InfoHub Logo

Tabıǵat jasaǵan jaratylysynyń ár tynymsyz búlkili perzentine degen tek qana keshirim men meıirimnen turatyn bir úlken júrek bar. Ol – Ananyń júregi.

Sol úlken júrekten taraıtyn kún sáýlesinen de qudiretti, kún sáýlesinen de ystyq bir taýsylmaıtyn jylý bar. Ol – Ananyń perzentine degen kóńili.

Kishkentaı sábı tek sonda ǵana ózin esh alańsyz, esh qaýipsiz sezine alatyn, eshqandaı sheberdiń jasap shyqqan besigi teń kele almaıtyn bir qorǵanysh besik bar. Ol – sábı úshin anasynyń aıaly alaqany men jyly qushaǵy.

Dúnıedegi barlyq ilim men bilim ataýlynyń perzent úshin bastaýynda turar bir qasıetti qaınar kóz bar. Ol – Ananyń perzentine úıretetin tálimi.

Barlyq eńbek etip júrgen jandardyń jasap júrgen qyzmetinen alar saýaby asyp túspese, kem túspeıtin bir uly kúsh bar. Ol – Ananyń perzentine etken eńbegi.

Eshqashan taýsylmaıtyn, túgesilmeıtin, ortaımaıtyn bir ǵajaıyp uly sezim bar. Ol – Ananyń perzentine degen Mahabbaty.

Perzent ataýlynyń júregin qýanyshqa toltyrar bir ulyq kún bar. Ol – Ananyń merekesi.

Kóktem aıynyń bastapqy merekesiniń biri – qyrmyzy gúldeı qulpyrǵan qyz-kelinshekter men Ananyń merekesi.

Merekede quttyqtap qaıt anańdy

Sen ómirge kelgen sonaý shaqtarda,
Sábı sáýle ulasqanda aq tańǵa.
Myna álemniń padıshasy sekildi
Jórgegińde sen nurlanyp jatqanda,
Saǵan meıirim arnaǵan jan kim edi?

Tek sen úshin kún oıanyp aspanda,
Bir sen úshin juldyz sáýle shashqanda.
Sábı shaǵyń keleshekke umtylyp,
Apyl-tapyl sen júgirip basqanda,
Qarsy aldyńnan qushaq jaıǵan kim edi?

Ár tálimi bilim bolyp sińgende,
Sol tálimmen aınalany bilgende.
Arman qýyp jastyq, balań kóńiliń,
Úıden shyǵyp, san joldarda júrgende,
Bir sen úshin alań bolǵan kim edi?

Meıli, jyldar túse bersin araǵa,
Ýaqyt jyljyp ótsin, meıli, sanada.
Eseıgende, erjetkende endigi
Sonyń bárin umytýǵa bola ma?

Mine, óziń de azamat bop qaldyń shyn,
Júregińde taǵy da bir án kúlsin.
Merekede quttyqtap qaıt anańdy,
Bóbek kúniń qaıtadan bir jańǵyrsyn.

Sábı shaǵyń bir orynda tura ma,
Júregińmen aldyń ony uǵa ala.
Seni eseıtip, saǵan ómir syılaǵan,
Ol – osy bir uly ana.

Quttyqtap qaıt, kúlimdesin birge Kún,
Eske tússin qaıta bóbek kúnderiń.
Qandaı syılyq jasaımyn dep qamyqpa,
Eń úlken syı – seniń esen júrgeniń.

---