InfoHub Logo

QR Bilim jáne ǵylym mınıstrligine júrgizilgen memlekettik aýdıt barysynda jalpy somasy 26,7 mlrd teńge bolatyn prosedýralyq buzýshylyqtardyń 147 faktisi áshkerelendi.

Sondaı-aq 16,9 mlrd teńge kóleminde qarjylyq buzýshylyqtar men 43,2 mlrd teńge búdjet qarajatynyń tıimsiz jumsalýy anyqtalǵan.

 Bul týraly Respýblıkalyq búdjettiń atqarylýy jónindegi esep komıtetiniń baspasóz qyzmeti habarlaıdy

Baspasóz qyzmeti keltirgen derekterge sáıkes, mekeme QR Bilim jáne ǵylym mınıstrliginde jekelegen búdjettik baǵdarlamalar boıynsha bólingen respýblıkalyq búdjet qarajatyn jáne kvazımemlekettik sektor sýbektileriniń aktıvterin  tıimdi jumsaýǵa qatysty júrgizgen memlekettik aýdıttiń qorytyndysyn keltirgen.

Joǵary jáne joǵarydan keıingi, tehnıkalyq jáne kásibı, orta jáne mektepke deıingi bilim berýdi damytýǵa bólingen búdjettik qarajatty paıdalanýda birqatar júıeli máselelerdiń bar ekeni anyqtalǵan. Atap aıtqanda, 2016 jyly Búkilálemdik ekonomıkalyq forýmnyń jahandyq básekege qabilettilik ındeksi reıtıńinde Qazaqstannyń bilim berý júıesiniń sapasy jónindegi kórsetkishteri túsip ketken. «Bilim berý júıesiniń sapasy», «Menedjment mektepteriniń sapasy» jáne «Joǵary bilimmen qamtý» maqsatty ındıkatorlary oryndalmaǵan.

«2016 jyldyń qorytyndysy boıynsha mınıstrlik Bilim berýdi jáne ǵylymdy damytýdyń 2016-2019 jyldarǵa arnalǵan memlekettik baǵdarlamasynyń úsh aýysymda sabaq ótkizetin mektepterdiń úlesin tómendetý jáne memlekettik-jekeshelik áriptestik jobalarynyń sanyn ulǵaıtý bóliginde josparlaǵan kórsetkishterine qol jetkizbegen», - delingen habarlamada.

Sonymen birge, orta bilimnen keıingi, joǵary jáne joǵarydan keıingi bilim berý salasynda mamandar daıyndaý boıynsha memlekettik bilim berý tapsyrysyn ornalastyrýda mınıstrlik respýblıka óńirlerindegi qajettilikterdi esepke almaǵan. Belgilengen krıterııler de memlekettik tapsyrysty úzdik oqý oryndaryna tolyqqandy ornalastyrýdy qamtamasyz etpeıdi. 

«Ýákiletti memlekettik jáne jergilikti atqarýshy organdardyń tıisti deńgeıde ózara árekettestiginiń bolmaýynan joǵary, JOO-dan keıingi, tehnıkalyq jáne kásiptik bilim beretin oqý oryndary túlekteriniń jumysqa ornalasý deńgeıi tómen kúıinde qalyp otyr. Kadrlardy daıarlaý boıynsha memlekettik-jekeshelik áriptestik júıesin damytýǵa baǵyttalǵan tıisti sharalar qabyldanbaǵan, barlyq múddeli taraptardy tartýdy kózdeıtin ınstıtýsıonaldy tetik ázirlenbegen», - dep habarlady Esep komıteti.

QR BǴM kásiptik bilim beretin jetekshi mekemelerdiń jelisin qurýdy qolǵa almaǵan. Atap aıtqanda, 2013 jyldan beri Óskemen, Ekibastuz jáne Shymkent qalalarynda óńiraralyq kásiptik ortalyqtardyń, 2015 jyldan beri - Astana jáne Almaty qalalaryndaǵy álemdik deńgeıdegi kolejderdiń qurylysy toqtap tur.

Óz kezeginde, «Aqparattyq-taldamalyq ortalyq» AQ 2016 jyly jalpy somasy 10,4 mln teńge bolatyn «Úshtildilikti engizý jónindegi álemdik tájirıbeni zertteý jáne tilderdi úıretý ádisnamasyn ázirleý» memlekettik tapsyrmasyn oryndaý boıynsha óz mindettemelerin tolyq jáne tıisinshe oryndamaǵan.

«Pavlodar, Ońtústik Qazaqstan oblystarynyń jáne Astana, Almaty qalalarynyń qurylys jáne bilim basqarmalary, Shymkent qalasynyń jáne Saıram aýdanynyń qurylys bólimderi jalpy somasy 208,6 mln teńgeni quraıtyn taýarlardy jetkizýdi jáne jumystardyń oryndalýyn teksermegen», - dep málimdedi komıtet.

Memlekettik aýdıt qorytyndysy boıynsha jalpy somasy 16,9 mlrd teńge bolatyn qarjylyq zań buzýshylyqtar, 43,2 mlrd teńge búdjet qarajatyn tıimsiz paıdalaný jáne jalpy somasy 26,7 mlrd teńgeni quraıtyn 147 rásimdik quqyq buzýshylyq faktileri anyqtaldy.

Sondaı-aq, memlekettik aýdıt barysynda 5,9 mlrd teńge qalpyna keltirilgen jáne ótelgen, onyń ishinde respýblıkalyq búdjet kirisine 285,1 mln teńge qaıtarylyp, býhgalterlik esep boıynsha 5,1 mlrd teńge jumystardy oryndaý, qyzmetter kórsetý, taýarlardy jetkizý arqyly qalpyna keltirildi.

Otyrys qorytyndysy boıynsha Bilim jáne ǵylym mınıstrligine anyqtalǵan buzýshylyqtardy joıý boıynsha sharalar qabyldaý, búdjet jáne ózge de zańnama talaptarynyń saqtalýyn qamtamasyz etpegen laýazymdy adamdardyń jaýapkershiligin qaıta qaraý jáne ózge de tapsyrmalar berildi.

Memlekettik aýdıttiń birqatar materıaly prosestik sheshimder qabyldaý úshin quqyq qorǵaý organdaryna jáne ákimshilik quqyq buzýshylyqtar týraly isterdi qaraýǵa ýákiletti organdarǵa jiberiledi.

---