InfoHub Logo

Armandaryń oryndala bersin Albına!                                                                                                                 
Almaty qalasyndaǵy  «Shamshyraq»  ǵylym men bilimdi qoldaý ortalyǵynyń uıymdastyrýymen ótken "Bizdiń bolashaq" atty jas talanttar baıqaýyna qashyqtan qatysyp, «Meniń armanym» taqyrybynda óz shyǵarmashylyǵymen 1-oryn júldegeri  atanǵan Albına shákirtimniń armany - meniń kóńilimdi bosatyp, kózime jas aldyrdy.
Shyn bala kóńilmen, bala júregimen jazylǵan bul esseniń bolashaqta oryndalýyna tilektes bola otyryp, kópshilikke joldaǵandy jón kórdim. Sizderge de unaıdy dep senemin.                                              

«N.Tórequlov atyndaǵy №121 JOM» KMM-niń qazaq tili men ádebıeti páni muǵalimi Týltaeva Perýza

 

Meniń armanym

Armansyz adam bolmaıdy. Meniń de óz armanym bar. Meniń armanym ata- anamnyń deni saý, baqytty bolǵany. Olar aman bolsa, meniń kóp armandarym oryndalady dep senemin. Ata-anam,sińlilerim,týystarym barlyǵymyz bir otbasy bolyp merekelerde úlken dastarhan basynda bas qossaq, men qatty qýanamyn.

Meniń kishkentaı sińlim dúnıege kelgende úıdegilerdiń barlyǵy qatty qýandy. Men de qýanyshty boldym. Bizdiń otbasynda tórtinshi qyz bala dúnıege kelgendikten, apam onyń esimin Uljan dep atady. Sebebi, bul esimniń maǵynasy qyz artynan ul ersin degeni. Uly Abaı atamyzdyń anasynyń aty Uljan bolǵan eken. Anasy óte aqyldy ana bolypty. Sol sıaqty meniń de sińlilerim aqyldy bolyp ósse eken deımin. Men úıdiń úlkenimin.  Sabaqtan qolym bosaǵanda sińlilerimdi oınatamyn, olarǵa qarap júremin.  Ata-anamyz bizderdi qatty jaqsy kóredi. Árıne, ata-anamyz úshin bizder - olardyń kóz qýanyshymyz, biraq, ár otbasynda  ul balanyń orny qashanda bólek bolatynyn men jaqsy bilemin. Sondyqtan da, meniń eń úlken armanym - úıge taǵy da kishkentaı náreste kelse, endigi náreste ul bala bolsa eken dep armandaımyn. Anam ul balany dúnıege ákelse, meniń eń úlken armanymnyń biri oryndalar edi. Men onyń atyn ózim qoıar edim. Kúnde sabaqtan kelgen soń, oınamasam da,  anamnyń janynan ketpeı, nárestege qaraýǵa kómektesip, besigin terbetip, áldıin aıtar edim.         

Men armanymnyń oryndalýyn asyǵa-asyǵa kútemin. Meniń osy jazǵan armanymdy oqyp otyrǵan sizdiń de armandaryńyz oryndala bersin- dep essemdi aıaqtaımyn.

«N.Tórequlov atyndaǵy №121 JOM» KMM-niń
5 «Á» synyp oqýshysy Serikbaı Albına

---