InfoHub Logo

Erte, erte, ertede mysyq pen tyshqan óte tatý ótetin dos eken. Olar tapqandaryn bólip jep, oınap-kúlip júripti.

Sol kezde adamzat jyl múshelderin belgileý úshin bir jyly haıýanattardy jınap saılam júrgizbek bolypty, bul saılamǵa búkil haıýanattardyń barlyǵy qatysýy kerek eken. Erteń saılam júrgiziledi degen kúni uıqyshyl mysyq «Táńerteń uıyqtap qalyp saılamnan qur qalmaıyn» degen oıymen qaǵylez dosy tyshqanǵa:

— Aǵaıyn, erteń saılamǵa birlikte baraıyq. Uıqynyń qattylyǵyn óziń bilesiń, tańerteń meni sózsiz oıatyp qoı, erterek baraıyq, — depti.

— Qam jeme, mysyq aǵa, men tań atpaı oıanǵanymmen, seni oıatpaı qaıtip jalǵyz baramyn, — depti tyshqan. Biraq ol túnimenen oıǵa batyp «Saılamǵa qatynasatyndardyń sany kóbeıip ketse, maǵan jyl tımeı qalýy múmkin» degen baılamǵa kelip ertesi tańerteń alań-eleńde ornynan turyp, qasyndaǵy mysyqty oıatpaı ózi jalǵyz saılamǵa jetip barady.

Saılam barysynda tyshqannyń joly ońynan kelip, on eki jyl músheliniń birinshisi bolyp saılanady.

Tyshqan qaıta oralǵanda ornynan endi turǵan mysyq:

— Saılamǵa qashan baramyz? — dep suraıdy.

— Áli uıyqtap tús kórip tursyń ba?! — deıdi. Tyshqan mazaqtaı kúlip, — saılam aıaqtaǵaly qashan, men saılanyp qana qalmastan, birinshilikti qoldan bermedim.

— Meni nege oıata salmadyń? — deıdi mysyq renjip.

— Umytyp qalyppyn, — deıdi tyshqan.

— Ashýlanǵan mysyq murtyn edireıtip:

— Ońbaǵan, betsiz! Tuqymyńdy qurtaıyn, — dep oqsha atylyp baryp, tyshqandy bas salyp, qylqyndyryp óltiredi de, jep alady. Biraq mysyq álgi tyshqandy óltirgenimen, jyl múshelikke ıe bola almaıdy. Sóıtip, kúni búginge deıin mysyq tyshqandy kórdi boldy, bas salyp qysyp, mylja-myljasyn shyǵaryp jep alatyn bolypty.

---