InfoHub Logo

Bir kúni Qoja aǵashtyń basyna shyǵyp, ózi otyrǵan butaqty kese bastaıdy. Muny ótip bara jatqan bireý kórip:

— Eı, saǵan ne bolǵan? Qulaısyń ǵoı, — dep aıǵaılasa kerek.

Biraq onyń sózin Qojekeń qulaǵyna da aspaıdy. Sol-aq eken, butaq opyrylyp ketip, Qoja jerge qalpaqtaı ushyp túsedi. O jer, bu jeriniń aýyrǵanyna qaramastan, Qoja ushyp turyp, álgi kisini qýyp jetedi:

— Beri qara, meniń baıqaýymsha, sen bolashaqty boljaıtyn áýlıe adam ekensiń, meniń qulaıtynymdy bilgendikten, qashan óletinimdi de bilesiń. Aıt, men qashan ólemin? — dep ol kisiniń jaǵasyna jarmasyp jibermeıdi.

Sonda álgi kisi Qojadan qutylǵysy kelip:

— Otyn artqan esegiń órge shyǵyp kele jatqanda, bir ret jel shyǵarsa, jarty janyńnan aırylasyń, al ekinshi mártede jel shyǵarsa, janyńmen birjola qosh aıtysasyń, ólesiń, — dep óz jónine júre beredi.

Aıtqandaı-aq esegi órge shyǵyp kele jatyp, jel shyǵarǵanda, Qoja ajalynyń taqap qalǵanyn sezingendeı bolady, al ekinshi qaıtara dybys estilgende, býyn-býyny qaltyrap, yqylyq atyp:

— Óldim, — dep qulaı ketedi.

Qup-qý bolyp, sulap jatqan Qojany kórip, jurt jınalyp qalady. Dereý tabyt jasap jiberip, Qojany salyp ap, qalaǵa alyp júredi. Olar bir sazdy-batpaqty jerge tap bolyp, qalaı qarap júrerin bilmeı, daǵdaryp toqtap qalady.

Sonda Qoja tabyttan basyn kóterip:

— Men tiri kezimde myna aramen júretinmin, endigisin ózderiń bilińder, — depti.

---