InfoHub Logo

Bıyl – el egemendigine 26 jyl! Bul kún ásirese men úshin jáne Táýelsizdiktiń qurdastary úshin erekshe meıram. Dúnıege shyr etip kelgen kúnnen bastap «táýelsiz eldiń urpaqtary» degen ataly sózdi estip óstim. Batyr ata-babalarymyzdyń táýelsizdik pen azattyq jolyndaǵy ǵasyrlar boıǵy kúresin tarıhtan oqyp bildim. Qanshama bahadúr babalarymyz qany men janyn azattyqtyń aq jolyna sarp etti deseńshi. Qazaq halqynyń ǵasyrlar boıy ańsaǵan asyl armany oryndaldy. Táýelsizdiktiń aq tańy atty! Shırek ǵasyrdan astam tarıhy bar Qazaq eli búginde qarqyndy damyp keledi.

Táýelsizdiktiń qurdasy ataný men úshin úlken mártebe, baqyt jáne maqtanysh! Men 1991 jylǵy birinshi maýsymda  Mańǵystaý oblysy Beıneý aýdany Sarǵa aýylynda kópbalaly otbasynda dúnıege keldim. Úıde jeti qyz jáne bir ul bolyp óstik. Menen keıin áýletimizde kópten kútken  inim dúnıege keldi. Búginde ol qara shańyraqtyń ıesi. Ákem jumysshy, anam «Batyr ana». Qazirgi tańda anam zeınetkerlikke shyqty. Men 1997 jyly Sarǵa aýylyndaǵy Á.Jankeldın atyndaǵy orta mekteptiń birinshi synybyna bardym. Bilim ordasyn 2008 jyly jaqsy aıaqtadym. Mektep qabyrǵasynda júrgende ulaǵatty ustazdardan tálim aldym. Armanym sol kisilerdeı bala janynyń janashyry, aqylshysy, baǵbany bolý edi. Sol jyly Aqtaý qalasyndaǵy Mańǵystaý gýmanıtarlyq kolejine oqýǵa tústim. Onda «Bastaýysh bilim berý» mamandyǵy boıynsha bilim aldym. Qasıetti qara shańyraqta oqyp júrip, qoǵamdyq sharalarǵa  belsene atsalystym. Qolymnan kelgenshe qasymdaǵy dostaryma kómektestim. Oqý ordasyn 2011 jyly abyroımen támamdadym. Qolyma dıplomymdy alyp, týǵan aýylyma bardym. Alǵash eńbek jolymdy «Sarǵa bóbekjaı» balabaqshasynda tárbıeshi bolyp bastadym. Balǵyndardyń byldyrlaǵyn tátti tilderimen qylyqtaryn kóre júrip, jaqsy tárbıe berýge tyrystym. Jaman nárseden aýlaq bolýǵa shaqyrdym. 2011-2015 jyldary aralyǵynda Aqtóbe qalasyndaǵy «Q.Jubanov» atyndaǵy memlekettik ýnıversıtetinde eki jyl oqyp, joǵarǵy bilim aldym. Búgingi tańda Á. Jankeldın atyndaǵy orta mektepte daıyndyq synybynyń muǵalimi bolyp qyzmet etemin. Jumys jasap jatyrǵanyma úsh jyl boldy. Osy ýaqyt aralyǵynda birneshe mádenı sharalarǵa qatysyp, júldeli oryndardy ıelendim.

•    «Bilikti jas maman» mektepishilik baıqaýda 2 oryn aldym.  2017j.
•    Mektepishilik «Qaryshta jas maman qaryshta, dańqyń jetsin alysqa» taqyrybynda jas mamandar semınarynda «Eń qyzyqty ashyq sabaq» nomınasıasy boıynsha dıplommen marapattaldym.
•    «Babalar erligi – urpaqqa ónege» taqyrybyndaǵy oqýshylardyń syrttaı plakattyq sýretteri men fotobaıqaýlarynyń aýdandyq kezeńinde «Beıbitshilik jasasyn» nomınasıasy boıynsha jetekshilik etkenim úshin 3 dárejeli dıplommen marapattaldym. 2015j.    
•    Qazaqstan Respýblıkasy boıynsha bilim berý mekemeleriniń qatysýshylary arasynda «Matematıka, Mektepaldy daıarlyq» páni boıynsha uıymdastyrylǵan respýblıkalyq olımpıada júldegerlerin daıarlaǵanym úshin «Alǵys hatpen» marapattaldym. 2017 jyl.
•    Balabaqshaishilik «Al, qanekeı, Analar» atty baıqaýynda 1 oryn ıelendim.
•    Ulystyń uly kúni – Naýryz merekesine oraı uıymdastyrylǵan «Paı-paı, qazaqtyń kelinderi-aı» atty saıysta 1 oryn alǵanym úshin Dıplommen marapattaldym. 2017 jyl
•    18 – mamyr Halyqaralyq murajaı kúni jáne 21 – mamyr Mádenıet kúnine arnap uıymdastyrylǵan «El ishi - óner kenishi» atty kórmege belsene atsalysqanym úshin dıplommen marapattaldym.

Men úshin Otanyma az da bolsa paıdamdy tıgizip, elimniń bolashaǵy úshin eńbek etýden asqan abyroı joq. Sarǵa aýylyndaǵy Á.Jankeldın atyndaǵy bilim shańyraǵynda ózimde on bir jyl boıy oqydym. Qazir de sol ulaǵatty ustazdarym bilmegenimdi úıretedi. Ujym óte uıymshyl. Adam - bala kezinen bastap qalyptasady. Osy kezden bastap balanyń bolashaq tulǵa, óz eliniń azamaty retinde negizi qalana bastaıdy. Eldiń bolashaǵy bilimdi jastardyń qolynda ekeni anyq. Búgingi jas - erteńgi maman. Sondyqtan shákirtterime sapaly bilim berýge tyrysamyn. Ár sabaqty  balǵyndarǵa túsinikti etip, olardyń bilim alýǵa degen yntasyn oıatý úshin kóp izdenemin. Nátıjesinde balalarym túrli baıqaýlarda júldeli oryn alyp ta júr. Men árbir bala naǵyz talant ıesi der edim. Olarǵa táýelsiz elimizde sapaly bilim alýǵa barlyq jaǵdaı jasalǵan. Men bolashaq jastarǵa senemin. Endigi aldymda turǵan maqsattardyń biri – Otanǵa, óz halqyma degen súıispenshiligi mol – jas urpaqty tárbıeleý dep esepteımin.

Búginde táýba, tarıhymyzdy túgendep, shekaramyzdy bekittik. Elimiz qaryshtap damyp keledi. Týǵan topyraǵym Sarǵa aýylynyń búgingi kelbeti osynyń kórinisi. Bizdiń endigi maqsatymyz – táýelsizdigimizdi odan ári nyǵaıtyp, máńgilik elimizdi kózdiń qarashyǵyndaı saqtaýymyz kerek. Úlken áýletke kelin bolyp túskenime alty jyl boldy. Meniń ata-enemde ulaǵatty ustazdar. Búginde qurmet demalysynda, nemereleriniń meıirimine shomylyp otyr. Allaǵa shúkir búginde ınabatty kelin, ardaqty jar, úsh balanyń aıaýly anasymyn. Sonymen qatar «Máńgilik eldiń» irgesin qalar balapan jetkinshekterge sapaly tárbıe, sanaly bilimmen sýsyndatyp, ulaǵatty ustazǵa aınalý - ómirlik ustanymym.

Táýelsizdiktiń qurdasy bolý da bir baqyt. Otanymyzdyń dańqyn asyrý - bizdiń mindetimiz. Táýelsizdiktiń aq tańynda týyp ósken bizder úshin bul úlken qýanysh, uly mereke. Iá, Táýelsizdigimizdiń tuǵyry bıik, Halqymyzdyń abyroı-bedeli asqaqtaı bersin demekpin.

Qarmysova Aızada Shyraqbaıqyzy
Mańǵystaý oblysy, Beıneý aýdany, Sarǵa aýyly Álibı Jankeldın atyndaǵy
orta mektebiniń bastaýysh synyp muǵalimi

---