «Eger búgin ólip ketsem, jıǵan dúnıeme ne bolady?» dep suraq qoıatyndar az.

Muragerińiz siz qaldyrǵan eski-qusqyny kóredi. Eger de zattaryńyz kóp bolsa, qaısysy rasymen de kerek, qaı zat siz jaıynda estelik bolady, nendeı nárseniń kereksiz ekenin bilmeı, bárin retteı almaı dal bolady. Zattardyń bir bóligi qoqysqa ketedi. Taǵy bir jartysy – jappaı satylymǵa túser. Múmkin sizden qalǵan eski zattardy tazalaý úshin jaqyndaryńyzǵa klınıngtik kompanıa shaqyrtýǵa týra keler?

Men ózime myna suraqty jıi qoıamyn: osy bir zatty úıde qaldyrsam bireý qýanyp, baqytty bola ala ma? Eger de jaýaby «joq» bolsa, onda ol zattan qutylýǵa tyrysamyn.
Margareta Magnýssen

Döstädning tujyrymdamasy úıdiń tazalyǵyna dál osy kózqaraspen qaraýdy kózdeıdi. Úı jınaýdyń maqsaty - jaqyndarymyzdyń jumysyn jeńildetý ekeni aıqyn bola bastaıdy. Ózińnen keıin jarqyn, «taza» estelik qaldyrý. Úıińizdegi ár zattyń mánine kóńil bóletin bolsańyz, onda kóp dúnıeńiz de qalmasy anyq. Demek, úıdi taza ustaý da qıyn bolmaıdy.

Sonymen qatar, «ólim aldyndaǵy» tazalaýdyń taǵy bir artyqshylyǵy onyń adamdy jalyqtyryp jibermeıtindiginde. Úıdiń ishin toltyryp jatqan zattardy rettep, kerek emesin tastap, tek mańyzdysyna den qoıa otyryp, siz óz ómirińizge de qaıta qarap shyǵasyz, estelikterińizde de tek qymbat nárseler qalatyn bolady. Sodan keıin retti, taza aýaǵa toly ári jaryq keńistikte ómir súretin bolasyz.

Shvedtik úı tazalaýdyń 7 qaǵıdasy

«Sońǵy ret úı tazalaýdyń» asa kóp erejesi joq. Alaıda birneshe mańyzdy sátteri bar, soǵan kóńil aýdarý kerek.

1. Jasyńyz 50-ge tolmasa da, bul tujyrymdama sizge de keledi

«Sońǵy ret úı tazalaý» barlyq jasqa jaramdy. Bala kezden-aq biz ózimiz úshin neniń mańyzdy ekenin, neniń ádemi estelikter bolyp, qýanysh syılaıtynyn, neniń qajetsiz ekenin bilip óstik. Bul ádis óz ómirin jeńildetip, retke keltirgisi keletin jandarǵa arnalǵan.

2. Úı retteýdi asyqpaı, bappen, biraq úzdiksiz oryndańyz

Döstädning tujyrymdamasynda siz jaı ǵana tazalyq júrgizbeısiz – siz ómirińizdi retke keltiresiz. Bul jumystyń barysynda eshqandaı da asyǵystyq pen ábigerlik bolmaý kerek, ony naqty bir ýaqytpen shekteýge de bolmaıdy. «Ólim aldyndaǵy» tazalaý degenimiz jaı ǵana shańdardy súrtip, zattardy shkafqa salý ǵana emes, ol ómir saltyn aýystyrý degen sóz.

3. Jaqyndaryńyzǵa ne istep jatqanyńyzdy aıta júrińiz

Týystaryńyz ben dostaryńyzǵa ne úshin eski zattardan qutylyp, aınalańyzdy rettep jatqanyńyzdy túsindirip aıtyp berińiz, nıetińizdi aıqyndap alyńyz. Nátıjesinde siz jaýapkershilikti sezinip, jumysty da jarty joldan tastap ketpeıtin bolasyz.

4. Ómirińizge qajet emes zattardy basqalarǵa syılańyz

Kezinde siz sol zattarǵa aqshańyz ben ýaqytyńyzdy ketirip satyp alǵan bolatynsyz, ıaǵnı ózindik quny bar degen sóz ǵoı. Biraq siz úshin emes. Múmkin, bul qundylyqty basqa bireý sezine alar. Zattarǵa múmkindik berińiz. Kitaptarǵa (eń bolmaǵanda, keıbireýine) dostaryńyz qýanyp qalatyn bolar. Oıynshyqtar men kıimderge – muqtaj otbasylar rıza bolady. Al siz óz ómirińizge ornatylǵan tártipten ǵana emes, sondaı-aq jasaǵan ıgi isten de lázzat alatyn bolasyz.

5. Tazalaýdy shkaftan nemese kıim turatyn orynnan bastańyz

Magnýssen, emosıonaldy jaǵynan az áser qaldyratyn zatqa kıim men aıaq kıimdi jatqyzýǵa bolady deıdi. Kitaptar, áshekeıler jáne oıynshyqtarǵa qaraǵanda olarmen qoshtasý jeńilirek kórinedi. Retteýdi jeńilinen bastasańyz, jalǵastyrý da ońaıyraq bolady.

6. Tazalyq jumystary psıhoterapıalyq áser beretinin este saqtańyz

Ol ómir sońynyń jaqyndap qalǵanyn eske salý emes. Óz ómirińdi qaıta qarap shyǵyp, eń mańyzdysyna den qoıý jaıynda. «Ólim aldyndaǵy» tazalaý – bul ózińniń jarqyn ári qarapaıym hıkaıańdy jeńil jáne muqıat túrde jazý.

7. Atqarǵan jumystaryńyz úshin ózińizge alǵys aıtyńyz.

Retteýdiń kezekti aralyq kezeńin aıaqtaǵan soń, ózińizge alǵys aıtyńyz. Tipti ózińizge syılyq retinde kınoǵa baryp, qolyńyzǵa manıkúr,  shashyńyzǵa jańa shash úlgisin jasap nemese janyńyzǵa jaqyn adamdarmen kafege barýyńyzǵa bolady. Bul sizdiń aldaǵy ómir joldarynda jaqsy demeý bolady.

---